البطاريه باظت انا معايه الضمان هل ارو التوكيل ولا اروح العنوان اللى مكتوب فى الضمان
عرض للطباعة
البطاريه باظت انا معايه الضمان هل ارو التوكيل ولا اروح العنوان اللى مكتوب فى الضمان
العربية فيها مشكلة في الدينامو والوكيل بيغيره
في عضو هنا كان كاتب انهم راحلو غيرولو الدينامو ف حضرتك ممكن تكلمهم وتشوف
المشكله مش الدينامو انا روحت عند كهربائى بص على البطاريه قال البطاريه شكر جابت العلامه البيضه
باشا حضرتك تروح شارع الطيران جنب توكيل منصور هتلاقي توكيل البطارية بتاعتنا هناك وناس محترمين جدا جداجدا....انا رحت غيرت بتاعتي مخدتش 10 دقايق بالظبط....وابقي طمنا عليك..
شكر على الرد ياعنى مش لازم توكيل اسبرانزا طيب ممكن يكون فى الشرقيه توكيل البطاريه طيب معلش لو رقم تليفون توكيل البطاريات اللى فى شارع الطيران
اسف على الاطاله طيب لورحت التوكيل اللى فى شارع الطيران ليهم موعيد ولا ظروفهم ايه لو رقم تليفونهم مع حضرتك ياريت
لا مش معايا والله يا باشا الرقم ....انا لما رحت كان الساعة 11 تقريبا صباحا وحشرتك ممكن تشوف الرقم في شهادة الضمان بتاعت البطارية...وتحت امرك في اي استفسار تاني
الف شكر انا هاروح ان شاء الله اغيرها بس يارب يغيروها بسرعه وميقلوش لازم تسيب البطاريه انت عارف جميع التوكيلات يومهم بسنه :majd(4):
لا بصراحة محترمين جدا حضرتك هتدخل توكيل منصور نفسه وهو هيجبلك البطارية وهيسال حضرتك تغيرها انت ولا يجبلك حد....لو معاك فل مش معاك خلي الراجل اللي عنده يغيرهالك واديله اللي فيه النصيب انا اديتله 20 جنيه بصراحة عشان شال البطارية بنفسه وكدة...وربنا يسترها علينا وابقي طمنا عملت ايه....
طيب ايه علامات ان البطارية بتبوظ يعني اصل انا عندي لمبة البطارية بتنور وتطفي فممكن الافادة لو سمحتم
بتنور وتطفي يبقي دينامو ياباشا بيجيب اخره....حضرتك تروح المركز الرئيسي وتطلب تغيير دينامو علي الضمان
لازم المركز الرئيسي ولا ممكن اي مركز صيانة معتمد و بعدين انا كدة ممشيش بالعربية و لا ايه النظام.
امشي عادي بس من غير تكييف ولا انوار و طبعا لازم المركز الرئيسي عشان هناك الدينامو موجود لكن لو مركز خدمة تاني هياخد وقت لحد ما يجبلك الدينامو وربنا يوفقك وتغيره علي خير......ممكن اعرف عربيتك عاملة كام كيلو؟؟؟
عامل 22000 كيلو و يعتبر ديه اول حاجة تحصل تحتاج تغيير في العربية عندي و لله الحمد .
بس حضرتك بتتكلم على المركز الرئيسي اللي عند بوابات اسكندرية ده و اروح علطول و لا لازم حجز و بعدين لو رحت الموضوع هياخد اليوم كله و لا ممكن اروح قبل الشغل يعني بدري بدري .
والله يا باشا انا رحت من غير حجز المركز اللي بعد البوابات وبعدها بيومين الدينامو كان موجود...ياريت حضرتك تتصل بيهم افضل الاول عشان انا رحت 3 مرات لسبب اني مكنتش بسي العربية هناك مش اكتر كلمهم الاول احسن....
معلش يا باشا اللي بعد البوابات ده هوه اسمه مركز ابو رواش و لا ده واحد تاني .
و ممكن ياريت توصفلي الطريق ازاي من الدائري ربنا يباركلك عشان انا مش دايس اوي في الحتة اللي هناك ديه.
لا يا باشا اللي بعد البوابات ده اسمه ابو الفتوح كيلو 32 ابو رواش ده اللي قبل البوابة....بالنسبة للطريق حضرتك هتنزل النزلة بتاعت ميدان لبنان وتطلع المحور وهتنزل اول نازلة تقابلك يمين بتاعت طريق اسكندرية الصحراوي اول ما تعدي البوابات هتلاقي التوكيل علي ايدك اليمين والناس اللي هناك محترمين جدااااا....اول ماتروح اسال علي المهندس ابراهيم ده المسئول عن قطع الغيار وهو اللي هيقولك الدينامو موجود ولا لا ....بالتوفيق انشاء الله واي استفسار تاني تحت امرك..
يا استاذ سامح والله اخجلنا تواضعكم و تعاونكم معانا والله وجزاك الله عنا خيرا .
انا امبارح اتصلت بالخدمة المتنقلة عشان يمكن يجوا همه يعمولوهولي لاني سمعت انهم راحوا لناس قبل كدة .
المهم اتصلت بيهم رد عليه واحد اسمه المهندس باسم ، بجد راجل محترم اوي المهم قالي انا شاكك ان ممكن ميبقاش ده دينمو ممكن تروح تقيسلي شنح الدينمو عند اي حد بتاع بطاريات واتصل بيه تاني قولي كام الرقم بالضبط.
قمت رايح علطول لواحد بتاع بطاريات و اول ما رحتله قالي ايه ده القرايه 12.70 ده انت كدة الدينامو فاصل قلتله متاكد قالي اه فقمت طافي و مدور تاني قالي اهه بقولك 12.70 كدة مفيش شحن و شوية ولقاها وصلت ل 14 قالي ايه ده غريبة كدة في شحن بطل تاني كدة و دور 14 برده عاملناها بتاع 5 او6 مرات قالي كدة في شحن فنادى صاحب المحل و ساله قاله لا كدة مفيش حاجة في الدينامو و لمبة البطارية بترعش بطريقة مش مظبوطة ممكن يكون سلك ملمس و لا حاجة و المشكلة ان اللمبة بترعش كدة اول ما ادور بعد ما امشي بشوية خلاص تختفي و لا كان في اي حاجة .
المهم اتصلت بالبشمهندس و قلتله اللي حصل قالي لو في اي حاجة في الدينمو هتبقى القراية اقل من 12 اما انت كدة حتى لما الراجل قالك الدينمو مش شغال كدة برده انت في السليم قلتله طيب دولقتي حضرتك مش عندك يدنمو و نغيره ونخرج من اي مشاكل قالي والله انا معنديش في الخدمة المتنقله و احنا فعلا لو عندنا بنروح نغيره للناس بس مش عندي دولقتي ممكن كمان اسبوع ولا حاجة يبقى معايا قلتله طيب انا مقلق العربية تقف مني ولا حاجة قالي لو حصل كدة كملني و انا هتصرف و متقلقش واحنا تخت امرك و كلمتين حلوين كدة و قالي انهما شغالين من 8 الصبح ل8 بالليل و قريب هنبقى 24 ساعة .
كان سالني في اي علامات للدينمو يعني الكهربا بترعش او النور بيرعش او اي حاجة غريبة في العربية قلتله مفيش اي حاجة غريبة خالص الا اللمبة ديه و ساعة ما ادور و بعد كدة بشوية بتختفي و بتنور بطريقة مش ثابته يعني اللمبة بترعش برده .
انا ساكن في التجمع و شغلي في مدينة نصر فبفكر اروح صيانة جسر السويس يوم السبت و اخليهم يقلولي ايه اللمبة ديه و لا انت ايه رايك برده .
اسف على الاطالة لكن انا حبيت انقل التجربة ديه يمكن حد يستفيد منها .
لازم يا باشا حضرتك تروح وتكشف في التوكيل افضل عشان تكون مطمن احسن ما تفصل منك لا قدر الله في اي مكان انا الحمد لله لما فصلت مني كانت تحت البيت.....واحسن لحضرتك تروح ابو غالي طومانباي وهناك تسال علي المهندس ياسر وقوله عاوز اكشف علي الدينامو وده من غير حجز ولا اي اتصال سابق......وابقي طمني...بس خد بالك هما اجازة خميس وجمعة
معلش الوصقة السحرية بتاعت الطريق لو سمحت عشان انا لسة ساكن في القاهرة جديد .
و حضرتك رشحت طومان باي ده عشان الزحمة مثلا و لا الحجز ولا يعني ممكن الاقي الدينمو عنده لو طلع بايظ.
بص يا باشا مش هتلاقي دينامو في اي مركز الا المركز الرئيسي او اللي بعد البوابات....ومركز ابو غالي مش بيبقي زحمة الا كل فين وفين بس حضرتك هتدخل المركز وتقوله عاوز اعرف اللمبة دي بتاعت ايه وتعمل مش عارف ان فيه مشكلة في الدينامو وهو هيكشفلك علي الدينامو وهيقولك المشكلة فين بالظبط...بالنسبة للطريق حضرتك هتنزل النازلة بتاعت ميدان لبنان المهندسين وتطلع المحور وهتنزل اول نازلة اسكندرية الصحراوي هتفضل ماشي مع الطريق لحد ما تعدي البوابات وبعدها بشوية مش كتير هتلاقي التوكيل عاليمين....وبالنسبة لمركز ابو غالي طومانباي خضلاتك قولي ساكن فين بالظبط عشان اوصفلك توصله ازاي و يارب اقدر افيدك انشاء الله..
بص يا باشا انا كلمت طومان باي و سالتهم على الدينمو و بعد فترة قالولي موجود ان شاء الله و قالولي برده انه بالحجز و اول ميعاد فاضي يوم الثلاثاء .
انا ساكن في التجمع الخامس يعني ممكن انزل نزلة طريق مصر السويس و اروح مصر الجديدة .
معلش تعبناك معانا يا استاذ سامح.
الحمد لله غيرت البطاريه بس طلع عينى شويه بس الحمد لله روحت اغيرها قال معلش هتيجى بكره عشان مش موجوده قولتله ازاى انا جيلك من مشوار قال خلاص هختملك وروح محل ود ابو اسماعيل للبطاريات روحت قالو معلش اخر اتنين غيرناهم m11امبارح قولت لا مش هينفع غير الخناق روحت راجع تانى قولتله شوفلى حل شوفتو البرود قال خلاص انا فى محل تانى عنده بطاريه واحده بس قافل ان شاء الله هبعت تاكسى مخصوص يجبهالك قولتله ايه ياعم ده امال توكيل ازاى وبعدين تاكسى ايه ياعم بقوللك جاى من مشوار ياعنى سايب كل شغلى وجاى شوفلى حل تانى انا مش ماشى غير ماتشوفلى حل قال خلاص هديلك بطاريه تمشيك لحد ماتيجى قولت ماشى قال روح انده اللسطه عشان يفك البطاريه بدردش مع اللسطه بقوله ينفع توكيل مفهوش بطاريه قال ازاى تعاله دخلنا لقينه مجهز البطاريه اللى هتمشينى لقيت اللسطه بص كده جنبه كان فى صف بطاريات قال دى تمشى عنده رد عليه انت متاكد قال الفرق بس الموجب والسالب عكس بعض قال ياعم تنفع عندك سلك البطاريه كبير والحمد لله ركبت البطاريه ةبقت تمام ----فعلا زى البرنامج بيقول يبقى انت اكيد فى مصر--------شكرا يااخ سامح على المتابعه مش عارف اقول لحضرتك ايه واسف على الاطاله
لا ياباشا انا تحت امرك في اي حاجة واي استفسار احنا اخوات كلنا ...ومبروك البطارية الجديدة
انا رحت امبارح مركز طومان باي عشان موضوع الدينمو و كنت مش حاجز قعدوا يقلولي مينفعش و الحوارات ديه قلتلهم العربية هتطفئ مني و لمبة البطارية بتنور و كان النور ابتدى يضعف يعني خلاص العربية على مشارف الوقوف فقالولي طيب كلم المدير فدخلت و كلمت المدير قالي انا معنديش مشكلة ادخل العربية بس انا معنديش قطع غيار خالص للام 11 فالعربية هتقعد من اسبوع لاسبوعين لحد ما المركز الرئيسي يبعتهالنا قلتله طيب انا سالت يوم الخميس قالولي ان الدينمو موجود قالي ازاي انت متاكد قلتله والله قالولي موجود فاتصل بالمخزن فقالوله موجود ياباشا فقالي خلاص دخلها بس معتقدش هتستلمها انهرده ممكن تقعد يوم ولا اتنين قلتله هيه لسة دخلت حضرتك عشان تقول كدة خلينا ندخلها و نشوف فيها ايه الاول بعدين نشوف قالي خلاص تمام .
الكلام ده كان الساعة 8:45 فقعدت مستني لحد الساعة حوالي 12:40 قالولي العيب طلع دينمو و احنا بس هنستنى موافقة المركز الرئيسي عشان نغيرهولك على الضمان و خصوصا ان انت عامل صيانتك في بورسعيد قلتله بورسعيد ايه انا عاملها في مركز الاهرام و طلعتله البورشور بتاع ابو الفتوح والمركز مكتوب من المراكز المعتمدة قالي خلاص يبقى هيبوفقوا يغيروه على الضمان بس لازم تستنى لبكرة عشان همه انهرده قافلين قلتله طيب هوه سعره كام عشان لو كان حاجة بسيطة كنت غيرته و خلصت قالي سعره 800 جنيه قلتله 800 ايه انت متاكد قالي اه والله سعره 800 جنيه قلتله لا هستنى بقة لحد ما المركز الرئيسي يرد .
ده اللي حصل معايا امبارح و انا مستني المركز الرئيسي اللي قافل يوم السبت ده يرد عليهم و ربنا يستر .
و بعدين دينمو ايه اللي ب 800 جنيه اناعمري ما سمعت على دينمو بالسعر ده
على العموم ربنا يهديهم و يحلولنا الموضوع ده على خير .
زي الفل يا باشا كدة خليك وراهم بقي بسحضرتك مفروض مكنتش مشيت من هناك الا لما الدينامو يركب ومفيش توكيل بيقفل السبت بس هما شكلهم بيعملوا حوار عموما برده خليك وراهم احسن ما تروح المركز الرئيسي...وابقي طمنا عليك وفعلا الدينامو سعره كدة جديد انا لما غيرته لقيت الفاتورة سعره فيها 800 ج
انا كلمتهم انهرده مرتين الساعة 11 قالي لسة مردوش كملنا بعد الظهر فكلمتهم قالي برده لسة مردوش اصل معلش انهرده اول يوم شغل ليهم قلتله خلاص اكلمك كمان ساعة قالي لأ خليها بكرة بقة لان انا اول ما يردوا هركبه و اكلمك قلتله بكرة ايه انت متعرفش انا متعطل ازاي من غير عربية قلتله هكلمك على الساعة 4 تاني .
مش عارف همه بيماطلو ليه كدة ربنا يهيديهم يا رب.
كلمتهم ثالث مرة برده قالولي لسة المركز الرئيسي مردش قلتلهم طيب اعمل ايه طيب انا دولقتي قالولي ما هوه الرد بيجي في خلال 72 ساعة فيعني استنى يومين و نشوف، قلتله ازاي يعني مفيش يعني تليفون حد يكلمهم قلتله هكلمهم طيب انا قالي براحتك عاوز تكلمهم كلمهم همه مركز ابو رواش .
فكلمت ابو رواش ووصلوني بمسؤول الضمان رد عليه شخص محترم جدا جدا و اخد بياناتي و قالي انا بعت الرد من بدري و قالي ازاي لسة مخلصتش العربية لحد دولقتي كلمني كمان 10 دقايق وانا هكلمهم فكلمهم فعلا و كان الايميل موصلش برده مش عارف ليه و قالي خلاص ان شاء الله كدة مفيش مشكلة و روح بكرة استلم عربيتك و الراجل قعد يقولي ده حقك و لازم تخده وانا بحاول ارد في نفس اليوم بسرعة عشان الناس متتعطلش حرام انا عارف يعني ايه الواحد واقف من غير عربية بصراحة راجل محترم جدا .
فربنا يهيديهم و هروح بكرة الصبح اشوف ايه الاخبار و اوافيكم بالتفاصيل لاحقا.
والله انا مش رغاي خالص بس حاسس ان اللي بمر بيه انا دولقتي هيحصل لمعظم الناس اللي معاها ام 11 فعشان كدة بنقل ايه اللي خصل معايا بالضبط يمكن حد يستفيد من التجربة ديه و الموضوع يكون سهل عليه .
و ربنا ما يصيب حد بشر ابدا و يحفظنا و يحفظ عربياتنا من اي مكروه.
رحت انهرده زي ما كان بتاع الضمان قالي امبارح عشان اشوف ايه اخبار العربية و الدينمو المهم وصلت لقيت العربية وقفة في الصف بتاع استلام العربيات(الكلام ده الساعة 9 الصبح) فسالتهم قالولي العربية خالصة و حضرتك اتفضل استلم وقاموا زقوا العربية زقه كدة و دوروها و سابوها بتاع نص ساعة دايرة عشان الدينمو الجديد يشتغل و استلمت العربية بفضل الله و حمده .
المهم المهندس اللي هناك بيقولي انت حصل معاك معجزة انك تيجي تلاقي الدينمو عندنا لانه اصلا مش موجود و قليل و بعدين انت كدة متعتبرش اتاخرت خالص انت كدة في السريع جدا مجرد ما الموافقة جت الدينمو خلص علطول و الموضوع مخدش يوم يعني و قالولي اي حاجة تطلع في العربية نحت امرك و متقلقش و ده حقك و كلمتين حلويين برده في الاخر .
سالته طيب البطارية ايه اخبارها قالي تمام و لو كان فيها حاجة كنا غيرناها على الضمان قلتله مش انتوا كاتبين ملكوش دعوة بالبطاريات قالي لا لو المشكلة بطارية من الاول لكن ده المشكلة دينمو وهوه اللي بوظ البطارية لكن الحمد لله عندك البطارية تمام.
في كام حاجة انا كنت اسات الظن فيهم :
1. ان الدينمو مش ب 800 جنيه وهمه بيشتعلوني عشان يعطلوا العربية ولكن ده سعره في كل مكان .
2. ان المركز الرئيسي قافل يوم السبت وهوه فعلا المركز مش قاقل يوم السبت لكن قسم الضمان هوه اللي قافل لاني لما كلمت الراجل اللي هناك قالي لوحده اصل امبارح كان اجازة .
3. ان الراجل كل ما اتصل بيه يقولي المركز الرئيسي لسة مبعتش و انا فكرته مكسل يبص طلع المركز كان فعلا بعت بس موصلش لسبب ما فبعت تاني و المشكلة خلصت الحمد لله يعين الراجل مكنش بيكذب عليه و يماطل و خلاص.
طبعا كلها تيسرات بفضل الله تعالي و انا مبسوط مش مدايق خالص منهم و حاسس انهم طلعوا في الاخر ناس محترمين و لكن الكلام اللي انا كنت بسمعه وحش عن اي مركز صيانة لابو الفتوح خلاني اسئ الظن فيهم في اي حاجة و ربنا يغفرلنا و يرحمنا و يصرف عنا اي سوء .
و اسف على الاطالة
مباركة عليك ان شاء الله و لا تعطل تاني :)
ربنا يبارك فيك يا هيما و يحفظك من كل شر .
معلش انا كنت قريبت انك صلحت الدينمو و عمل معاك الحركة الشهيرة بتاعته ديه.
مش عارف حاسس ان حقك انهم يركبولك واحد جديد برده حتى لو الدنيا شغاله معاك تمام.
يعني همه مشكورين انهم صلحوه و معطلكش بس المفروض ده يكون حل مؤقت لحد ما الدينموا الجديد يجي ولا انت رايك ايه برده في الكلام ده .
والله هما قالولي يوم الاحد نركب الجديد .... بس انا اللي كنت مستعجل ....
و كدة كدة طقم الشربون يعتبر مستهلكات "بس السخافة انه خلص بسرعة" و لما اخرج و اخلص الضمان اكيد مش هشتري دينامو ... لا طبعا هغير الشربون عند اي كهربائي برة ب 20 جنيه
و طالاما انت عارف و مقتنع و مبيتضحكش عليك يبقي متفرقش ...
الحمد لله علي نعمه " العلم و راحة البال" و الحمد لله علي ما كان و ما سيكون ....
الموضوع عبيط خالص لو كنت تعرف بيتعمل ازاي :)
الموضوع ده حصل معنا البطاريات دى من ضمان منصور شيفورلية روح مركز خدمة رابعة العدويه هيدعو ا ان عربيتك فيها مشكله خزق عنيهم وخلى الواد الى هناك يكشف على البطاريه والعربيه شغاله علشان الجهاز الكحيان بتاعه يشتغل وخذ واحده جديده
لو بالخناق دول نصابين والله اعلم بس ده حقك انا غيرت البطاريه والحمد لله الدينامو ملوش اى دعوه وياريت تبلغنا بالتطورات
والله نفس الى حصل بس اعطانا واحده جديده وقال تماشيكم وانا هكشف على القديمة وتيجو بعد 3 ايام طبعا اخذ الضمان علشان يضمن اننا نيجى ورحنا له فى الميعاد البيه بظرفه قال ده لسه مكشفتش عليها قلنا له خليها لك قال مش هعطيكم ضمان الجديده قلنا له اشربه بالهنا والشفاء يظهر ان فى لعب بموضوع البطاريات دى !!!!!!!!!!!!!!؟اقتباس:
المشاركة الأصلية كتبت بواسطة aftr
فى رابعه العدويه يتم التغير وانت واقف روحوا للاخ اسامة من 9 : 5 يومياً انا غيرت البطارية اليوم وبالتوفيق للجميع ..