بصراحة يا جماعة برغم اني بحب العربية دي و هي فهلا عربية محترمة اوي
بس الموقف اللي حصل معايا عقدني منها
الموضوع اني كنت في فرح يوم الثلاثاء اللي فات بتاع واحدة قريبتي في كفر الشيخ .. والدي هو اللي كان بيزف العروسة في عربية نوبيرا و انا سايق اللانوس و معايا اختي و بنات عمي ... مشينا طول الطريق تمام و مفيش اي مشاكل نهائي .. و قبل الفرح بحوالي 2 كيلو سمعت صوت تخبيط جامد و دربكة كدا .. فركنت بسرعة على جنب و وقفت و ساعتها العربيات اللي في الزفة كلها عدتني و بقيت لوحدي .. اجي اطلع بالعربية مش رادية تتحرك و اسمع صوت تخبيط جامد .. اتصلت بوالدي عشان يجي ياخد اللي معايا و نشوف العربية .. المشكلة ان المكان اللي عطلت فية مكان مقطوع ... المهم بعد شوية وصلنا اللي كانوا معاي و بدات معاناتي انا و والدي عشان نسحب العربية ... دورت على وير عشان نربط العربيتين مش لاقي معايا .. ادور في العربية التانية مش لاقي .. فضلت احاول لحد ما ربط العربيتين بالغطا بتاع عربيتي .. و جينا نسحبها بردو صوت تخبيط جامد ... نزلت تحت العربية اشوف في اية .. وكانت المفاجاة .. الكوبلن فصل بس مش من عند العجله ... من عند الفتيس .. و لما العربية بتتحرك بيخبط في المقصات ة قاعدة الفتيس .. حاولنا ندخله تاني مكانه معرفناش .. لحد ما فكينا العجلة و بعت جيبت مفتاح انبوبة غاز عشان افك الصامولة اللي بتمسك الكوبلن بالعجلة .. لحد ما فكيناه خالص و ركبنا العجلة و سحبنا العربية للبيت .. الكلام دا خلص حوالي الساعة 1.30
تاني يوم نزلت المحلة عشان مفيش حد بتاع قطع غيار او عفشة في المكان اللي انا كنت فية .. دورنا على حد بتاع قطع غيار كلة قافل .. لحد ما ربنا وقفلنا واحد بتاع عفشة و وريتة الكوبلن .. قاللي دا ممكن يتركب تاني .. اخدتة معايا و فضل يركب فية و بعد كدا قاللي دا الكوبلن دا قصير .. قلتلة مفيش في الكبالن دي مقاسات قصير ازاي .. المهم نزلت بالعربية المحلة تاني و طزل ما انا ماشي سامع صوت تخبيط
رحت عند واحد في ابو على في المحلة ناس كتير كانت بتشكر فية .. بس قاللي شوية كلام غريب مش عارف اصدقة ولا لأ .. قال دا كوبلن الجولييت .. و جابلي كوبلن من عندة و قاللي دا بتاعك .. طيب بكام يا عم .. ب 300 جنية ... لية يا حج دانا بشترية من الساعة ب 200 بس .. من هنا لهنا بقى 250 بالتركيب .. طيب ركب و طلعنا نجرب تمام مفيش اي مشكلة و مفيش صوت
انا مش عارف ازاي كوبلن الجولييت يعمل كدا و انا ماشي بية من زمان من حوالي 3 شهور
صورتلكم صورة الكوبلن القديم






ودي قصتي مع كوبلن اللانوس و الفرح اللي مرحتهوش