عديت أول 1000 كيلو بالسيراتو
-بعد حوالي شهر من استلام السيراتو أتميت الألف كيلو ،، أنا بشكل عام راضي تمام الرضا عن الفترة دي وربنا يديم الرضا ده علطول.
-أداء العربية جيد جدا ومرضي بالنسبة مع إنه مابيعجبش ناس كتيير ،، وأنا عموما مابحبش الحرق والجري.
-تكييف العربية ممتاز جدا جدا .
-العزل الصوتي بتاعها جيد جدا.
-طبعا النهاردة رحت عملت صيانة الألف كيلو على طريق مصر اسكندرية الكيلو 23 من اسكندرية ،، التعامل هناك أكتر من رائع وناس شيك وزوق جدا ،، أنا وصلت هناك 11.05 واستلمت العربية 12.10 ،، وخلال الساعة دي كنت قاعد في استراحة العملاء ،، مش عارف هل كل التوكيلات بالشياكة دي ،، لأني بصراحة أنا أول مرة أتعامل مع توكيلات العربيات ،، لأن كل العربيات اللي كنت بركبها قبل كده كان قديم في قديم.
- معظم الناس بتشتكي من عفشتها الناشفة ،، مش عارف أنا مش حاسس بالموضوع ده ليه؟؟!!
- العيب الوحيد اللي في العربية واللي كان مقلقني لحاد ما رحت الصيانة النهاردة هو إن العربية لما تكون محملة أربع أشخاص وعديت على مطب رخم شويه ممكن تحك حكه جامدة ،، الموضوع ده حصل معايا تلات أربع مرات خلال الفترة اللي فاتت ،، بس الحمد لله النهاردة في الصيانة طمنوني إنه مافيش حاجه حصلت.
أنا شكلي طولت عليكم ،، وأنا تحت أمركم في أي استفسار
