حساس الاكسجين ..... ارجو المساعده

**amrmaismail** · 24-09-2010 12:31 PM

السلام عليكم شباب المنتدي المحترمين

انا معايا عربيه فيها مشكله من فتره وكنت عرضت المشكله هنا كذا مره بس مافيش حل
طبعا لفيت بيها علي كل الناس وبدأت الافتاءات وطلعوا عيني بدون فايده
( المشكله ببساطه ان العربيه بترتل عالسلانسيه )
المهم اللي قاللي ايديل واللي قال ماف واللي قال بلية اسطوانه وكلهم جربوا فيه تمام
بس انا ماكنتش مقتنع بكلامهم
احنا ناس متعلمه ومش لازم نسمع الكلام كدا وخلاص لازم ندور وراه
المهم قعدت ادور في كل حته لغايه ما نزلت السيرفس مانيوال بتاع الشركه
لاقيت ان المشكله دي ممكن تيجي من حساس الجكمان ( حساس الاكسجين )
قلت اجرب مافيهاش حاجه
المهم فصلت الحساس من الفيشه بتاعته وسميت ودورت العربيه
العربيه بقت احسن والترتيله راحت يبقي اكيد العيب هنا

طب السؤال اللي انا عامل الموضوع ده علشانه هل لو فصلت الحساس ومشيت بالعربيه كدا يحصل ايه ؟؟؟؟
هل فيه خطوره علي حاجه معينه ؟ ؟

ارجو الافاده ومحدش يبخل برايه ويهمني رأي الجميع

**Adham** · 24-09-2010 12:38 PM

حساس الاوكسيجين فايدتة ان الموتور يتعرف على رقم الاوكتان

و عدن وجودة يخللي العربية ماشية عادي بس استهلاك البنزين م مظبوط و سحب العربية يقل شوية بسيطة

انما مش حايسبب مشكلة

الافضل تغيرة لانك حاتدفع تمنة بنزين زيادة في شهور

انزل توكيل ان جي كي بتاع البوجيهات و حاتلاقية عندهم

لان حساسات الاوكسجين بتتباع عند توكيلات البوجيهات, مصنعين لها كذلك

**amrmaismail** · 24-09-2010 02:19 PM

طب سؤال كمان لكل الخبراء المحترمين
اضمن منين ان العيب من الحساس ده بالزات
بمعني انا فصلت الحساس والعربيه اتظبطت تمام ؟
بس انا لما فصلت الحساس الكمبيوتر دخل فال safe mood يعني فتح الرشاشات زاد عن الاول وممكن ده اللي يكون ضبط العربيه
بمعني مش ممكن ان الرشاشات هيا اللي فيها المشكله من الاول ؟؟ ولا ايه رايكم ؟

**Adham** · 24-09-2010 03:31 PM

حط العربية عالكمبيوتر واعمل داينوزس في اي مركز خدمة محترم و فاهم و شوف اية قرايات الحساسات, لو حساس الاوكسيجين بايظ حايبقى قرايتة غلط

**Dr. Halawa** · 24-09-2010 11:07 PM

و مش لازم يكون قارى كمان غيره و خلاص أحسن لك هو المفروض ليه عمر افتراضى 60 ألف كيلو

**EgyptianTune** · 24-09-2010 11:41 PM

المشاركة الأصلية كتبت بواسطة amrmaismail

طب سؤال كمان لكل الخبراء المحترمين
اضمن منين ان العيب من الحساس ده بالزات
بمعني انا فصلت الحساس والعربيه اتظبطت تمام ؟
بس انا لما فصلت الحساس الكمبيوتر دخل فال safe mood يعني فتح الرشاشات زاد عن الاول وممكن ده اللي يكون ضبط العربيه
بمعني مش ممكن ان الرشاشات هيا اللي فيها المشكله من الاول ؟؟ ولا ايه رايكم ؟

التفسير ده مش صحيح فى ال safe mode العربية بتشتغل على أقل نسبة فى الحرق عشان ما يحصلش knocking (تسقيف) وبالتالى العكس اللى بيحصل ولما فصلت الحساس ال ecu مش عارفة تتحكم فى نسبة الهوا/للبنزين وعشان كدة ال ECU بتشغل البرنامج البديل لحماية الموتور .

المفروض يتعمل الآتى :

1. نظف الحساس بإستخدام WD-40 .
2. ركب الحساس .
3. إفصل بطارية العربية لمدة ربع ساعة وبعديها دور العربية (ممكن يحصل تسقيف لمدة دقيقة أو أقل ما تقلقش وسيبها شغالة) .

**Adham** · 25-09-2010 12:28 AM

حساس الاوكسيجين يبوظ لو اترش عليى دبليو دي فورتي لانة فية مادة تزييت

و مفروض اساساًً حساس الاوكسيجين مايتنضفش, لو اتنضف بيتلف و دة اللي اعرفة من مركز الخدمة

لان الكربون اللي بيبقى محروق على جسم الحساس مع التنضيف بيدخل جوة السنسور نفسة و يعزلة عن العادم

و الله أعلم

**amrmaismail** · 25-09-2010 01:08 PM

طيب انا فاصل الحساس من امبارح وبتحرك بالعربيه والنتيجه غريبه جدا
الترتيله اللي عالسلانسيه راحت تماما
الموتور صوته ناعم جدا
سحب العربيه بقي ممتاز انا بلمس دواسه البنزين العربيه بتطير
ايه تفسير الموضوع ده؟ وهل لو ركبت حساس سليم العربيه هتفضل كده ؟ولا اخليه فاصل ؟؟
بالنسبه لاستهلاك البنزين مش هقدر احسبه دلوقتي غير لما امشي بيها شويه

**Dr. Halawa** · 25-09-2010 04:24 PM

كل اللى ها يحصل استهلاك البنزين هايزيد و الانبعاثات الضارة من الشكمان رأيى غيره عشان علبة البيئة ما تبوظش هى كمان

**samirayad** · 26-09-2010 12:45 AM

المهم قعدت ادور في كل حته لغايه ما نزلت السيرفس مانيوال بتاع الشركه
لاقيت ان المشكله دي ممكن تيجي من حساس الجكمان ( حساس الاكسجين )

برافو عليك

عموما

أنا برضه شاكك فى الرشاشات زيك

ولهذا السبب

يفضل أنك تنظف الرشاشات وتركب فيشة الحساس الحالى

طالما هو مش مسجل معاك خطأ على جهاز كشف الأعطال (الأسكانر ) قبل فصل الفيشه حاليا

وتشوف الوضع الجديد عامل أيه