الموضوع: إنفراد وحصريا تصميم دائرة غلق نور الصالون خدمة لأعضاء نايل موتورز

إنفراد وحصريا تصميم دائرة غلق نور الصالون خدمة لأعضاء نايل موتورز

-فكرة عملها-

الدايرة هى دايرة تاخير طفى نور الصالون مدة 7 الى 8 ثوانى و تنفع لاى عربية . بس غالبا هتحتاج لعب فى الضفيرة او حسب نوع العربية و المكان المناسب لوضعها . فى اللانوس لازم تتحط تحت عند علبة الفيوزات دا مثلا للانوس . و راكبة عندى و شغالة تمام فى اللانوس

عموما طبعا شكرى لمن قام بعمل الموضوع سابقا و طريقة الدائرة نفسها بس لاحظت ان الموضوع نام من كام شهر ففتحتة تانى للى يحب . التركيب طبعا عند كهربائى و هكتب على كل سلك يروح فين عشان تكون واضحة للكهربائى

تكلفة عمل الدايرة تقريبا لسة مش متاكد هتكون من 25 الى 30 جنية لسة عاوزة حسبة { خامات و انتقالات و مصنعية رمزية }

الموضوع الاصلى هنا

http://www.nilemotors.net/Nile/107714-delay.html

و هنا النتيجة النهائية :

http://www.nilemotors.net/Nile/111915-delay.html

الخامات المطلوبة لعمل الدائرة الكهربائية كما فى الصورة :

1- ريلاى 12 فولت dc خمسة رجل

2- موسفيت irf46n . او buz71 او irfz44n

3- مكثف 10 ميكروفاراد 25 او 35 او 50 فولت متفرقش . دا بيعمل ديلاى 7 ثوانى اللى عاوز مدة اكبر يحط 100 ميكرو فاراد او 220 ميكرو مع مراعاة ان حجم المكثف بيزيد

4- مقاومة 56 اوم

5- مقاومة 560 كيلو اوم





الخطوة الاولى :

نمسك الريلاى من جهة الثلاث اطراف زى الصورة و نلحم سلك مثلا لونة بنى و دا هيوصل على ارضى الازرار

الخطوة الثانية :
الرجل الوسطى مع الرجل الاخيرة نتنيهم على بعض و نلحم سلك احمر عليهم ودا هيكون كهربا مباشر

اللى يحب ممكن يحط فيوز زجاجى الحجم الصغير 1 امبير او واحد و نص امبير على سلك الكهربا يبقى احسن و طبعا تشترى مع الفيوز الجراب بتاعة



الخطوة الثالثة :

زى الصورة هنجيب المكثف و المقاومة ال 56 اوم و نربطهم ببعض و نلحمهم و ناخد بالنا من علامة الناقص اللى على المكثف بعد كدة هنحتاج نبص على العلامة دى



الخطوة الرابعة :

زى الصورة بالظبط هنجيب الموسفت و نحط علية اللى لسة عاملينة و ناخد بالنا ان العلامة الناقص تكون على الرجل اليمين للموسفت و نلحمهم على الموسفت



الخطوة الخامسة :

برضة زى الصورة هنلحم سلك مثلا لونة اصفر فى الرجل الوسطى للموسفت و دا هيروح لارضى الازرار

و فى الرجل اليمين هنلحم سلك مثلا اسود و دا هيكون ارضى مباشر



الخطوة السادسة :

زى الصورة و دى اهم خطوة . هنلحم الرجل الشمال من الموسفت مع الرجل الشمال للريلاى

ملحوظة

الرجل اليمين فى الريلاى مش بيتوصل عليها حاجة فاضية



طبعا ناخد بالنا ان مفيش حاجة تلمس مع التانية . و نلف شريط لحام على كل الاجزاء .

كدة هيكون عندنا 4 سلوك :

1- سلك بنى ارضى الابواب

2- سلك احمر كهربا مباشر

3- سلك اسود ارضى مباشر

4- سلك اصفر رايح للمبات

*طبعا ناس هتسال عن طريقة التركيب نرد عليهم بس احسن حد يكون فاهم كهربائى يعنى عموما للى عاوز يعرف :

طبعا الارضى المباشر و الكهربا المباشر دى معروفة

هندور على سلك الارضى اللى رايح للمبات فى الضفيرة تحت و هنقطعة و هنوصل السلك البنى ناحية السلك اللى جاى من الازرار و السلك الاصفر ناحية السلك اللى رايح للمبات بس خلاص .

ملحوظة :

كل الحاجات دى موجودة عند النخيلى فى باب اللوق ما عدا الريلاى عند الجمال برضة فى باب اللوق

حاجة مهمة :

الاخوة اللى عندهم انذار فى العربية ممكن الديلاى يعمل مشكلة . فى حالتين للتوصيل :

الحالة الأولي:

لو وصلت السلك الاصفر و سلك ارضى الانذار بعدية لو قفلت العربية قبل ال 7 ثوانى هيديك ان فى باب مفتوح . الحل لازم تستنى ال 7 ثوانى و بعدين تقفل

الحالة التانية:

و دى الصح فى التوصيل انك توصل سلك الارضى بتاع الانذار مع السلك البنى اللى جاى من الازرار مباشرة

طبعا الوان الاسلاك دى هى اللى كنت عاملها فى الشرح و كل واحد حر يحط اللون اللى يعجبة بس يعرف دا بتاع اية و دا بتاع اية. يفضل 4 الوان مختلفة طبعا الاحمر و الاسود دول اساسى مع اى لونين تحبهم

*و للعلم فى مكثف تانى 33 ميكرو ممكن دا يدى من 25 الى 30 ثانية . انا مجربتش المدة بس تقريبا . للى يحب مدة اطول

*بالتوفيق للجميع و اى استفسار اسالوا*

---------------------------------------------------
مجهود متميز جدا من العضو
تم التعديل بواسطتي للإفادة العامة
مشرف القسم ب10
15-9-2011