أركب سنتر في التوكيل ولا برة؟؟ وإية العواقب؟

**goodwave** · 16-03-2008 10:26 AM

السلام عليكم

بصراحة محتاااااار..... عاوز أركب سنتر بريموت لعربيتي ومحتار أركبة في التوكيل ولا برة عند ناس مشهورة مثل ( حمدي داوود) إللي في سموحة عزبة سعد؟؟

الاسعار كالاتي:

1- سنتر : 350 جنية
2- سنتر بريموت في المفتاح: 450 جنية
3- سنتر بريموت في المفتاح وإنذار: 850 جنية

وهذة الاسعار شاملة التركيب والمصنعية.

على الجانب الاخر سألت عند حمدي داوود قالي سنتر بريموت في المفتاح وإنذار ب 425 جنية وهو نفس النوع إللي موجود في التوكيل! أعمل إية؟؟؟

هل التركيب دة بيخرج من الضمان؟ هل العملية بسيطة ولا صعبة ومعقدة وممكن كهربائي مش فاهم يبوظ الدنيا؟
انا بصراحة ميال للسنتربريموت بس من غير إنذار.

أفيدوني أفادكم الله

شكرا

**tamohsen** · 16-03-2008 02:38 PM

يستحسن تركبه في التوكيل منعا لوجع الدماغ
انا مركب سنتر بريموت في المفتاح وإنذار: ب 750 جنية في التوكيل الرئيسي بالعباسيه شامل كل حاجه

**hero** · 16-03-2008 08:35 PM

معلش التوكيل مزود طبعا ...بس التوكيل اضمن واحسن....علي الاقل مش هاتلاقي حد يتلكك ويقولك انت ضمان الكهرباء بقي لاغي...

وبعدين اي لعب في كهرباء العربية يستحسن يبقي في التوكيل....لانة بيتعمل بنضافة....ولازم يعدي علي علبة الفيوزات ويستخدم واحد من الاحتياطي الفاضي ايلي هناك....غير كدة ما تضمنش الصنايعية ايلي برة شغالين ازاي....وممكن تلاقية قطع الدنيا وملاها شكرتون...

**معاذ الشرباصى** · 16-03-2008 10:48 PM

محمد ايهاب ابن خالتى معاه ياريس من شهر 7/2006

ركب السنتر بالانذار و الريموت بره التوكيل

لحد النهارده مشاكل كتير فى العربية

غير انه لما كان فى مركز الصيانة بتاع العبور قاله العربية اللى بتنزل من غير سنتر, مبنحبش نركبلها سنتر علشان ممكن يعمل مشاكل فى المستقبل, و طبعا هتتصلح على حسابهم

يبقى اضمن لك تعمله فى التوكيل, لو حصل حاجة بيتصلح على حسابهم

**معاذ الشرباصى** · 17-03-2008 01:53 AM

بس الحقيقة بس علشان المعلومة تبقى كاملة, المحل اللى ركب عنده محمد السنتر كانوا مش محترفين و مركبوش حلو

**goodwave** · 17-03-2008 10:12 AM

السلام عليكم

متشكر لكل الاخوة والاراء
بصراحة كنت ناوي اركب السنتر في التوكيل ومع إني مستغلية بس قولت أريح نفسي من وجع الدماغ و200 او 300 جنية زيادة بس حاجة في الضمان..... ولما سألت في التوكيل على ضمان السنتر قالوللي ضمان إية إنت مركبه عندنا فأكيد حيكون ضمانه من ضمان العربية (الكهرباء).... فأشتريت دماغي. بس بردة الوسواس قالي لازم تشتشير إخواتك في المنتدى لأنه لا خاب من أستشار! وبناء على أرائكم إللي بتدعم رأيي إن شاء الله أتصل بالتوكيل دلوقتي وأقولهم يركبوا السنتر بريموت من غير إنذار أبو 450 وبالمرة طالما لسة عندهم بتتصلح:( دعواتكم!

**Hanan** · 18-03-2008 09:40 AM

طب اية اخبار تركيب الزجاج الكهربا للياريس فى التوكيل و بكام

**mido777** · 18-03-2008 10:15 AM

السلام عليكم

ازيك يا ابو حميد وايه الأخبار

والله انا زعلت جدا لما قولتلى على اللى حصل للعربية عند هانى السروجى بس معلش قدر الله وماشاء فعل

- خيك فى التوكيل احسن والفرق فى السعر يكفى انه حيكون راحة نفسية ليك وتكون مطمئن