صيانة 60 ألف كم للميجان ii

تمت بحمد الله اليوم صيانة 60 ألف كيلو متر لعزيزتى ميجو....
من الساعة 8:30 صباحا للساعة 4:15 عصرا.....
الدنيا جميلة جدا فى المقطم و هى مرتاحة و مافيش Over-Loading و مافيش عربيات تدخل من غير حجز...
و تم تعديل خطأ فى تاريخ شراء السيارة بمساعدة من المهندس عمرو أبو الفتوح
و عليه فتم تغيير شريط ال AirBag فى الضمان...تكلفته 1750 جنيه بالمناسبة

العربية اختلفت كتير أوى بعد صيانة ال 60 ألف...صوتها أنعم و أهدىء بكتير..نقلات الفتيس أنعم و أكثر سلاسة...تربيط العفشة مفعوله ساحر وهو بيتعمل فى كل الصيانات حتى المجانية كل 5 آلاف كم....
لسه فى زيارة تانية لما جهاز ظبط الزوايا يشتغل بعد 10 أيام أو أسبوعين...لازم مرة فى السنة أعملها...
إليكم صور القطع المستبدلة و الفاتورة

مجموعة ال Dephasor

http://img59.imageshack.us/img59/5872/img4g.jpg


طلمبة المياه
http://img688.imageshack.us/img688/1676/img2va.jpg


صورة جماعية للقطع و يظهر فيها سير الكاتينة فى أقصى اليسار
http://img826.imageshack.us/img826/1996/img5k.jpg


الفاتورة التفصيلية
http://img833.imageshack.us/img833/1627/img1pf.jpg


لو فى أى أخطاء فى أسماء القطع نرجو من الوحوش تصحيح المعلومة :-)

الحساب الإجمالى شامل الضرائب 2763 جنيه...

تعيش و تصين يا هانى باشا

منورة موضيعك يا باشا
على فكرة أنا عندى نفس العطل بتاع الشريط AirBag الله يطمنك

الف مبروك يا هانى و ربنا يبارك لك فيها

الف مبروك على الصيانة وعقبال صيانة الـ 120 الف

ألف مبروك و عقبال صيانة ال 600 ألف

اقتباس:

---

المشاركة الأصلية كتبت بواسطة pioneerahmed

تعيش و تصين يا هانى باشا

---

اقتباس:

---

المشاركة الأصلية كتبت بواسطة Sharky

الف مبروك يا هانى و ربنا يبارك لك فيها

---

اقتباس:

---

المشاركة الأصلية كتبت بواسطة Elsarrawy

الف مبروك على الصيانة وعقبال صيانة الـ 120 الف

---

اقتباس:

---

المشاركة الأصلية كتبت بواسطة Ahmed A.Maksoud

ألف مبروك و عقبال صيانة ال 600 ألف

---

شكرا يا وحوش :satelite:....و الحمد لله إن القطع و أسماءها طلعت مظبوطة مع الصور

اقتباس:

---

المشاركة الأصلية كتبت بواسطة abasse

منورة موضيعك يا باشا
على فكرة أنا عندى نفس العطل بتاع الشريط AirBag الله يطمنك

---

فى التوكيل ب 1750 جنيه....
فى الموضوع ده....حل تانى...http://www.nilemotors.net/Nile/83498-a.html

على فكرة فى فرق فى الإحساس بلفة الدركسيون بعد التغيير...هو أثقل شوية فى الحركة..لكن مافيش أى صوت تكتكة لا فى آخر اللفة و لا نصفها

أنا كنت عايز أستفسر عن حاجة....
أول ما أخدتها...حطيت الفتيس على ال D ...قبل ما أشيل رجلى من على الفرامل لقيت الموتور عالى و ال RPM معدى ال 1 بشوية كويسين...قلت يمكن أنا متهيأ لى...على ما لفيت علشان أمشى..لقيت إن لأ فى حاجة غلط...وقفت و رجعت لهم...أخدوها تانى جوه و جابوا Laptop ...تقريبا ال Scanner ...و رفعوها من الناحية اليمين قدام و قعد يدوس بنزين...طلع جرب..و رجع تانى عمل نفس الحكاية..و بعدين سلمها لى....
هى ما اختفتش تماما..بس بقيت لحظية..أول ما أحطه على ال D و قبل ما ألحق أشيل رجلى من على الفرامل الموتور يعلى و يروح نازل على طول و يستقر ....

إيه الموضوع ده ؟؟؟
و إزاى العربية الدفع الأمامى يرفع عجلة واحدة بس و التانية على الأرض و يدوس بنزين و هى على ال D و عجلة واحدة بس هى إللى تلف و التانية لأ ؟؟؟

على فكرة..الاكصدام الأمامى ب 2420 جنيه شامل الضريبة....

أنا برده كنت عملت صيانة الـ 120 في العبور بـ حوالي 2800 برده ، وانا في العبور قابلت صديقي العزيز شاركي هنا في المنتدى صدفه ، سبحان الله ،

ألف مبروك يا هاني وعقبال صيانات 120 و 180 ....

بالنسبة لموضوع العجلة اللي مرفوعة والثانية بتلف انا شفته قبل كده برضه في الميجان 1 واستغربت بس كانت الأعراض مختلفة تماما ,
كان عندي صوت زنة بيطلع طول ما انا ماشي بالعربية مع ضغطة البنزين ولما كشفت عليه طلعت بلية العجلة الأمامية محتاجة تتغير وعملوا الاختبار ده علشان يعرفو اي عجلة بليتها محتاجة تتغير.

اقتباس:

---

المشاركة الأصلية كتبت بواسطة Mohd_Adel_Amin

ألف مبروك يا هاني وعقبال صيانات 120 و 180 ....

---

الله يبارك فيك...أنتم السابقون و نحن اللاحقون :ma:

عقبال ال 500 الف يا معلم

اقتباس:

---

المشاركة الأصلية كتبت بواسطة momo10000

عقبال ال 500 الف يا معلم

---

فينك يا عم أيمن......
بص..أنا مش عايز أشترى تيل فرامل تانى من التوكيل....كل مرة بيتغير أسرع من إللى قبلها
مغير على 20 ألف أول مرة..و على 35 ألف تانى مرة...و على 50 ألف ثالث مرة و كانوا عايزين يغروا على 60 ألف المرة دى...
و الخلفى متغير مرتين...على 35 ألف و على 50 ألف

قول لى أخبار الدنيا فى ال EBC تيل و طنابير علشان مش عايز يحصل لطنابيرى زى محمد مصطفى...أنا فاكر آخر مرة قلت إن مفيش EBC للميجان و بقى فيه بيمبو بس....لكن برضه ما عرفتش تعويرة البريمبو يعنى ممكن أبيع كلية و لا لازم كبد على طول :ma:....

و لا فى جديد غير ده و ده ؟؟؟

هي ايه اعراض تلف شريط الايرباج؟!


و ايه اخبار توكيل العبور احسن ولا المقطم لأن المقطم انا مش مبسوط منو نهاااااائي

mabroook ya honnnn

اقتباس:

---

المشاركة الأصلية كتبت بواسطة gebreel

هي ايه اعراض تلف شريط الايرباج؟!


و ايه اخبار توكيل العبور احسن ولا المقطم لأن المقطم انا مش مبسوط منو نهاااااائي

---

تكتكه فى اللف الأول وبعدين هتنور لمبة الأيرباج وبعدين المثيت مش هيشتغل

اقتباس:

---

المشاركة الأصلية كتبت بواسطة Amr_Moh

mabroook ya honnnn

---

الله يبارك فيك يا عمور....:Ob_mak1[1]:

اقتباس:

---

المشاركة الأصلية كتبت بواسطة abasse

تكتكه فى اللف الأول وبعدين هتنور لمبة الأيرباج وبعدين المثيت مش هيشتغل

---

طيب انا عندي تكتكة بتحصل وانا بلف بس وانا فاتح الاشارة بس تكتكة كثير

الف مبروك يا فنان...وتتربي في عزك

اقتباس:

---

المشاركة الأصلية كتبت بواسطة gebreel

هي ايه اعراض تلف شريط الايرباج؟!


و ايه اخبار توكيل العبور احسن ولا المقطم لأن المقطم انا مش مبسوط منو نهاااااائي

---

sorry جدا عل التأخير..بس أنا و الله رديت على استفسارك...بس يبدو إن حصل drop فى المنتدى أو ال network أو ال browser فالرد ما تبعتش....

أعراض تلف الشريط زى ما الوحش أحمد عباس تفضل مشكورا و أوضح...

مين أحسن ..المقطم و لا العبور...

*الكفاءة الفنية...أكيد فى المقطم

*النظام الإدارى من خلال تعاملى معاهم....برضه المقطم...و ده ..أنا بأقوله و أنا فى منتهى الأسف...مافيش مرة أروح العبور إلا و لازم يحصل أى حاجة تزعلنى أو تعكنن عليا و ده بسبب سوء التنظيم....
هو مش كوارثى علشان ما نظلمش الناس.....بس أنا متعود على الدلع من أيام زمان....
و الأسف جاى من إن المقطم أكثر ازدحاما و انظباطا و العبور أكثر رواقانا و مع ذلك حصل إنى وصلت قبل ما يفتحوا بساعة و كنت ثالث عربية توصل و مهندس الاستقبال ما عبرنيش و أخد بعدى عملاء مش أقل من 5 و لا 6 ...لحد ما أنا رحت له...
لا أعتقد إنه تعمد التجاهل...بس هو فى رجل أمن بيسجل العربيات الداخلة..أكيد بترتيب الدخول المفروض يتعامل المهندس بتاع الاستقبال مع العملاء...مش ده إللى حصل....أول ما اتعامل..الناس هجمت و إللى لحق...طبعا أنا اتلطعت ساعة كمان غير ساعة الانتظار...و فى الآخر قالوا لى لازم تحجز بعد ما كانوا قالوا لى تعالى من غير حجز...و مشيت فى قمة الضيق...
الوقت إلى بتستغرقه العربية فى العبور مش أقل بكتير من المقطم....لو حسبتها بالمشوار للعبور عن المقطم ...يبقى المقطم أحسن و أقرب و أسرع كمان

*الناس فى المقطم عندهم القدرة الحازمة على اتخاذ قرار بتغيير أى قطعة فى الضمان بمنتهى السهولة...فى العبور....أقصى حاجة هى تغيير سماعة ..و مش عارف فعلا اتغيرت و لا لأ....لكن الزنة راحت و خلاص...لكن ما يقدروش يغروا حزام الأمان مثلا إللى أنا غيرته فى المقطم مرتين و لا 3 فى الضمان...كل إللى قدروا عليه فى العبور إنهم يقولوا لى لازم يتغير و ثمنه 1500 جنيه..شكرا يا رجالة و سلام عليكم...دى العربية كانت لسه فى صيانة ال 5 آلاف..أغير لها ب 1500 جنيه حزام أمان....لييه ؟؟

*"مدير خدمة العملاء"...منصب يشغله حاليا المهندس عمرو أبو الفتوح.....لا يوجد له مقابل فى العبور..و بجد تبقى كارثة لو كان يوجد مقابل....لإن مكان مكتب المهندس عمرو تحت نظر العملاء..يعنى مش لازم أسأل عليه...

*الحسنة الوحيدة فى العبور هى غسيل العربية من الداخل و الخارج مجانا و دائما..فى المقطم فى مغسلة بس يا بمقابل مادى أو مش عارف إمتى بتستعمل.....على كل فى الآونة الأخيرة ....كل العربيات الفلوانس بالذات و اللوجان الجديدة بتروح العبور و تتخزن هناك و لازم تتغسل قبل ما تتسلم أو تروح للموزعين على ما أعتقد...فأصبحت المغسلة متخمة بالعمل أكتر من الورشة نفسها....و بقت العربية تتغسل فى سنة و غسلة مالهاش أى لازمة..أفضل يسيبونى أروح و أغسلها أنا تحت البيت ....

*أنا بأروح العبور إكراما لأصدقائى فى المقطم علشان ما أعملش زحمة على الفاضى..يعنى فى صيانات ال 25 و ال 35 و ال 45 المجانية إللى مافيهاش غير تزويد مياه مساحات و تربيط عفشة بالكتير....

و أنا فعلا بأقول أصدقائى لإنى بعد 3 سنين تعامل...اكتشفت إنى بأسلم على ناس كتير فى المقطم ...يمكن أكتر من الناس إللى بأسلم عليهم فى المنطقة بتاعتى...و ده بحكم التعامل الكويس بيننا على مدار الفترة السابقة ...

اقتباس:

---

المشاركة الأصلية كتبت بواسطة ecybrarian

الف مبروك يا فنان...وتتربي في عزك

---

الله يبارك فيك يا باشمهندس هشام و تحضرها و هى عروسة :ma:

اقتباس:

---

المشاركة الأصلية كتبت بواسطة gebreel

طيب انا عندي تكتكة بتحصل وانا بلف بس وانا فاتح الاشارة بس تكتكة كثير

---

مش فاهم
يا باشا التكتكة بتكون مصدرها الدركسيون و هو بيلف..تلاقيه بيعمل صوت تكتكة أو احتكاك بلاستيكى مش معدنى فى نقطة ما و هو بيلف....ممكن التكة إللى فى آخر لفة الدركسيون كمان بيكون صوتها عالى أوى....اختفت بعد تغيير الشريط
على فكرة.لمبة ال Airbag مش منورة على طول...هى جات لها فترة تنور و تطفى و بعدين راحت لوحدها و بعدين مرة يمكن قال لى check Airbag برضه راحت لوحدها و بسرعة....أنا تخيلت وقتها إن الفيشة تحت الكرسى مهزوزة...بس ما عرفتش أوصل لها..و سكت على الموضوع

اقتباس:

---

المشاركة الأصلية كتبت بواسطة chato_eg

مش فاهم
يا باشا التكتكة بتكون مصدرها الدركسيون و هو بيلف..تلاقيه بيعمل صوت تكتكة أو احتكاك بلاستيكى مش معدنى فى نقطة ما و هو بيلف....ممكن التكة إللى فى آخر لفة الدركسيون كمان بيكون صوتها عالى أوى....اختفت بعد تغيير الشريط
على فكرة.لمبة ال Airbag مش منورة على طول...هى جات لها فترة تنور و تطفى و بعدين راحت لوحدها و بعدين مرة يمكن قال لى check Airbag برضه راحت لوحدها و بسرعة....أنا تخيلت وقتها إن الفيشة تحت الكرسى مهزوزة...بس ما عرفتش أوصل لها..و سكت على الموضوع

---

الف شكر يا باشا على تعبك معايا بالنسبة لموضوع التكتكة التكتكة صوتها عالي بس لما ببيقى فاتح الاشارة بس بيبقى حوالي 3 او 4 تكات

مفيش اي لمض للايرباج نورت ولا اي error او حاجة مش مظبوطة حاصلة

بالنسبة لموضوع العبور ولا المقطم انا المقطم اتعاملت معاه ببقى رايح من الساعة 8 الصبح و ببقى العربية رقم مش عارف كام مش مشكلة المهم العربية تتعمل كويس بس الفكرة كلها بلاقي العربية دخلت و مختفية اطلع ابص عليها في المكان اللي قبل الورشة ده الاقيها واقفة زي ما هي و محدش قربلها من ساعة ماستلموها مني اروح للمهندس اققله (في الغالب حسام بحس انو مش عارف حاجة او مش عاوز ياخد قرار) الاقيه يقلي طيب هتدخل و شوية الاقيها تدخل يعملوا فيها حاجة و تتركن على جنب كثير و فجأة يبدأو تاني و لما تخلص محدش بيقلي لما اروح اسأل بالصدفة يقولولي اه دي خلصت و واقفة هناك كمان !!!

و كنت خليتهم يركبو البريك و جربته و انا هناك لقيتو احيانا الفتيس مبيباتش في حارته قلتلهم قالولي ده اقصى حاجة نقدر نعملها ازاي يعني؟!!!

مبروك يا هاني بيه و إن شاء الله دايما مستمتع بيها في الخير .

بصراحة إتبسطت جدا إن حضرتك طلبت تغيير طلمبة المياه بالمرة ........ فعلا طلب واعي أحييك عليه . :Ta_clap[1]: :satelite:

اقتباس:

---

المشاركة الأصلية كتبت بواسطة Col. Eng. Khaled

مبروك يا هاني بيه و إن شاء الله دايما مستمتع بيها في الخير .

بصراحة إتبسطت جدا إن حضرتك طلبت تغيير طلمبة المياه بالمرة ........ فعلا طلب واعي أحييك عليه . :Ta_clap[1]: :satelite:

---

أشكرك على الإطراء..بس إحقاقا للحقيقة أنا ما طلبتش أى حاجة ....هما قالوا لى هتتكلف 3 آلاف فعرفت إنهم ناويين على الخير كله...فقلت أما نشوف هيبان عليها و لا لأ...

فعلا تستاهل...أنا حاسس إن واجب car Care محترم معاها و هترجع كأنها عاملة 100 كيلو مثلا....لدرجة إنى بأفكر..طيب الواحد ما يجى على نفسه حبتين و يعملها كل سنتين بدل 3 ما دام هى مبسوطة أوى كده...أصل أنا أحب العربية إللى بيبان عليها النعمة....مش تغرمنى و ما تردش الجميل زى القطط....

حضرتك قربت عليها أكيد...شد حيلك يا باشا...آه غرامة ..بس مش هتحس بالألم غير ساعة الدفع و بعد كده هاتقول مش خسارة فيها.....ممكن تعملها على فكرة فى إسكندرية و مادام اتعملت فى المقطم فى يوم يبقى أكيد فى اسكندرية برضه مش أكتر....

خلاص داخل - إن شاء الله - على صيانة 55000 كم ، و فعلا ناوي حتى لو ما قالوش إني أغير طلمبة المياه .

اقتباس:

---

المشاركة الأصلية كتبت بواسطة gebreel

الف شكر يا باشا على تعبك معايا بالنسبة لموضوع التكتكة التكتكة صوتها عالي بس لما ببيقى فاتح الاشارة بس بيبقى حوالي 3 او 4 تكات

مفيش اي لمض للايرباج نورت ولا اي error او حاجة مش مظبوطة حاصلة

بالنسبة لموضوع العبور ولا المقطم انا المقطم اتعاملت معاه ببقى رايح من الساعة 8 الصبح و ببقى العربية رقم مش عارف كام مش مشكلة المهم العربية تتعمل كويس بس الفكرة كلها بلاقي العربية دخلت و مختفية اطلع ابص عليها في المكان اللي قبل الورشة ده الاقيها واقفة زي ما هي و محدش قربلها من ساعة ماستلموها مني اروح للمهندس اققله (في الغالب حسام بحس انو مش عارف حاجة او مش عاوز ياخد قرار) الاقيه يقلي طيب هتدخل و شوية الاقيها تدخل يعملوا فيها حاجة و تتركن على جنب كثير و فجأة يبدأو تاني و لما تخلص محدش بيقلي لما اروح اسأل بالصدفة يقولولي اه دي خلصت و واقفة هناك كمان !!!

و كنت خليتهم يركبو البريك و جربته و انا هناك لقيتو احيانا الفتيس مبيباتش في حارته قلتلهم قالولي ده اقصى حاجة نقدر نعملها ازاي يعني؟!!!

---

تكتكة الشريط مالهاش علاقة بالإشارة....جايز فى اللوجان فى علاقة...و جايز تكتكة لحاجة تانية خالص...
أنا برضه اتعرضت لنفس الوضع فى المقطم فى صيانة....خلصوا العربية فى ساعة زمن و بعدين اتركنت طول اليوم من 10 صباحا وقت ما خلصوا الشغل إللى فيها لحد 4 عصرا و أنا شايفها بعينى و عمال أروح و آجى زى النمر إللى فى القفص...بس لا كلمت مهندس و لا غيره....و فضلت لحد ما الكاشير الساعة 4:30 قال لى هو ليك عربية ؟؟؟
و ظهر إن مش كل إلللى أنا عايزه اتعمل و العربية باتت لتانى يوم بعد ما قعدت عندهم من 8 إلى 5 على الفاضى...تانى يوم العقيد خالد أخدنى و رحنا للمهندس عمرو أبو الفتوح...
بس برضه شهادة حق..أنا كنت شايفهم من وراء الزجاج..ما كنش فيه أى حد قاعد مش شغال...فى ضغط شغل..فى كربسة...الكثير من عدم التنظيم..بس بعد كده الأمور اتظبطت و أصبح مافيش عربيات تدخل من غير حجز و أنا شايف إنهم بيعملوا بعض الحاجات إللى بتدل على إنهم عايزين يحسنوا....بنوا showroom مقفلة مثلا...يعنى..شكل موضوع أبو رواش لسه حباله طويلة...بس هما برضه مش عايوين يصرفوا فى المقطم و هما أكيد أكيد هايعزلوا أبو رواش..مكان كبير أوى هناك

بس من يومها..و أنا بأروح العبور فى الصيانات الخفيفة....و ما أقولش على مشكلات كتير...أسيبهم يركزوا فى حاجة أو اتنين بالكتير أوى....آخدها فى ميعاد كويس و معمولة كويس و كده كده اليوم رايح...مش مشكلة..هما 4 أيام فى السنة....إيه يعنى..ماشى بعربية مظبوطة..مش تضييع وقت خالص..بالعكس...

اقتباس:

---

المشاركة الأصلية كتبت بواسطة col. Eng. Khaled

خلاص داخل - إن شاء الله - على صيانة 55000 كم ، و فعلا ناوي حتى لو ما قالوش إني أغير طلمبة المياه .

---

غالبا هايقولوا :-).....هو واجب العربية عندهم ..حتى لو أخدت بالك فى الفاتورة مكتوب صيانة كبرى...أول مرة أشوف العبارة دى....

المبلغ معقول في مقابل السيارت الأخرى في نفس الفئة

اقتباس:

---

المشاركة الأصلية كتبت بواسطة د.محمود صلاح

المبلغ معقول في مقابل السيارت الأخرى في نفس الفئة

---

و فى مقابل التغير إللى حصل لها....أكيد معقول جدا

عايزين تفاصيل بس أو ترجمة بس بأسماء القطع الى فى الفاتورة للعلم
أصل لسة مغير سير دينامو وعايز اعرف سعره فى التوكيل كام

اقتباس:

---

المشاركة الأصلية كتبت بواسطة abasse

عايزين تفاصيل بس أو ترجمة بس بأسماء القطع الى فى الفاتورة للعلم
أصل لسة مغير سير دينامو وعايز اعرف سعره فى التوكيل كام

---

طقم الكاتينة ب 595 فى الفاتورة......أول بند
و فى كمان سير دينامو فى الأخر خالص و سعره 95.20 جم
طرمبة مياه 450 جم
الباقى زيوت و فلاتر و مياه تبريد و بوجيهات

ألف شكر يا كبير