حد يحب يحصله تغيير جامد؟؟
عارف لما تبقى ماشى فى وسط ملايين البشر و فى إيدك شنط كتير و مش عارف تروح فين ،و الناس مش شايفاك و لا ملاحظة وجودك، و اللى أنت شايله عمال يقع من إيدك واحدة واحدة و مش قادر تتصرف، و لو جربت تنزل تجيب اللى بيقع منك وسط الملايين اللى بيتحركوا دول أكيد هتلاقى نفسك نايم على الأرض و مش عارف تقف تانى.....فيه فترة فى حياة كل واحد فينا بيبقى عامل كدة ،ماشى وسط الناس شايل فى إيده اللى أتعلمه من الحياة و من كل موقف مر بيه ومش عارف يروح بيه فين ومع كل خبطة يبنسى حاجة إتعلمها أو يتخلى عنها....بس أجمل حاجة فى الدنيا لما تقابل وسط الزحمة اللى يشيل منك و يقولك من هنا تعالا الطريق ماشى من الناحية ديه أنا معاك و هوصلك لغاية ما أنت عايز.
سعادة الأطفال حسيت بيها لما كنت واقف فى حياتى الموقف ده و قابلت البنى آدم اللى قالى كدة، و مش واحد لأ دول كتيييير، فجأة ربنا بعتلى ناس و كأنهم طلعوا من خيالى و أحلامى و بقوا حقيقة عشان يساعدونى و بس، جايين يقولولى أنت صح، تفكيرك صح و اللى بتعملة فى حياتك أوعى تغيره، و يقولولى الدنيا حللللللوة و تقدر تعيشها سعيييد مهما مر عليك، بيقولوا أنت مش لوحدك ولا عمرك هتكون لوحدك.
و فى لحظة حسيت إنى مهم جداً فى هذه الحياة.... و إن ربنا إختارنى من كل اللى خلقهم عشان أجى هنا، عشان أقابل الناس دول، عشان يساعدونى، مقدر لى أبقى مميز، عايزنى أعمل فرق فى الحياة، أعمل تغيير فى الدنيا اللى أنا عايشها، عايز وجودى ميبقاش زى عدمة.
يمكن برغم سنى اللى تعدى الأربعين لسة أحلامى كبيرة و محققتش ربعها بس دلوقتى عندى إحساس إنى أقدر أحققها، لأ أنا عندى إحساس إنى هحقق أضعافها، لأ و كمان هساعد كل واحد أقابلة يحقق أحلامه، و كمان حكون المحرك اللى بيدفع الآخرين لتحقيق أحلامهم الدفينة, عارف إن فيكم ناس كتير مايعرفونيش و يمكن منتقابلش أبدا لكن عايزكم تثقوا فى ما أقول, هتقابلكم مصاعب كتير و قرف ما بعدة قرف, لكن أهم شئ الثبات و عدم الضعف و التراجع و الخذلان.
يمكن كل كلمة كتبتها دلوقتى تكون رسالة،و يمكن ربنا قعدنى أكتب ده مخصوص عشانكم أنتم، عشان أنتم مهمين و مميزين، عشان تعرفوا و تتأكدوا إن "الحل هو إنت" و اللى هيخليك تعيش سعيد او تعيس هو "أنت" و اللى هيوصلك لحلمك او هيخليك تفضل فى مكانك هوة برضه "أنت" ،ولو كل الناس اللى إشتغلت علشان الكلام ده يوصلك تعبوا فى ده عشان تفهم الرسالة و تقرأها و تغير حياتك لأنك تقدرررر تسيب بصمة تعيش بعدك سنين طويلة و تقدر تبقى أعظم واحد على وجه الأرض لو قررت.
و تذكر أن كل أنسان فينا مهما كان هو عبارة عن كتاب تاريخ فإما أن يذكر تاريخك السئ أو الجيد.
تحياتى