احذروا - أسلوب سرقة جديد في محطة بنزين مش عارف حد قابله ولا لأ

**تامر.محمد** · 22-09-2010 02:03 AM

سلام عليكم
النهارده الصبح كنت بامون في محطة وطنية
المهم, انا متعود اني بابص دايما على العداد اثناء التموين

بس لاحظت ان العداد ابتدا من 5 لتر مش من صفر !!!
فنزلت و قلت للعامل انت ليه عدادك باديء من 5 لتر , قال لي لأ هي فصلت بس و شغلتها تاني
قلت له لأ , انا شايفها بدأت من 5 لتر و انت ما لحقتش اصلا تحط 5 لتر
قال طب انت مش عارف عربيتك بتاخد ايه , قلت له عارف طبعا .. كمل

لما التانك اتملا العداد كان قاري 27 لتر , قلت له لأ كده كتير حوالي 5 لتر فعلا

(التانك بتاع عربيتي 48 لتر و انا كنت داخل المؤشر فوق النص بشوية صغيرين ده غير ان العربية من اخر تفويلة كانت عاملة 240 كيلو و انا عربيتي بتعمل 200 كيلو في الصفيحة جوة البلد)

المهم انه حاول يقاوح معايا قلت له انا متأكد من اللي باقوله , لقيته ما طولش في المقاوحة و رجع لي 10 جنيه زيادة في الباقي و بيقول لي يعني هاقول لك ايه

حسيت انه ما قاوحش حتى كتير

و أخدتهم و مشيت

**Ahmed A Rahman** · 22-09-2010 02:44 AM

انهي بنزينه وطنية حصل الكلام ده

**mahamedaraby** · 22-09-2010 02:57 AM

والله الناس بتعامل مع صاحب العربيه اكنه حرامى مثلا لاقى فلوسها فى الشارع

البنزين فيه غش وسرقه
قطع الغيار نفس الكلام
تيجى تركن تلاقى واحد نط ليك عجله وراء يا بيه وكل سنه وانت طيب
ضرايب للدوله
شوارع مكسره

مش عارف الواحد هيلاقها منين ولا منين

**dr-mohamed** · 22-09-2010 04:55 AM

بنزينة وطنية متهيالي صعب اوي يحصل فيها الكلام ده لانها ملك للجيش يعني مراقبة وحسابات وشرطة عسكرية وسجن حربي مفيش حد يتجرا على انه يغش فيها
تلاقي العسكري كان ممون لحد قبلك 5 لتر وطمع انه ياخد فلوسهم لنفسه ومصفرش العداد ولما انت دخلت تمون كمل عليه

**ahmedamr** · 22-09-2010 05:13 AM

يا باش في بنزينات اللتر بتاعها لتر الا ربع وفى نص لتر كمان كنت بمون من بنزينة معينة فلاحظت انى مش متعود ع المؤشر دة خالص
زكان مصفر العداد قدامى وكلة تمام المرة اللى بعدها بقة جبت ازازة بيبسي اتنين لتر وقولتلة حطلى اتنين لتر هنا قالى مش هينفع يا باشا و ضغط المسدس والكلام دة فين وفين حطلى اتنين لتر فوجئت بالازازة اتملى تلتينها بس او اقل فوق النص بحاجة بسيطة عرفت من ساعتها انهم حرامية بقيت عمل حوار الازازة دة مع البنزينات اللى بشك فيها ومرة تانية دخلت بنزينة الصبح بدرى اوى لقتهم بيفولوا فتاطيس كدة صغيرة بنزين 80 ويروحو يدلقوها فى تانكات 90 و92 وكزا فنطاس مش مرة واحدة بس خدوا كتير اوى
حسبي الله ونعم الوكيل فيهم