الريموت وقع على الارض وبعدها ما أشتغلش برجاء الافاده ممن حدثت لهم نفس المشكله

**semsem8100** · 19-09-2010 10:54 PM

الريموت وقع على الارض بس وقع من أيدى وأنا وأقف بشترى حاجه وقعه عاديه مش جامده زى أى مفتاح ممكن يقع من أيدك أو من جيبك وأنت بتطلع أى حاجه يعنى مش أرتطام جامد بالارض أو من مكان مرتفع وبعدها على طول فتحت الشنطه منه مرتين وبعد جيت أفتح العربيه حلف ماهو شغال فكيته وشلت البطاريه وركبتها تانى قلت يمكن البطاريه معلقه برده مفيش غيرت البطاريه بوحده نفس الفولت بس مش سانيو زى اللى راكبه كانت باناسونيك وبرده مش شغال لا شنطه ولا أبواب ولا أى حاجه يعنى مش معقول الريموت يقع على الارض وقعه خفيفه يقوم يبوظ وعلى فكره اللمبه بتاعه الانذار شغاله عادى بعد ما بقفل بالمفتاح .. برجاء الافاده وهل يمكن أصلاحه بالتوكيل ولا كده باظ ويتكلف كام العربيه يدوب عامله 6500 كيلو .. برجاء الافاده ولكم جزيل الشكر ،،

**Bishoy.Girgis** · 19-09-2010 11:20 PM

هقولك علي حاجه جربها و ان شاء الله هتنفع .. بس تقولنا علي النتيجة علي طول .. اوك
روح دلوقتي افصل كابلات بطارية العربية نفسها و ركبها تاني و ان شاء الله الريموت هيشتغل
و اي خدمة

**waelali77** · 20-09-2010 10:08 PM

وأنا كنت قرأت في الكتالوج إن في طريقة لعمل Reset لنظام النانتس NANTS
Nissan Anti thief System الموجود في العربية ممكن حضرتك تجربة كمان بعد فكرة الأستاذ Peaceman
وإن شاء يطلع موضوع بسيط ؛
وما تنساش تطمنا

**waelali77** · 20-09-2010 10:11 PM

أسف على الخطأ الغير مقصود ؛ ولو الكتالوج مش متوفر عندك قولي وأنا أوضحهولك إن شاء .

**semsem8100** · 20-09-2010 10:13 PM

شكرا لأعضاء المنتدى الكرام .. الريموت أشتغل بعد ما عملت زى ما حضراتكو أفادونى فصلت الكوابل من البطاريه السالب والموجب وركبتهم تانى بعد دقيقتين بعدها الريموت أشتغل على طول ولو أنى لحد دلوقتى مش عارف أيه الفكره بس شكرا ليكو وفرتولى مشوار لحد التوكيل

**Bishoy.Girgis** · 20-09-2010 10:20 PM

اي خدمة يا استاذ سمسم و حضرتك لو في اي حاجه قولنا و احنا كلنا بنحاول نساعد بعض علي اد ما بنقدر و الحمدلله انها جاءت في حاجه بسيطة و اي خدمة
الفكرة تكمن في اعادة توليف الريموت على جهاز الانذار لأنه يظهر ان التوليفة حصل فيها حاجه لما الريموت وقع منك فنعملها اعادة ضبط مصنع بفصل البطارية