إنفراد وحصريا تصميم دائرة غلق نور الصالون خدمة لأعضاء نايل موتورز
إنفراد وحصريا تصميم دائرة غلق نور الصالون خدمة لأعضاء نايل موتورز
-فكرة عملها-
الدايرة هى دايرة تاخير طفى نور الصالون مدة 7 الى 8 ثوانى و تنفع لاى عربية . بس غالبا هتحتاج لعب فى الضفيرة او حسب نوع العربية و المكان المناسب لوضعها . فى اللانوس لازم تتحط تحت عند علبة الفيوزات دا مثلا للانوس . و راكبة عندى و شغالة تمام فى اللانوس
عموما طبعا شكرى لمن قام بعمل الموضوع سابقا و طريقة الدائرة نفسها بس لاحظت ان الموضوع نام من كام شهر ففتحتة تانى للى يحب . التركيب طبعا عند كهربائى و هكتب على كل سلك يروح فين عشان تكون واضحة للكهربائى تكلفة عمل الدايرة تقريبا لسة مش متاكد هتكون من 25 الى 30 جنية لسة عاوزة حسبة { خامات و انتقالات و مصنعية رمزية } الخامات المطلوبة لعمل الدائرة الكهربائية كما فى الصورة : 1- ريلاى 12 فولت dc خمسة رجل
2- موسفيت irf46n . او buz71 او irfz44n
3- مكثف 10 ميكروفاراد 25 او 35 او 50 فولت متفرقش . دا بيعمل ديلاى 7 ثوانى اللى عاوز مدة اكبر يحط 100 ميكرو فاراد او 220 ميكرو مع مراعاة ان حجم المكثف بيزيد
4- مقاومة 56 اوم
5- مقاومة 560 كيلو اوم http://img844.imageshack.us/img844/7648/11abcd0005.jpg الخطوة الاولى : نمسك الريلاى من جهة الثلاث اطراف زى الصورة و نلحم سلك مثلا لونة بنى و دا هيوصل على ارضى الازرار الخطوة الثانية : الرجل الوسطى مع الرجل الاخيرة نتنيهم على بعض و نلحم سلك احمر عليهم ودا هيكون كهربا مباشر
اللى يحب ممكن يحط فيوز زجاجى الحجم الصغير 1 امبير او واحد و نص امبير على سلك الكهربا يبقى احسن و طبعا تشترى مع الفيوز الجراب بتاعة
http://img718.imageshack.us/img718/7545/22abcd0008.jpg الخطوة الثالثة : زى الصورة هنجيب المكثف و المقاومة ال 56 اوم و نربطهم ببعض و نلحمهم و ناخد بالنا من علامة الناقص اللى على المكثف بعد كدة هنحتاج نبص على العلامة دى http://img80.imageshack.us/img80/5250/33abcd0009.jpg الخطوة الرابعة : زى الصورة بالظبط هنجيب الموسفت و نحط علية اللى لسة عاملينة و ناخد بالنا ان العلامة الناقص تكون على الرجل اليمين للموسفت و نلحمهم على الموسفت http://img196.imageshack.us/img196/4618/44abcd0011.jpg الخطوة الخامسة : برضة زى الصورة هنلحم سلك مثلا لونة اصفر فى الرجل الوسطى للموسفت و دا هيروح لارضى الازرار
و فى الرجل اليمين هنلحم سلك مثلا اسود و دا هيكون ارضى مباشر http://img638.imageshack.us/img638/169/555abcd0013.jpg الخطوة السادسة :
زى الصورة و دى اهم خطوة . هنلحم الرجل الشمال من الموسفت مع الرجل الشمال للريلاى
ملحوظة الرجل اليمين فى الريلاى مش بيتوصل عليها حاجة فاضية http://img20.imageshack.us/img20/9899/66abcd0012.jpg طبعا ناخد بالنا ان مفيش حاجة تلمس مع التانية . و نلف شريط لحام على كل الاجزاء . كدة هيكون عندنا 4 سلوك : 1- سلك بنى ارضى الابواب
2- سلك احمر كهربا مباشر
3- سلك اسود ارضى مباشر
4- سلك اصفر رايح للمبات *طبعا ناس هتسال عن طريقة التركيب نرد عليهم بس احسن حد يكون فاهم كهربائى يعنى عموما للى عاوز يعرف : طبعا الارضى المباشر و الكهربا المباشر دى معروفة
هندور على سلك الارضى اللى رايح للمبات فى الضفيرة تحت و هنقطعة و هنوصل السلك البنى ناحية السلك اللى جاى من الازرار و السلك الاصفر ناحية السلك اللى رايح للمبات بس خلاص . ملحوظة :
كل الحاجات دى موجودة عند النخيلى فى باب اللوق ما عدا الريلاى عند الجمال برضة فى باب اللوق
حاجة مهمة : الاخوة اللى عندهم انذار فى العربية ممكن الديلاى يعمل مشكلة . فى حالتين للتوصيل : الحالة الأولي:
لو وصلت السلك الاصفر و سلك ارضى الانذار بعدية لو قفلت العربية قبل ال 7 ثوانى هيديك ان فى باب مفتوح . الحل لازم تستنى ال 7 ثوانى و بعدين تقفل
الحالة التانية:
و دى الصح فى التوصيل انك توصل سلك الارضى بتاع الانذار مع السلك البنى اللى جاى من الازرار مباشرة
طبعا الوان الاسلاك دى هى اللى كنت عاملها فى الشرح و كل واحد حر يحط اللون اللى يعجبة بس يعرف دا بتاع اية و دا بتاع اية. يفضل 4 الوان مختلفة طبعا الاحمر و الاسود دول اساسى مع اى لونين تحبهم
*و للعلم فى مكثف تانى 33 ميكرو ممكن دا يدى من 25 الى 30 ثانية . انا مجربتش المدة بس تقريبا . للى يحب مدة اطول *بالتوفيق للجميع و اى استفسار اسالوا*
---------------------------------------------------
مجهود متميز جدا من العضو
تم التعديل بواسطتي للإفادة العامة
مشرف القسم ب10
15-9-2011