استفسار عن الباور Hydraulic/Power Steering

**ahmedhossam86** · 21-09-2010 12:51 PM

شباب انا قريت كلام كتير عن هيدرولك السيراتو و انه مش بنفس مرونة و يسر الباور الكهرباء.. ممكن اعرف لأي حد الكلام ده ممكن يكون مظبوط؟

يعني انا معايا بيجو 405 هيدرولك بس الباور بتاعها بحسه تقيل و رخم.. جربت الباور بتاع الانترا لقيته زي المية ما شاء الله..

في حد حاسس انه تقيل.. محتاج مجانص و ترابيس؟؟

**ghost1900** · 21-09-2010 01:09 PM

حضرتك أنا معاى سيراتو SX وكيل (جنط 17) مش حاسس أن البور تقيل والكلام ده بالعكس هو متوسط وتلفه بأيد واحدة عادى ، حضرتك ممكن تجربه فى أى سيراتو وتحكم بنفسك.

**ghazy12** · 21-09-2010 01:11 PM

باور الالنترا كهرباء يا باشا مش هيدروليك... علشان كده كان خفيف معاك

الباور الهيدروليك مش بالصعوبه دي خالص على فكره...

الفكره ان في ناس بترتاح مع الكهرباء, و في ناس بتفضل الهيدروليك (انا واحد منهم)

الكهرباء طبعاً اخف من الهيدروليك, لكن الهيدروليك مش تقيل للدرجه دي
و بتحس بيه بس و انت واقف و بتحرك الستييرينج او بتركن مثلا,
غير كده ممتع جداا و خفيف و مافيهوش اي مشكله و لا صعوبه اطلاقاً...

يا رب اكون قدرت افيدك...

**M.ABDEEN** · 21-09-2010 01:21 PM

فعلا الباور الكهرباء اخف من الهيدروليك

**ALSHARIEF** · 21-09-2010 05:24 PM

الله ينور يا وحوش كيا كلام زى الفل و 100 100 .............بالنسبة للأخ العزيز المستفسر : بجد باور السيراتو بالنسبالى ممتع و جميل و مش تقيل و لا حاجة و أنا من أنصاره زى غازى باشا ( سلام عليكم يا باشمهندس إيه أخبار حضرتك ياريت تطمنى عليك) و بالنسبة للأعتمادية بحس إنه بالنسبالى أحسن من الكهرباء ( أصله كان أحد عناصر المقارنة بين السيراتو و الإلنترا قبل ما أجيب عربيتى و الحمد لله وفقنى الله لما يحب لى و يرضى )

تقبل مرورى أخى الكريم

**NoRmAl** · 21-09-2010 06:52 PM

هو الباور مش ممتاز لكن لا يرقى لدرجه أن الواحد يقلق منه أو حتى يتكلم عليه
أنا شايفه كان ممكن يبقى أفضل لكنه على حالته الان جيد جدا
دا بس دلع الصراحه :)

**modydosoki** · 21-09-2010 07:28 PM

اظن انه مش عيب يعني هوه اتقل شويه بس مع التعود حيبقي عادي هو الفرق بيبان والعربيه واقفه او بتركن انا شايف ان دي ميزه في الباور الكهربا لان دي متعه جامده اوي انا عندي في الالنترا بركن بصبع واحد لان البور الكهربا بيديك نعومه اوي علي السرعات البطيئه وبعد كده بيشد تدريجيا وجهات نظرا بس انا مش شايف يعني ان ده يبقي سبب لاختبار عربيه لان في الاخر الاتنين بور

**morasystem** · 22-09-2010 01:57 AM

يا باشا الإلانتر (هيونداى) و السيراتو (كيا) المفروض إن هم طالعين من نفس الشركة .... زمان لما نزلوا الإلانترا حطوا فيها باور كهربا و عفشة مالتى لينك و كانت و مازالت حرير و زى الفل بس تعالى كدة اركب الإلانترا و عدى ال 120 هتلاقيه مية .... بجد هتخاف جدا و انت سايقها .... لدرجة إنه السواقين بتوع المعارض بيشيلوا فيوز الباور من التابلوه لحد ما يوصلوا العربية للزبون .... جت بقى الشركة تنزل السيراتو راحوا منزلينها بالباور الهيدروليك و عفشة خلفية تورشن بيم ... علشان يدوك ثبات على السرعات العالية ... يعنى بالبلدى كدة هم محزمين السوق ... عايز عربية ثبات أكتر على الطريق موجود ... عايز عربية أطرى و أنعم مع المطبات و النقر جوة المدينة موجود ... و مش معنى كدة إن السيراتو ناشفة ولا الإلانترا بتحدف .... تقبل مرورى

**ahmedhossam86** · 22-09-2010 11:58 AM

شكرا يا شباب ان شاء الله لما استلمها يعجبني الباور بتاعها.. ألف شكر

**modydosoki** · 22-09-2010 04:39 PM

المشاركة الأصلية كتبت بواسطة morasystem

يا باشا الإلانتر (هيونداى) و السيراتو (كيا) المفروض إن هم طالعين من نفس الشركة .... زمان لما نزلوا الإلانترا حطوا فيها باور كهربا و عفشة مالتى لينك و كانت و مازالت حرير و زى الفل بس تعالى كدة اركب الإلانترا و عدى ال 120 هتلاقيه مية .... بجد هتخاف جدا و انت سايقها .... لدرجة إنه السواقين بتوع المعارض بيشيلوا فيوز الباور من التابلوه لحد ما يوصلوا العربية للزبون .... جت بقى الشركة تنزل السيراتو راحوا منزلينها بالباور الهيدروليك و عفشة خلفية تورشن بيم ... علشان يدوك ثبات على السرعات العالية ... يعنى بالبلدى كدة هم محزمين السوق ... عايز عربية ثبات أكتر على الطريق موجود ... عايز عربية أطرى و أنعم مع المطبات و النقر جوة المدينة موجود ... و مش معنى كدة إن السيراتو ناشفة ولا الإلانترا بتحدف .... تقبل مرورى

ملحوظه صغيره كده بور الالنترا بيتقل قوي مع السرعات العاليه وعند 120 بيكلبش في الارض دي ما كنتش موجوده في 2007 وتم تعديل الموضوع ده