الموضوع: استفسار للمهندس محمد ممدوح بخصوص فرامل السكاكين للانوس

السلام عليكم ورحمة الله

سؤال للمهندس محمد ممدوح استشاري قسم الدايو والكوري

انا متابع لمواضيع حضرتك في المنتدى وكنت شفت كذا موضوع عن تحويل فرامل اللانوس لسكاكسين بس بصراحه مش فاهم يعني ايه فرامل سكاكسن وسألت الميكانيكي الي كان بيشتغل في عربيتي القديمه عنها قالي معرفهاش

فا كنت عايز استفسر من حضرتك على كذا حاجه ويارب مكونش بضايق حصرتك
اول حاجه
هوه يعني ايه فرامل سكاكسن وهل فعلا بتفرق فرق كبير جدا عن فرامل اللانوس المشهوره ولا الفرق مش كبير فا اقدر اعتمد على الفرامل العاديه بتاعتي؟؟ علما بأن انا سواقتي هاديه ومش من هواة الغرز والفرامل الفجائيه بس عايز اعملها احتياطيا

تاني حاجه
هل التعديل ده هيبقى متعب لما اجي اغير التيل او الماستر او الطنابير او اي حاجه في العفشه الاماميه ولا عادي كله هيبقى موجود وسهل اي حد يعمله بعد التعديل؟؟ علما برضه ان معلوماتي عن عفشة العربيه تعتبر زيرو كبيري ابص على زيت الموتور.

تالت حاجه واهم حاجه
انا من النوع الحريص جدا على العربيه وطبعا الفرامل مفيش فيها هزار فا في حد معين تقدر ترشحهولي اعمل الموضوع ده عنده ويكون قريب من مدينة نصر والتكلفه بتبقى كام تقريبا

ومشكور مقدما على جميع المواضيع الهامه والاساسيه الي علمتني حاجات كتير جدا في العربيه انا مكنتش اعرفها


محمد عادل