علاقات الجيران ادخل وشارك فرأيك يهمنا

السلام عليكم ورحمة الله وبركاته
من فترة وانا نفسي اتكلم معكم عن علاقتنا بالجيران هل الاقتصار اللي اصبح موضة دلوقتي هو الصح
هل مجرد اننا نتقابل مع جيراننا بالصدفة عند مدخل العمارة او بالاسانسير او في الجراج او اثناء الذهاب للعمل هو ده اللي المفروض ان يكون بس هل هز الدماغ لجارنا بالسلام و الابتسامة المقتضبة السريعة هي دي حققوق الجار علينا اللي مفروضة علينا في ديننا وفي جميع الاديان السماوية اتوقع الاجابة ليست في صالحنا جميعا
طبعا اليوم انا بخاطب الشريحة الاكبر من الاعضاء اللي هما اصحاب بيوت يعني الشباب اللي لسه مفتحش بيت مستقل هتلاقي اغلبهم ليس لهم حرية الاختيار ولا حرية التعبير عن اختيار علاقاته بجيرانه وبيكون مقيد بعلاقات الاصدقاء اللي اتربي معهم وهو صغير في البيت والشارع واكيد علاقاته معهم بتكون قوية جدا بس اول ما يتجوز ويصبح له كيان مستقل هههههههههههههههههههههب علطول تلاقي التقوقع حصل والخوف من الجيران يصبح وكأن الموضوع فيه عقدة
هل للاعلام دور في هذا زي مثلا موضوع (( روحي يا بنت استلفلنا بصلة من ام محمد جارتنا وبعد شويه روحي يا بنت استلفلنا شوية ملح وشويتين روحي يا بنت استلفلنا كام حتة لحمه )) هههههههههه
و اكيد لما الشئ الوحيد اللي بيجمع الجار بجاره بيكون اما عتاب علي مكان ركن العربية او التكييف بينقط علينا او السلم مش نضيف من تنضيف السجاد او اولادكم بيهبدوا علينا طول الليل او البواب باشا بينقل الكلام بين السكان وده قال عليك كذا والمدام علقت بكذا كل دي مواقف مش ظريفة بتجمع الجيران يبقي اكيد هيحصل صدام و الصدام ده بيكون بسسب اختلاف الطباع بين الناس طب نحل الموضوع ده ازاي وازاي نقدر نربي اطفالنا علي ان للجار حق علينا كما امرنا واوصانا الرسول الكريم وحثنا علي ذلك وازاي احنا كمان نلحق شئ من تحقيق ذلك
انا حابب افتح معكم حوار حول الموضوع ده ونفسي الشباب كمان يشاركونا رأيهم ويقوللنا لما هيتجوزوا اول شئ هيعملوه ايه وانا كمان هشارك مع حضراتكم في ابداء الحلول عل وعسي ان يجمعنا الله بجيراننا في الجنه وان يكتب لنا هذا في ميزان حسناتنا وان نستفيد من اراء بعض عسي ان يختم الله لنا بصالح اعمالنا

م.حاتم السباعي

الحمد لله انا بهتم بالاحسان الى الجار لان دة امر مهم جدا فى الدين

مش كل الجيران
أنا ربنا رازقني بجار سكرة ..والجيران التانيين ..حسبي الله ونعم الوكيل فيهم
منتهى الغباء البشري

علاقتهم بيا .. إنهم يدخلوا ياخدوا البلح بتاع النخل إلي عندنا في البيت من ورانا
وساعات بيفتحوا بوابة البيت .. ويحطوا فيه الدقيق المتهرب من الفرن بتاعهم
كام مرة أزعقلهم .. وأقولهم هبلغ عنكم والله لو حطيتوا الدقيق ده هنا تاني
وبرضو عادي..منتهى التباتة
ده غير طبعا لما يدخلوا - بكل صفاقة- يركبوا خرطوم الميه في حنفية الجنينة علشان يرشوا الشارع

انا مش متجوز بس من وجهه نظرى فى العلاقه بين الجيران بعد الزواج

بتكون عايز تستقل بحياتك وتتحمل مسؤلية بيت واسره ومش عايز حاجة تطلع بره
الشقة بتكون جديدة ومتعرفش الجيران مين محترم ومين مش كويس ومين ومين .......
بعد فتره بتبقى العلاقات احسن كتير وعرفت الناس كويس
وحاليا مفيش حد فاضى كله مشغول علشان يصرف على البيت ويراعى اولادة ربنا معاهم ومعانا غبيكون التعامل فى الضروريات زى ماقولت فى الجراج على السلم صباح الخير مساء الخير كدة

والله حضرتك الموضوع اختلف دلوقتى عن زمان
زمان وانا صغير
كان بتبقى علاقات كلها اخوة وصداقة وتلاقى فلانة كل يوم او يومين قاعدة عندها شوية كدة بعد المغرب مش زيارة والسلام
وفى رمضان والعيد عزايم ويجمعوا بعض ويعملوا الكحك والبسكوت
واى مشكلة اواى فرح او حزن دايما تلاقيم مع بعض
وكان فى ود وحب وصدق والجار كان بيبقى زى الاخ واكتر
على فكرة انا اسة عندى 22 سنة يعنى مش كبير
بس الحاجات دى كلها عشتها وشوفتها بعينى
وانا صغير
انما دلوقتى كل واحد فى حالة اذا كان فى سلام او ابتسامة وخلاص
بل بالعكس بقوا بيتخانقوا مع بعض ومشاكل وحاجة مش كويسة خالص
فعلا البركة بقت بتقل يوم عن يوم
وانا عن نفسى لما هافتح بيت هابقى متحفظ شوية مع الجيران لحد مايبان الكويس من الوحش
وان شاء الله يبقى فى علاقة كويسة معاهم زى ماكان زمان

طبعا الوضع في الارياف بيختلف عن المدن
في الريف كله عارف بعضه وقرايب بعض اصلا يعني العلاقة حميمة اكتر
في المدينة انت متعرفش مين اللى ساكن في الشقة اللى جنبك
ممكن تعرف اسمه وظيفته لكن لا يمكن تعرف اصله او اخلاقه
معلش لو عندك اولاد وزوجة لازم تخاف من كل حاجة حواليك واولهم الجيران واقرا صفحة الحوادث اسبوعيا لازم تلاقي جرائم قتل وسرقة واغتصاب وكلها من الجير ان
احسن حاجة تبقي العلاقة صباح الخير مساء النور وتقفل باب شقتك حتي وانت قاعد فيها
الا في الازمات يعني حريقة حد محبوس في الاسانسير واحدة بتصوت
غير كدة متشكرين كل واحد يخليه في حاله احسن

اكبر دليل على عدم المشاركة والاقتصار جاري لسة شاب واخد الشقة جديد واتجوز وعزم العمارة كلها 22 شقة واحد بس اللى راح جامله هو انا رغم انه مسيحي واكتر من نص العمارة مسيحيين يعني المفروض كان راح حد منهم وييجي بعد كدة واحد من اخواننا اللى دماغهم بايظة هنا يقولك مسلمين ومسيحيين واضطهاد وكلام فاضي من اللى مالهوش لازمة في مصر

اقتباس:

---

المشاركة الأصلية كتبت بواسطة dr-mohamed

اكبر دليل على عدم المشاركة والاقتصار جاري لسة شاب واخد الشقة جديد واتجوز وعزم العمارة كلها 22 شقة واحد بس اللى راح جامله هو انا رغم انه مسيحي واكتر من نص العمارة مسيحيين يعني المفروض كان راح حد منهم وييجي بعد كدة واحد من اخواننا اللى دماغهم بايظة هنا يقولك مسلمين ومسيحيين واضطهاد وكلام فاضي من اللى مالهوش لازمة في مصر

---

نقطة غريبة جدا يامحمود
الواحد بيسمع عن الموضوع ده كتير ..وعن أحداث عنف أحيانا وكلام من ده
لكن والله الذي لا إله إلاهو
عمري ماشوفت حاجة من دي حواليا خااالص .. وكأنهم بيتكلموا على بلد تانية
يعني أنا صاحبي الأنتيخ
إسمه حليم ..أعرفه من أيام الجامعة
تخيلوا
فضلت سنة كاملة صاحبه ....رايحين جايين
وأنا فاكر إن إسمه عبد الحليم .. والدلع حليم
وماكنتش أعرف إنه مسيحي طول السنة دي
...........

اذا سمحتم لي بالمشاركة في محاولة لايجاد حلول لهذه المشكلة
اتوقع من وجهة نظري ان الموضوع يرجع للبعد عن صلاة الجماعة في المسجد وعدم المحافظة عليها
اولا _ لانها واجب
ثانيا_ لانها ستفرز لنا بنسبة 70% علي الاقل من اخلاقيات جيرانا
فلا اتوقع مثلا ان شخص يحافظ علي صلاة الفجر في جماعة ثم
يقوم بعمل غير محترم مع نساء العمارة او اي شئ من هذا
ثالثا_ التقابل بالمسجد به روحانيات لا تجدها الا في بيوت الله يعني مفيش خصام مفيش عتاب مفيش غير كل ود وتراحم فده بيجعل الحوار بين الجيران بعيد عن الشيطان يعني لو الاخ بتاع الدقيق اللي بيهرب الدقيق عند الدكتور احمد بيروح الجامع ومداوم علي الصلاة يمكن يقدر امام المسجد من اقناعه بأن ده حرام ولا يجوز شرعا بدل الخناق وفيه كثير من الناس عندها رياء يعني هما لا يخافوا الله ولكن بيخافوا من لوم الناس ونظرتهم ليهم فأحنا هنشتغل علي الجانب ده مع مثل هؤلاء حتي يمن الله عليهم بمخافته ويصبحوا اسوياء
اللي نفسي اقوله ان هناك كثير من الجيران لا يفهموا بعض يعني زي كثير من (( السلايف )) مش عارف ليه
واتوقع ان هناك اتنين جيران متخاصمين في عمارة واحده وهما الاتنين معانا دلوقتي في المنتدي و بيشاركوا معانا ويمكن يحدث بينهم صداقة من النت بأسمائهم الحركية وهم لا يعلمون ان الحيط في الحيط وان الرسول صلي الله عليه وسلم اوصانا بالجار في احاديث كثيرة
هل نستطيع ان نعمم فكرة (( لا خلاف مع جار )) مهما حدث لاني اتوقع ان الجار مثل الاخ حتي وان اختلفت الديانة لانه اقرب لي من اخي في مرضي وفي حزني وفي فرحي
وسأحكي لكم موقف حدث معي شخصيا في سكني القديم
كان لي جار دكتور وكان الله يرحمه منعزل عن كل من حوله هو وأبنائه و لكن يشهد الله انه كان علي خلق كريم ولكن الانعزال التام ده انتقل للابناء حتي ان الابن الكبير لا يلقي السلام اثناء الصعود والنزول مثلا والله كنا نراهم يوم الجمعة في المسجد و تلتقي الاعين ولكن لا سلام حتي منهم المهم اخونا الفاضل مرض مرض شديد حتي جاء يوم وسمعنا صراخ فنزل لهم اغلب من كان موجود بالعمارة وسبحان من له الدوام وجدناه وقد انتقل الي الرفيق الاعلي في ليلة من ليالي رمضان اللهم ارحمه و اغفر له واحس خاتمتنا كما احسنت خاتمته
فسارعنا بالتجهيزات و معاونة ابنه الكبير واستخرجنا التصريح واحضرنا الكفن وقد حضر اخوته وكل شئ جاهز وغسلنا بفضل الله ثم دفنا
كل ده مفيش مشكلة وبيحدث في كل دقيقة امال ايه الحكاية
الحكاية ان زوجته اصبحت علي صلة وثيقة بنساء العماره بعد ان شاركوها محنتها ووقفوا بجانبها اثناء المحنه ووجدت ابنه يمكن بيدور علي الناس علشان يسلم عليهم يعني يا جماعة الخير
اللي اقصده ان الموضوع تعود فقط يعني ده كله كان ممكن يحصل من زمان مش لازم نخلي المواقف بس هيا اللي تقربنا لبعضنا طب مانيجي احنا نطبق كلام وافعال الرسول مين مننا بيخبط بعد صلاة العشاء علي جاره وبيسأل عنه مين مننا بيساعد ابناء جاره في مذاكرتهم زي مابيساعد اولاده ومين ومين ارجوا الا اكون مثقل عليكم بكثرة الكلام ولكن نفسي نغير من الحال اللي وصلناله قبل ان يفوت الوقت ولا يجد من انعزل غير جاره يحمله ويرفعه ويصلي عليه دون ان يكون له قدرة علي رفض هذا او قبول هذا سنوضع امام الكل شئنا ام ابينا لن نختار وقتها فهنيئا لمن حافظ علي علاقته الطيبة بكل من حوله (( اسوياء كانوا او غير ذلك ))
وهي دي المعادلة الصعبة

م.حاتم السباعي

جيرانى حشريين و بيبصوا فى كل حاجة

اقتباس:

---

المشاركة الأصلية كتبت بواسطة a7med_pharma

مش كل الجيران
أنا ربنا رازقني بجار سكرة ..والجيران التانيين ..حسبي الله ونعم الوكيل فيهم
منتهى الغباء البشري

علاقتهم بيا .. إنهم يدخلوا ياخدوا البلح بتاع النخل إلي عندنا في البيت من ورانا
وساعات بيفتحوا بوابة البيت .. ويحطوا فيه الدقيق المتهرب من الفرن بتاعهم
كام مرة أزعقلهم .. وأقولهم هبلغ عنكم والله لو حطيتوا الدقيق ده هنا تاني
وبرضو عادي..منتهى التباتة
ده غير طبعا لما يدخلوا - بكل صفاقة- يركبوا خرطوم الميه في حنفية الجنينة علشان يرشوا الشارع

---

انا لو منك اخبىء الدقيق منهم علشان يتعلموا الادب

و حنفية الجنينة ممكن تعملها محبس تانى مخفى تشغلها وقت ما تحب

يا نهار ملون يا فارما
انت عارف يعني ايه يدخلوا جنينة البيت من غير اذن ؟؟؟؟؟
يعني دخلوا البيت من غير اذن
ده انا احبسهم وابلغ الشرطة انهم حرامية
ايه البجاحة دي

انا بيتهيألى المشكلة من اكبر اسبابها النظام المتخلف اللى اسمه الأيجارالمؤقت ده على ما تحاول تعمل علاقات مع جارك هيكون بيدور على شقة فى مكان تانى عشان الأيجار الجديد المطلوب منه اعلى بكتير من المعقول وكل شوية هتلاقى خريطة العمارة كلها اتغيرت بناس جديدة بأفكار وطباع جديدة ودى حاجة مرهقة جدا غير زمان كان عشرة وتعود والميزة الوحيدة ان لو جارك سىء يا هو هيرحل يانت هترحل

محتش بالموضوع الا لما قعدت في شقه لوحدي في الأسكندريه لان قبل كده كنت في بيت عيله وكل جيراني قرايبي

جيراني بالنسبه ليا هما االي في نفس الدور ودي علاقتي بيهم كويسه قوي يعني اروح الاقي ولادهم عندي في الشقه بيلعبو مع ابني وجارتنا كل ماتروح السوق تعدي علي مراتي عشان تشوفها محتاجه حاجه ولا لآ ومراتي برده بتعمل كده
انا مليش اي علاقه بيهم بصراحه لاني من الشغل للبيت ومش فاضي خالص

باقي الجيران ناس محترمين برده يعني لما يبقو عايزيين يبنشرو هدوم مثلا واحنا منشرين وهما فوقينا ينزلو يقولنا احنا عايزين ننشر ومره ماسورة المياه اتكسرت واحنا مش موجودين وظبطوهلنا والناس اللي في الشارع لقو عجل العربيه نايم قامو نافخينو

اقتباس:

---

المشاركة الأصلية كتبت بواسطة shaddadfalcon1

محتش بالموضوع الا لما قعدت في شقه لوحدي في الأسكندريه لان قبل كده كنت في بيت عيله وكل جيراني قرايبي

جيراني بالنسبه ليا هما االي في نفس الدور ودي علاقتي بيهم كويسه قوي يعني اروح الاقي ولادهم عندي في الشقه بيلعبو مع ابني وجارتنا كل ماتروح السوق تعدي علي مراتي عشان تشوفها محتاجه حاجه ولا لآ ومراتي برده بتعمل كده
انا مليش اي علاقه بيهم بصراحه لاني من الشغل للبيت ومش فاضي خالص

باقي الجيران ناس محترمين برده يعني لما يبقو عايزيين يبنشرو هدوم مثلا واحنا منشرين وهما فوقينا ينزلو يقولنا احنا عايزين ننشر ومره ماسورة المياه اتكسرت واحنا مش موجودين وظبطوهلنا والناس اللي في الشارع لقو عجل العربيه نايم قامو نافخينو

---

ربنا يخليهم لك
حاول تودهم اكتر ولو فى المناسبات

اقتباس:

---

المشاركة الأصلية كتبت بواسطة a7med_pharma

نقطة غريبة جدا يامحمود
الواحد بيسمع عن الموضوع ده كتير ..وعن أحداث عنف أحيانا وكلام من ده
لكن والله الذي لا إله إلاهو
عمري ماشوفت حاجة من دي حواليا خااالص .. وكأنهم بيتكلموا على بلد تانية
يعني أنا صاحبي الأنتيخ
إسمه حليم ..أعرفه من أيام الجامعة
تخيلوا
فضلت سنة كاملة صاحبه ....رايحين جايين
وأنا فاكر إن إسمه عبد الحليم .. والدلع حليم
وماكنتش أعرف إنه مسيحي طول السنة دي
...........

---

ههههههههههههههههههههههه انا فيه ناس كتير بصاحبهم وبعد فتره كبيره اسأل نفسى هما مسلمين ولا مسحين ارجع اقول وانا مالى الدين لله
وفعلا حصلت معايا مره عرفت ان واحد زميلى فى المعهد كنت بركب معاه القطار انه مسيحى مع انه كان افضل من ناس كتير اعرفها
مدام الشخص محترم وعلى خلق وكويس عاوز منه ايه تانى

والعماره الى فيها المحل بتاعى نصها مسحين لما بيجى العيد بلاقيهم يقولولى كل سنه وانت طيب وانا كمان لما بعرف ان عندهم عيد بقولهم كده

مش عارف فعلا انا حاسس ان الكلام الى بيتقال عن ناس تانيه فى بلد تانيه

نرجع للموضوع الرئيسى

انا اتربيت فى منطقه شعبيه وانا صغير وطبعا عارفين علاقات الجيران هناك ازاى ببعض

لو واحد كح جاره يرد عليه قبل اهل بيته

بجد هى مشاعر جميله وتحس بالامان بس ده كان زمان من 10 سنين مثلا قبل مالحياه تبقى صعبه كده والناس تبص لبعض وتحسد وتنفسن من بعض
وبتوصل فى بعض الاحيان والله العظيم انهم يخربو بيوت بعض

الوضع بقى اسوء من الاول بكتييييييييييييييير

وعشان كده من ايام الخطوبه وانا قولت لمراتى انسى انى اروح الاقى حد من الجيران قاعد عندنا ولا تدخلى عند حد اكتر من السلام والكلام العادى لا وانا مبحبش الاختلاط والكلام ده عشان ميحصلش مشاكل وده قال ودى قالت

فالحل بقى الاقتصار اكتر من سلام عليكم ازيكم عاملين ايه كل سنه وانتم طيبين ولو سمعت ان حد تعبان اقوله الف سلامه

صدقنى الاقارب والناس الى من دمك بقو يتمنولك الخراب والشر احنا بقينا فى زمن مايعلم بيه الا ربنا
دى وصلت للاخوات والله العظيم الاخوات دلوقتى ملهمش امان

مش معنى كلامى ان كل الناس وحشه بالعكس فيه جيران هنا فى العماره وقفو جنبى فى مواقف لم انساها لهم ومبسدق اردلهم اى موقف من المواقف دى يعنى مثلا لو بتاع النور جه وهما مش موجودين بدفع ليهم لحد ميجو من بره
بس مش كل الناس يتعمل معاهم كده الى انا جربته وعارف انه يستاهل

ربنا يتوب علينا من الزمن الى احنا فيه دلوقتى

ان ديننا يوصينا بالجار ويجب ان يطبق كل واحد منا ما امرنا الله به وحثنا عليه رسولنا الحبيب صلي الله عليه وسلم

(( حق الجار في القرآن الكريم )):-
نظرا لموقع الجيرة المهم في الشريعة الإسلامية وفي بناء النظام الاجتماعي الإسلامي فقد اهتم الكتاب العزيز بحق الجيرة والجيران ونبه المسلمين إليها بل شدد في ذلك مؤكدا على حقوق جميع الجيران دون استثناء أيا كان منزلة هذا الجار ودينه وجنسه. قال تعالى : " وبالوالدين إحسانا وبذي القربى واليتامى المساكين والجار ذي القربى والجار الجنب والصاحب بالجنب وابن السبيل" (النساء: 36).
(( حق الجار في السنة النبوية )) :
كذلك أولت السنة النبوية عناية خاصة لحق الجار وبينت ما يجب تجاهه من حقوق ينبغي مراعاتها، كالإحسان إليه، وكف الأذى عنه، وتفقده، وإعانته في حاجته وعيادته إن مرض، قال صلى الله عليه وسلم فيما رواه الإمام مسلم في صحيحه عن أبي شريح الخزاعي رضي الله عنه : " من كان يؤمن بالله واليوم الآخر فليحسن إلى جاره" .
وفي الصحيحين عن أبي هريرة رضي الله عنها أن النبي صلى الله عليه وسلم قال: " والله لا يؤمن، والله لا يؤمن، والله لا يؤمن، قيل يا رسول الله من؟ قال: الذي لا يأمن جاره بوائقه " والبوائق هي الشرور والآثام والإيذاء . وفي رواية للإمام مسلم : " لا يدخل الجنة من لا يأمن جاره بوائقه " .
وأخرج الإمام أحمد في مسنده عن أبي هريرة رضي الله عنه قال: قال رجل يا رسول الله إن فلانة تذكر من كثرة صلاتها وصدقاتها وصيامها غير أنها تؤذي جيرانها بلسانها. قال : هي في النار".
ومن حقوق الجيران إن مات أن يشيعه، وإن استقرض يقرضه،وإن أعور ستره،وإن أصابه خير هنأه، وإن أصابته مصيبة عزاه، ولا يرفع البناء فوق بنائه، فيسد عليه الريح إلا بإذنه.. (( منقول ))
واني انبه بأن الشيطان لا يسعده ان نطبق شرع الله بيننا وبين جيراننا فيدخل بين الجيران ليبث سمومه بأن يوسوس لفلان بأن فلان بيتعالي عليك او ان ايه الكلمة دي اللي تتقال لابنك من جارك ازاي تسكت عليها هوا ابنك الحيطة المايلة في العمارة او فلانة قالت لعلانة جارتها كلمة وعدت تيجي تحكي لجارتهم التالتة تقولها ايه ده ازاي تسكتيلها علي اللي قالته لازم تعاتبيها او ان يجعل الناس تقتصر لا سلام ولا كلام يعني لا يهداء ولا يهناء الا بان يجعل هناك فرقة بين الجيران بعضهم وبعض و طبعا هو اللي في الاخر انتصر لانه بعدنا عن شرعنا و عن سنة نبينا الكريم فيجب ان نحافظ علي الشعرة اللي بين الاختلاط الكامل اللي بالفعل بيجيب مشاكل ولا طائل من ورائه--- وبين المودة و التراحم و التفاني في مساعدة الجار و قت الحاجة وان نربي ابنائنا بأن الجار له حق علينا مش زي اللي بيحصل دلوقتي

م.حاتم السباعي

انا بصراحه من الناس اللي مابتحبش تعمل علاقات مع ناس ماتعرفهاش:U_thin1[1]: حتي لو الجيران احسن حاجه الابتسامه والقاء السلام :Y_hi_3[1]:ولو اشتكي من تنقيط تكييف او ركنه عربيه او اي حاجه من الحاجات دي لو شايف انها فعلا من حقه بعملها بدون تردد وبقوله انا اسف ماكنتش واخد بالي انما علاقات اجتماعيه وخروجات مع بعض وزوجتي تتعرف علي زوجته والكلام ده بصراحه انا مابحبوش ممكن اللي يقرأ الكلام ده يقول اني غلس بس والله انا مش كده وكل اللي يعرفني الحمدلله بيحبني:8_8_13: بس انا مابحبش ادخل نفسي في حوارات:36_9_4:

انا شايف الابتسامة العريضة الصبح وفى التهنئة أو العزاء فى المناسبات والاعياد والسلام عليكم كافى اوى وزيادة وهو دا اللى مستنيه من جيرانى اى حاجه تانية شكرا اوى ولا يلزمنى مش معنى كده انى لو وقعت فى الشارع ميطلبليش الاسعاف مثلا؟ فيه حاجات اى حد بيعملها لاى حد ميعرفوش حتى.
لكن الغرض من كلامى الاقتصار الاقتصار الاقتصار لابعد الحدود. القرب الشديد من الجار بيعمل ايه فى مجتمعنا من غير زعل لازم نبقى واقعيين ومنطقيين هلاقى زوجتى بالليل ام احمد جارتنا جابت تلاجه جديده بس جميله دا فيها حنفية مياه ابقى حطى ازازة مياه فى التلاجه يا حبيبتى هى بقى طب ما التلاجه هتبوظ انا لما تبقى تبوظ هبقى اقول لابوكى انت جبتلنا تلاجه وحشة دا احنا بقى لنا سنة متجوزين القصد هتلاقى مراتك مجنناك وكل واحد له رزقه.
عيالك بقى المصيبة الكبيرة هيبصوا لجيرانهم اللى بيلعبوا معاهم بابا ايوه يا حبيبى انا عايز xbox ودا ايه البوكس دا يا حبيبى أتارى يا بابا طيب مانت بتلعب طول النهار على الكمبيوتر يا ابنى فيه ايه وهيعيط وانا قلبى رهيف ولا تبص بقى انت مروح تنام ساعتين تلاقى واد زى البغل بيكلم بنتك الصغيرة وبيلعب معاها تنده لبنتك وتجيب مراتك فى ايه يا هانم دا بودى ابن ام عبد الرحمن جارتنا اهلا هو عنده كام سنه؟ 6 سنين دا دخل سنه اولى السنة دى ماشاء الله وبنتك عندها 3 سنين يا هانم سايبه البنت ليه مع الولد لو مراتى مش متربية كويس ممكن ترد عليا وتقولى انت متخلف طفل زى دا هيكون عايز ايه من بنتك؟ لكن الحقيقة ان مينفعش الاولاد يتسابوا مع بعض لا فى السن دا ولا بعدين خصوصا ان فى السن دا الطفل بيبقى عايز يعرف ليه بيختلف عن الجنس الآخر وبيبقى عايز يكتشف فيه حاجات اكيد مرت بينا واحنا صغيرين ومخبينها او حاجات كنا بنشوفها بتحصل قدامنا بسبب التقارب الشديد بين الجيران دا حتى لما يجيبوا ممثلة ولا مغنية يقولها الحب الاول ترد بكل وقاحة ابن الجيران.

اقتباس:

---

المشاركة الأصلية كتبت بواسطة esam_comm

انا بصراحه من الناس اللي مابتحبش تعمل علاقات مع ناس ماتعرفهاش:u_thin1[1]: حتي لو الجيران احسن حاجه الابتسامه والقاء السلام :y_hi_3[1]:ولو اشتكي من تنقيط تكييف او ركنه عربيه او اي حاجه من الحاجات دي لو شايف انها فعلا من حقه بعملها بدون تردد وبقوله انا اسف ماكنتش واخد بالي انما علاقات اجتماعيه وخروجات مع بعض وزوجتي تتعرف علي زوجته والكلام ده بصراحه انا مابحبوش ممكن اللي يقرأ الكلام ده يقول اني غلس بس والله انا مش كده وكل اللي يعرفني الحمدلله بيحبني:8_8_13: بس انا مابحبش ادخل نفسي في حوارات:36_9_4:

---

نفس الدماغ يا معلم

اعتقد زمان كانت العمارة كلها 5 او 6 ادوار و في كل دور شقة او اتنين بالكتير فاتلاقي الناس علرفين بعضهم و بينهم ود و محبة جميلة

دلوقتي البرج من دول 14 در و كل دور 5 شقق يبقى هاتتعرف على مين ولا مين و هاتود مين ولا مين

و كمان مشاغل الحياة بقيت اصعب بكتير يني اهالينا كانو بيخلصو شغل الساعة 2 الضهر و يرجعو البيت يريحو ساعة و يستانفو نشاطهم اما اليومين دول تلاقي الشاب يعيني شغال لما للساعة 8 بليل و ساعات اكتر و مراتو كمان بتشتغل و يدوبك يروحو ياكلو و يننامو ( دوامة )

دة الى جانب الحوادث الكتير اللي بنسمع عنها خلت الناس مش حاسة بالامان ناحية بعض و كل واحد بيفضل يبقى في حاله

عن نفسي الحمد لله اجتماعية و بحب الناس و لينا جارة تحتينا زي السكر مع انها اكبر مني بشويتين و طبعا اصغر من ماما بكتير لكن برضو في علاقات و ود و بنزور بعض و طبق الكحك لسة طالع من تحت و طبق الفطير نازل من عندنا كدة يعني

و في جارة تانية فوقينا مالهاش علاقة بحد و لا حد ليه علاقة بيها - اختلاف طباع عادي

.

انا كل علاقتى بالجيران دلوقتى حاجات معدوده
انهم يرموا لى على العربيه قشر اللب
او بواقى الشاى ومره لاقيت عظم رجل فرخه
وان لو حاجه باظت فى البيت
زى ماتور رفع المياه
او مشكله فى الصرف
نصهم مش بيدفع
وحسبى الله ونعم الوكيل
واحنا باذن الله هنمشى من العماره بسبب الجيران دول بعد 24 سنه ساكنين فيها :)

معرفش أصلا سكان العمارة بتوعى!

الحمد لله علاقتى كويسة جدا جدااااا باغلب الجيران ويوما بنسال على بعض
طبق الكحك فى العيد والهدايا فى المناسبات
ولو حد راح اشترى حاجة ممكن يجيب للتانى وتحت اى ظرف ممكن بيسيبوا اطفلهم معايا ويقضوا احتياجتهم والحمد لله محدش بيتاخر على حد فى حاجة
انما بعد كده الله اعلم بالجيران وغالبا هتجنبهم لحد ماعرف مين الكويس ومين لا

انا مريت فى موضوع الجيران ده بمراحل مختلفه.....

اول مرحله وانا طفل فى بيتنا القديم وكل الجيران كانوا اعمامى.... واخوالى فى البيت اللى قدامنا....

الشارع كله يعرفنى وكلهم بييجوا عندنا....باب البيت مكنش بيتقفل وباب الشقق مكنش بيتقفل...

وفاكر لما والدى كان بيعملنا أنا وأخواتى أعياد ميلاد كنت بلاقى ناس ساكنين فى بيوت بعدنا بخمس او ست بيوت معزومين وجايبين ولادهم معاهم...عادى...

والدنيا لما اتغيرت وبدأت حاجات عندنا تتسرق واللى سافر سافر واللى عزل عزل وظهر ناس جداد قفلنا الابواب....واكتفينا بالجيران القدامى...لكن برضو ود ومحبه وكله تمام التمام,,,

المرحله التانيه....

لما اتجوزت وسكنت فى إيجار مع ناس أغراب....

أنا وزوجتى خارجين من بيوت عيله...فمش واخدين خوانه زى ما بيقولوا..وواخدين على ان الجيران قرايب ....

ابتدى الجيران يتعرفوا علينا وواحده واحده يدخلوا البيت عندى وابتدت السلف والحاجات بدايه من راس الثوم ووصولا للصينى والفضيه وطقم الكاسات ...كل ده عادى..جيران ولهم علينا حقوق....لغايه ما حصل خلاف بينى وبين جار عامل على السلم هيصه اولادى بيتكعبلوا فيها وهما طالعين وبيرفض ينور اليلم بليل عشان الكهرباء غاليه وسمعت فى المشكله دى كلام يعرفنى معدن الجيران اللى معايا فى البيت...

قلت خلاص انا مليش دعوه بجار وصباح الخير يا جارى انت فى حالك وانا فى حالى....

وكل ما يطلبوا فلوس لتصليح اى حاجه ادفع ومبسألش ليه حتى...

لغايه ما حصل مشكله فى سطح البيت اللى هو سقف شقتى....ولما قولت يا جماعه عايزين نظبط كذا فى السقف لانه هيخلى الميه تدخل على الكهرباء واول شقه هتتكهرب شقتى طبعا...

كله طنش ...حتى الراجل اللى قولت كبير وعادل...قللى دى مشكلتك بس....ملناش دعوه....

بقيت حتى ولا صباح ولا مسا ونويت اسيب البيت ده خالص....

بكلم صاحب البيت...رفض انى أخد التشطيب اللى شطبته فى الشقه من الساكن اللى هييجى بعدى....


المرحله التالته....

اشتريت شقه تمليك بفضل الله....

واتفقت انا وزوجتى من الاول كده ملناش اى اختلاط بالجيران ..مش أكتر من سلامو عليكو وعليكو السلام...

لكن الظاهر مفيش فايده.....

واقف قدام الباب بتاع العماره مستنى عربيه جايه بمون لزوم التشطيب الا والاقى واحد عمال يكرهنى فى العماره والناس اللى فيها وانه عايز يسيبها ومش لاقى حد يشترى الشقه وان السماسره مبيرضوش يجيبوا زباين للعماره دى بالذات..إن الراجل اللى اشتريتها منه بيدلل عليها بقالو اكتر من سنه وعرضها على طوب الارض.....وكلام يسد النفس...

يطلع الافندى جارى وكان عايز يشترى الشقه قبلى واختلفوا فى السعر...

إن شاء الله جيره زى الفل..

محدش يقوللى احسن لجارك...

انا أخرى هسلم وارد السلام ومش هأذى حد مش بيأذينى....