الموضوع: ممكن تدفعوا مخالفات مش بتاعتكو؟؟

السلام عليكم اهالي نايل موتورز الكرام

باختصار شديد النهاردة كنت فلمرور بجدد الرخصة.. تجديد فقط يعني ديتها شهادة مخالفات

وضرايب وخلاص

وصدق او لا تصدق فساعه كنت مخلصة كل حاجة ولا طلبت مساعدة من اي حد ولا حتي حد يعرف اني رايحة .. يمكن اللي عطلني بس انهم طلبوا شهادة بيانات

بالرغم من ان الرخصة لسه سارية... بس علشان ارقام جديدة

المهم كان كل فين وفين شباك يتفتح ياخدوا الرخص وبعدين ينهدهوا عليهم علشان شهادة البيانات وعلساعة 11 كدا قالوا خلاص مش هناخد تاني

انا مسكتتش... دخلت لوكيل النيابة بمنتهي الثقة ولا كأني بنت اخت وزير العدل مثلا

قلتله حضرتك ازاي من 11 مش هياخدوا رخص وكدا؟؟

راح خد ورقي وقالي علي فكرة انتي هتقعدي 3 سنين تفعدي مخالفاتك فلمرور القديم اللي هوا مرور عبود اللي انا نقلت منه لمرور اكتوبر

قلتله نععععععععععععععم؟؟؟ وليه يعني الدوخة دي ونا ملفي هنا


قالي هو كدا لان الرقم القديم ممكن تكون عليه مخالفات ومتظهرش الا فخلال 3 سنين

عموما اانا هتصلك بمرور عبود لو عليكي مخالفات تدفعيها هناك ولو معليكيش هخلصلك كل حاجة من هنا

بصراحة شخص محترم جدا ومتعاون ربنا يكرمه

وجت النتيجة وكنت مستنياها ولا نتيجة الثانوية العامة

المخالفات صفر.. ومفيش عليه اي مخالفة

استنوا استنوا متفرحوووووووووووووووووووو ووش


الرقم القديم عليه مخالفة 1000 جنيه سير عكس الاتجاه

اااااااااااه يا مراررررررررررررررك يا آيس

تخيلوا... لو تفتكروا اخر مرة جددت كان فيه مخالفة زيها فوقت كانت العربية عاملة حادثة ومركونة مبتتحركش

المهم لما سألت علي توقيت الحمخالفة لقيتها فاكتوبر قريب من المرور برده.. والتاريخ دا لمع فدماغي حاجة معينة

فنفس اليوم دا اخويا خد العربية عشان عربيته كانت بيظة وراح بيها مرور اكتوبر برده علشان يجدد الرخصة

واتصلت بيه وسالته علي اخر مرة جدد فيها طلع بنفس التاريخ

طبعا انا مسكتش وادتله من المنقي خيار زي مبيقولوا

بس برده فالاخر لا مفر هدفعهم ومش هاخدهم منه طبعا.. ولو انهم حارقنني اوي

لو انتو فمكاني ممكن مترضوش تدفعوهم؟؟ وتخلوا صاحب المخالفة يدفعها.. سواء كان اخوك او والدك او صاحبك

بصراحة انا متعكننة اوي

علي رأيك..كل ورقة داخلة او خارجة من شباك فضهرها لازق عشرة جنيه

بس انا المرة دي كنت مصممة اني مدفعش اي رشوة علشان ربنا يكرمني فلمشوار ويسهلهالي

حتي لما قالوا مش هناخد رخص تاني عشان مخالفات لقيت واحد غمز الموظف قام طالعله.. وراح الراجل اداله 100 جنيه والراشي راح الي قالي لو مستعجلة زيي اديله ميت جنيه يخلصلك شهادة المخالفات دلوقتي حالا..

قلتله مش مبرر ابدا اني ارشي واشيل ذنب رشوته اني مستعجلة

قام الراجل سبني ومشي من غير ميرد

ونا داخلة لوكيل النيابة فوقتها لقيت الموظف جيلي بيقولي الله يكرمك يا استاذة اوعي تجيبي سيرة...(كان تقريبا فاكرني داخلة اخبص عليه)

بصراحة بصيتله من فوق لتحت وسبته ومشيت