الموضوع: حراااااااام لحد كده وستوب

السلام عليكم ورحمة الله وبركاته

اولا عايز اقول ان ده موضوع لايخص السيارات ولكن يخص سلوكيتنا فى منتدى النايل موتورز المنتدى الى اغلبيتنا قضى عليه وقت كبير قبل شراء سيارته عشان يسأل ده ويسأل ده
عشان كده بما أن منتدانا يعتبر عامل اساسى لكل واحد بيفكر يشترى عربيه او حتى يدخل عالم السيارات فمينفعش يكون ده شكل منتدانا وعلى فكره سمعة المنتدى ورقيه مش بيحدده غير أعضائه لأنهم هم المسئولين عن ذلك

وعشان كده ياجماعه لازم ندى المنتدى ده حقه على الاقل نقضى على سلبيتنا وانا اولكم عشان نجذب عدد اكبر للمنتدى وفى النهايه احنا المستفيدين عايز اقولكم انا ولا شغال فى المنتدى ولا حتى اعرف مين صاحبه بس صدقونى لما نرتقى بالمنتدى ونقضى على السلبيات الموجوده فيه والى نتجت عن تصرفاتنا المنتدى هايجذب عدد كبير من ملاك السيارات واحنا الى هانستفيد من خبراتهم صدقونى فى ناس بيبقى نفسها تدخل تشارك فى الموضوعات ويبقى ليها عضويه هنا بس للأسف بيمنعها سلبيتنا احنا
صدقونى المنتدى ده ناجح جدا وفادنا كتير فلازم احنا على الاقل نحافظ على النجاح ده او حتى نحافظ على مظهر المنتدى وصدقونى المنتدى ده ليه علينا كلنا حق وانا اولكم وبعترف بده لأنى لما فكرت اشترى عربيه دخلت المنتدى هنا وقضيت وقت كبير ومازلت موجود فيه ونفسى افضل هنا فى المنتدى على طول

ياجماعه انا هاذكر بعض السلبيات بس ياريت كل الى يدخل ويقرأ السلبيات دى ويلاقى حاجه منهم موجوده فيه يوعدنى انه يبطلها وده والله ماعيب بالعكس ده هايعطى المنتدى والمشاركات شكل مختلف تماما

1-الهجوم الغير مجدى على اصحاب المواضيع

يعنى مثلا تلاقى واحد عامل موضوع وتعبان فيه وتلاقى واحد بكل بساطه يدخل يحبطه طب ليه كده دانتا الخسران والله على الاقل لو مش عاجبك الموضوع اعتبر نفسك ماقريتهوش او على الاقل بطريقه متحضره ناقش صاحب الموضوع ويكون معاك دليل وبتتكلم على علم ولو حسيت ان رأيك غلط مش عيب انك تقول انك غلطت ومن واجبك علينا اننا لما نلاقيك غلطان هانصحح المعلومه بكل محبه ومش هانشمت فيك ونقولك (عشان بعد كده ماتفتيش بغير علم)ولما تلاقى معلومه حاسس انها غلط ناقش صاحبها على الخاص على الاقل عشان لما واحد فيكوا يعرف انه غلط مايتحرجش وكمان نستعين بأهل الخبره عشان يفيدونا اكتر ويأكدولنا اذا كانت المعلومه غلط ولا صح


2-الافتراء على عربيه بدون التجربه

يعنى مثلا تلاقى ناس تدخل على العربيه الفلانيه وتقولك دى العربيه دى افشل عربيه حصلت فى الوجود
طب ممكن نسأل حضرتك انت جربتها؟
بصراحه لأ
امال حضرتك بتقول فاشله ليه ؟
اصل فى واحد صاحبى واحد صاحبه يعرف واحد كان ساكن جنبه واحد يعرف واحد مش معاه العربيه دى وواحد صاحبه تانى قالوا انا حاسس ان العربيه فاشله
اه اذا كان كده ماشى ياعم حرام عليك
ده غير بقى الناس الى راكبين العربيه تلاقيه عمال يشتم فالعربيه
ياعم هدى نفسك
لأسيبونى دول ولاد تييييييييييت والعربيه دى بنت تيتتتتتتتتت
ياعم اهدى
لأ
طب بس قولنا ايه الى مزعلك فالعربيه
اصلى وانا ماشى بالعربيه سمعت صوت تزييق
طب ياعم الحاج ده طبيعى عشان العربيه لسه زيرو وكل حاجه فيها بتريح
يعنى ايه هو انا جايب عربيه زيرو عشان تعمل معايا كده
ياعم طب اصبر وبعد صيانة الالف احكم
ماستناش دى فاااااشله وانا هافضحهم ويموت سوق عربيته بأيده ويرجع يقولك دى تقيله فى البيع
وبعد صيانة الالف والعربيه تتربط وتتظبط ايوه كده طب ماحنا قولنالك
لأاصلى انا تعبان اوى فى الفلوس
ياعم مكلنا زيك بس الصبررررررررر
وطبعا بقى المشجعين لازم يكون ليهم دور تلاقى الواحد من دول داخل على الموضوع الى الراجل بيشتم فيه العربيه ويقولك
لاحول ولا قوة الا بالله مالو المستعمل؟
الحمد لله دانا كنت هاتجنن واجيب العربيه دى
وتلاقيه اساسا مايعرفش صاحب العربيه بيشتكى من ايه وواحد تانى يدخل يتضامن لأ العربيه دى انا حافظها دا مافيش حد بيشكر فيها
وهو اساسا مايعرفش حد راكبها وواحد تانى يدخل يكتبلك رثاء على صاحب العربيه والتضامن يشتغل
لأ العقل بيقول اننا نشوف صاحب المشكله ونتأكد انه فعلا المشكله تستحق الحجم الى واخداه ولا لأ (وطبعا كلنا عارفين مافيش اسهل من رمى البلاء دلوقتى ربنا يكفينا شره) ولونقدر نساعده نساعده ودلوقتى كل واحد فينا اكيد ليه واحد صاحبه فى التوكيل الفلانى والتوكيل العلانى نقدر ساعتها نكلم الناس دول ونلاقى حل على الاقل لما الناس بتوع التوكيلات دول يلاقونا ايد واحده يحترموا نفسيهم

وطبعا لازم نتاكد من حاجه هل المشكله الى بيشتكى منها صاحب العربيه دى موجوده فى كل العربيات نفس الماركه ولا دى حاله فرديه عشان نقدر نحكم اذا كان ده عيب مزمن او حاجه ممكن علاجها ولو حاجه ممكن علاجها ساعتها نقدر نشوف لو حد فينا ليه واحد صاحبه فى التوكيل ده وبكده الكل هايستفيد

3-نقل معلومات مغلوطه دون تدقيق

يعنى تلاقى واحد داخل عامل موضوع يقولك فيه العربيه الفلانيه صممتها شركة بورش وجمعتها شركة بى ام وجربتها شركة فرارى وواحد من الفراشين بتوع شركة بنتلى فى بريطانيا اتزنق فى قرشين راح اشتغل فى المصنع بتاع العربيه دى وغسل دواسات العربيه دى اذا العربيه دى بريطانى
لأ كفايه لازم يكون فى حد هنا فى المنتدى فى كل قسم يكون موضع ثقه مسئول عن مراجعة المعلومات والى صح منها يفضل والى غلط مش عيزينوا على الاقل عشان الواحد لما يدخل يشوف الموضوعات الخاصه بالعربيه الى هايشتريها يبقى واثق من انها معلومات صح ويبقى مطمن وياريت لما نلاقى معلومه غلط نناقش صاحبها على الخاص عشان مانيحرجهوش او نحرج نفسنا او تنشأ كراهيه بين الاعضاء


4-طريقة النقاش فى المواضيع

ودى بقى لواحديها مصيبه يعنى عادى جدا انك تلاقى ناس بتتريق على ناس(وانا اسف لأنى عملتها مره بقصد الدعابه وبعتذر مليون مره للعضو ده) وتلاقيى الناس بتغلط فى بعضها
دانتا مابتفهمش حاجه
ولا انت
ياعم عيب
لأ مافيش عيب
لأ بقى فى عيب
ممكن والله الى انت بتتريق عليه ده يكون عنده معلومه هاتفيدك وانت تحرم نفسك منها مش شرط يكون خبير بس على الاقل هايفيدك بتجربته مع عربيه معينه ممكن تشتريها انت او اى حد تعرفه


واخر حاجه صدقونى لو احترمنا بعضنا وارائنا هانشوف المنتدى افضل منتدى وهايكون لينا صوت مجمع نقدر نكلم بيه اصحاب التوكيلات

وعايز اقول انا لما ذكرت السلبيات دى طلبت من الى هايقراها وبطلب منه تانى انه يوعدنى وبكل امانه انه لو وجد احد السلبيات دى فيه انه يبطلها او على الاقل يغيرها
وماقصدتش السخريه من حد انا كل الى قصدته اننا نقضى على سلبيتنا مش كفايه سلوكيتنا فى الشارع

وياريت كل الناس الى نفسها نكون شكلنا احسن من كده فى كل حاجه تدخل وتشارك فى الموضوع ولو فى سلبيات انا نسيتها او ماذكرتهاش وحد عارفها ياريت يوضحهالنا بطريقه متحضره وهادفه

وارجو انى اوصل للهدف الى انا وانتوا نفسنا فيه ونقدر نعمله وهو

السمو بمستوى منتدانا

وارجو من الجميع التفاعل بأيجابيه دى مبادره منى والى شايف انه يقدر يضيف حاجه هابقى سعيد جدا بمشاركته

(مش هاقدر اغير الكون كله لكن يكفينى انى اتغير)