ازاي اروح دريم بارك من المعادي وارجع

**ahmed_ahmed** · 19-09-2010 11:20 PM

عايز اعرف ايه اقصر واسرع من المعادي لدريم بارك بعربيه

بلاش كوبري اكتوبر ياريت الدائري بس ازاي والمسافه كام كيلو وتاخد قد ايه اقصي تقدير وارجع ازاي

**ahmed_mido1889** · 20-09-2010 11:47 AM

الدائري هتطلعه من عالكورنيش في اتجاه الهرم
هتمشي لحد المريوطيه هتخليك في اقصي الشمال لحد لما تطلع الوصله الجديده السرعه عالوصله الجديده 80كم/س
هتكمل فيه هتنزل النزله اللي في اخر الوصله دي اللي عالشمال
هتمشي عالجزء التاني من الدائري هتلاقي في 3 طرق خليك اللي في النص هتمشي لحد الاخر هتلاقي نفسك علي طريق الواحات وهتلاقي دريم بارك علي يمينك
هتاخد بتاع 35 كيلو من المعادي لحد دريم بارك وبالنسبه للوقت حوالي 30 دقيقه او 35

**ahmed_ahmed** · 20-09-2010 03:17 PM

المشاركة الأصلية كتبت بواسطة ahmed_mido1889

الدائري هتطلعه من عالكورنيش في اتجاه الهرم
هتمشي لحد المريوطيه هتخليك في اقصي الشمال لحد لما تطلع الوصله الجديده السرعه عالوصله الجديده 80كم/س
هتكمل فيه هتنزل النزله اللي في اخر الوصله دي اللي عالشمال
هتمشي عالجزء التاني من الدائري هتلاقي في 3 طرق خليك اللي في النص هتمشي لحد الاخر هتلاقي نفسك علي طريق الواحات وهتلاقي دريم بارك علي يمينك
هتاخد بتاع 35 كيلو من المعادي لحد دريم بارك وبالنسبه للوقت حوالي 30 دقيقه او 35

معلش استحملني اطلع الدائري ازاي ؟ انا معرفش غير اوصل لصقر واخد اليوترن وامشي ع الاتوستراد في اتجاه مدينه نصر واخوش يمين اطلع ع دائري في اتجاه القاهره الجديده اطلع ف اتجاه الهرم ازاي

مش فاهم ايه وصله جديده ده اعرفها منين واعرف منين انها خلصت وهل نزله الشمال ده اول نزله ولا في قبلها؟

وانا راجع بقي ارجع ازاي؟

**Sh_sunsea** · 20-09-2010 03:30 PM

وانت على الاوتستراد فوت طلعة الدائري الي بتطلعك على القاهرة الجديدة هتلاقي طلعة تانية بعد الدائري مباشرة - هتتطلعك الدائري في الاتجاه العكسي الي هو اتجاه المنيب والمريوطية

زي ما أحمد قالك - هاتفضل ماسك شمالك لحد ما تلاقي نفسك طلعت زي كوبري فوق الدائري (دي وصلة المريوطية الجديدة) - وفي آخرها مخرجين يمين وشمال - خليك شمال برضه هاتنزل على الدائري تاني - المتجه لاكتوبر واسكندرية الصحراوي

تفضل ماشي - لا تنزل يمين - ولا تنزل شمال - لحد ما تلاقي الدائري خلص - هتلاقي دريم بارك على يمينك مباشرة

**Sh_sunsea** · 20-09-2010 03:33 PM

وانت راجع بقى - هاتطلع من دريم بارك تاخد أول U-turn وتمشي تروح واخد برضه أول U-turn - هايبقى كأنك راجع دريم بارك تاني - بس قبها هتلاقي مطلع الدائري يمينك الي انت كنت لسه جاي منه

هاتفضل ماشي وبرضه ما تنزل ولا منزل يمين - لحد ما تلاقي وصلة المريوطية واضحة جدا كوبري بالعرض فوق الدائري بالكامل - هاتروح داخل يمين فتطلعها - تنزل منها الناحية التانية على الدائري المتجه للكورنيش والمعادي والاوتوستراد - هاتبقى سهلة ساعتها مافيهاش لخبطة