الموضوع: الفئران

أحنا بقى فيلتنا يحدها من جميع الجوانب فلل كل فيلا بجنينة وصحابهم قافلينهم ومسافرين وتخيلوا جحافل الفئران اللي ممكن تكون ساكنة في الفلل دي المهم جربت كل حاجة من مبيدات ولزقات وسموم وبالذات السم الأصفر الفاشل اللي بيتباع في الصيدلية دة حاجة متخلفة ولا بتحوق ولا حتى بتجيب مغص للفار ومش عارف أعمل أيه أي نعم الفئران مش بتدخل عندنا كتير يعني المعدل الطبيعي فار/3 شهور تقريباً ومقلكومش والدتي بتعمل أيه يعني بتترعب دي كلمة ماتوصفش شكلها لما نلاقي فار في البيت وبتقعد تعيط وطبعاً بتسيب الشقة اللي قاعدة فيها وتتطلع معايا فوق لمدة شهرين على الأقل يعني مأساة ورعب وتهجير لدرجة أننا بنفكر نسيب البيت ونهاجر فياريت لو حد يعرف أسم سم معين أو حد معين بيبيع سموم فعالة في أسكندرية أو أي طريقة يعني أنا من كتر ما غلبت فيهم بقيت بولع في المكان اللي مستخبين فيه وحارق لحد دلوقتي 3 دواليب مطبخ ومولع في بوتجاز يعني كان ممكن البيت ينفجر عشان فار .

المشاركة الأصلية كتبت بواسطة abogogo

بصراحة لم اجد حل لهذه المشكلة حتى الان هو فيه احتمال ان الواحد يجرب الشركات اللىبتنضف المنازل من الآفات هبقى اجربهم واقلكم على التجربة :lighten: ولو حد جرب الشركات دي ياريت يقولنا عن التجربة دي

بص يا فندم .. كان في اعلان بيجي في التلفزيون عن شركه بترش و كده مش فاكر اسمها افريقيا الالمانيه حاجه كده يعني المهم اتصلت بيهم جيه الراجل رش الشقه كلها 3 غرف و حمام و مطبخ بالبلكونه بتاعته و بيرش المراتب و الملل بتاعت السرير و تحت السراير و الدواليب و البلكونات و الملابس المركون في الدولاب و الغريب ان فعلا اللي بيرشه رحته بتفضل ساعتين بس وبعد كده بتروح و ملالي زجاجه 2 ليتر من المبيد اللى بيرشه و اداني قاتوره عليها ضمان 6 شهور لو اي حشره او فار دخل المنزل هيجي ويرش المنزل تاني مجانا لمده 6 شهور

انا كنت جايبه عشان النمل كان مجنني الصراحه و لما الناس مشيت فعلا قعد فوق ال8 شهور مشفتش دبانه ولا نموسه ولا نمله و فار و في صراصير اللى بتطير دي كان بيجي يدخل من الشباك ميكملش يا اما يطير بره او يقع قدام الشباك و الازازه ال2 ليتر دي حطيتها في بخاخه كده و بيقيت ارش منها على سور البلكونه و الشبابيك و بعدين في الاخر خلصت و ابتدي دلوقتي مثلا بشوف نمله او اتنين و دخل عندي فار واحد بس ده كله بعد الرش ب8 شهور او اكتر كمان

وكل ده كان ب140 و انا اديت الراجل اللى بيرش 10 جنيه كمان عشان يملي الازازه و اكراميه يعني عشان تعب و رش السجاد و رش كل حاجه يعني الحساب 150 و خدهم ومشي و دلوقتي بقلب البيت على الفاتوره عشان نمرة الشركه مش لاقيها و هموت و اجبهم تاني

المبيد بتاعهم كان شبه اللبن كده بس كان فظيييييييييع

المشاركة الأصلية كتبت بواسطة A.Saad

اللى مركب سلك على الشباك والفار بياكله
سلوك الشبابييك فيه استانلس
المونيوم
بلاستيك
صلب
ده المربعات الصغير اوى ده الفار بياكله عادى

فيه نوع بقى مش بيقدر ياكله بيكون خرومه اوسع شوية وعلى شكل معين مش مربع وبتلاقيه ناشف اكتر
عيبه انه بيسمح بدخول الناموس
لو حد عنده ناموس ممكن يركب الاتنين فوق بعض
بس كمية الهوا المارة من الشباك هتقل شوية

العضو الفاضل اللى ولاده بينسوا الشباك مفتوح والفئران بتدخل
ممكن يركب السلك فى اطار خشب ويثبته فى حلق الشباك
كدة هوة مش متحرك ومش هيتفتح

السلك الخفيف الرمادي أو الأسود ده كنت مركبه عندي والفئران أكلته فعلاً جربت بقى البلاستيك اللي قولت عليه شكل الفتحات فيه على شكل معين في منه ألوان ( أبيض - أخضر - برتقالي ) أنا جبت الأبيض عشان بيسمح بمرور ضوء أكبر من الألوان التانية وفعلاً ركبته على كل الشبابيك خاصة شبابيك المنور والجنينة ولكن ولاد اللذين لما لقوا مفيش أمل من الشبابيك دخلوا من الشفاطات بتاعة المطبخ والحمام بقوا بيزقوا الريش الحديد ويدخلوا يعني غصب وأقتدار المهم أنا عاوز أقضي على الفصيلة كلها يعني فكرت أرمي جبنة بالسم في الجنينة وفي مناور الفيلل اللي جنبي بحيث يموتوا كلهم بس السم هو المشكلة مفيش سم بيحوق فيهم .