الموضوع: محاولة سرقة الالنترا

اتعرضت لموقف من 3 ايام وحش اوي بس الحمد لله عدي بس قلت احكيلكوا علي تجربتي يوم الثلاثاء 21-9-2010 كنت نازل رايح الشغل و من الطبيعي اني مش بروح الشغل بعربيتي بس يوميها نزلت متاخر و كان باص الشركة مشي على الساعة 11:30 كدة كنت قدام العربية بشيل الغطا من عليها و فوجئت بالي شفته ازاز الباب اليمين الي قدام كله مكسووووور و درج التابلوة مفتوح معرفتش اعمل كنت و احاول افتح العربية الريموت كانه مش موجود طبعا الانذار فضل يرن طول الليل لحد ما بطارية العربية نامت طبعا بصيت جوة اول حاجة على كاسيت العربية و لقيته موجود الحمد لله و مديت ايدي من الازاز فتحت الباب و فتحت بعد كدة الباب الي ورا و منه دخلت لان الزاز الي اكسر كان مبهدل العربية من قدام و حاولت ادورها بكدب نفسي يعني قال يعني مش عارف انها مش هتدور طبعا ما دارتش
اول حاجة فكرت فيها كلمت الكهربائي بتاعي و قلتله يجيب بطارية عشان نعمل وصلة طبعا حذروني انها لو اتعملت غلط ممكن تحرق كمبيوتر العربية بس اتكلت على الله و شيكت على الوصلات انها مظبوطة و قومنا العربية
اه نسيت اقول ان العربية ما سرقش منها حاجة لان درج التابلوة كان فيها حاجات ملهاش اي اهمية لاي حرامي حتي هو رمي الحاجة كلها على الكرسي الي جمبي
بعد كدة رحت القسم عملت محضر عشان التامين
و بعدها طلعت على شركة التامين عشان يعينوها و يصوروها
قلت اطلع بقي على التوكيل اصلح الازاز وصلت الهياكل على الساعة 3:30 قالولي مش بنستلم عربيات دلوقتي مش هنلحق تعال بكرة بالعافية وافقوا تبات عندهم و اجي استلمها الصبح
بصراحة روحت تاني يوم كانت العربية خلصانة بس لحد ما خدتها زي ما انا عايز خد عندك بقي :
اول حاجة الاستاذ الي مفروض يسلمني العربية دخل معايا الورشة و قالي هتلاقي العربية في الوش كدة و سابني طبعا مشيت شوية ملقتش الهربية زعقت طبعا فواحد من الناس الشغالين قالي ما طبيعي انك تشوفها فين قلتله يعني همشي الورشة كلها ادور عليها قالي طب هات اذن الخروج و بعت واحد يشوفها ملقهاش و رجع قالي انا راكنها بره بنفسي قلتله تعال نشوفها لقينها مش موجودة ساعتها انا كنت
دخلنا تاني الورشة لقيت الي خد مني الاذن جايب العربية من اخر الورشة جوة المهم خدت العربية وخرجت و طبعا انا عشان شكاك شيكت على العربية قبل ما اخرج ابص الاقي الفرش بتاع الباب مش متقفل
دخلت ليهم تاني و سالت على الباشا الي اشتغل في العربية المهم خدته وريته الفرش و دخلت معاه تاني الورشة للسروجي لقينا ان الكلبسات كانت مكسورة و البشوات كسلوا يغيروها المهم خرجت برة بعدها بشيك كمان تشيكة الاقي الطبة الي بتقفل على المسماربتاع فرش الباب مش بتقفل و المسمار باين بس للاسف كنت خرجت برة الهياكل فاضريت اعمل اذن دخول تاني دخلت جوة و قفلوها صح و قعدت انتظرت تاني عشان يتعمل اذن خروج للعربية
بالنسبة للتكلفة كانت حوالي 650 جنية
بس الحمد لله و لسة منتظر بقي اودي الفواتير للتامين و يعاينوا العربية تاني بعد التصليح عشان اخد الشيك بتاعي
و دي كانت تجربة بسيطة مع محاولة سرقة عربيتي و الحمد لله انها جات على قد كدة