الموضوع: مش عارف اعمل ايه؟!!!!

انا طبعا دكتور اسنان معاكم في المنتدي
من كام شهر جاتلي مريضه بابنها عشان تحشيلوا ضرسوا
حشينا الضرس و نمام وزي الفل
الاسبوع اللي فات اتصال تلفوني الو مين انا فلانه مامه فلان
لحظات تفكير منى لكي اتذكر و اوكي ايه المشكله حضرتك
انا بموت الحقني وجع رهيب انت في العياده دلوقتي لا يا مدام انا مش بقتح الضهر الساعه 5 ان شاء الله اتفضلي ومن هنا لغايه ما تجيلي خدي حقنه مسكنه كذا
جاءت في نفس اليوم الساعه 11 مساء وانا خلاص بستعد
ابص على اللي كانت بتهوي و بتتالم مفيش الم و حلاوه وزي الفل و الضرس مسوس تسويس عادي (حشو عصب عادي )
ياللا ناخد البنج وكانت المشكله
اهات و مياصه مالهاش لازمه ودلع مرق و صويت تقولشي في مركز ولاده
الحفر كان مشكله افظع و يمين شمال وشويه معافره الضرس اتحفر و شيلنا العصب و الحمد لله و اتوكلي على الله يا ست
قبل موعد الزياره التانيه اتهريت تلفونات منها اكتر من 17 ميسد كول و طبعا طنشت لان مش من عادتي ارد على تلفونات ارقام غريبه بالليل وانا في البيت
جاء موعد الزياره وهوب اتصال تلفوني في موعد العياده انت فين ما بتردش ليه عليا انا قلقت عليك !!!!!!!!!!!!!!!!!!!!!!!! مينفعش كده وانت مش فاكرني لالالالا لازم نشوف حل للنسيان اللي عندك ده و شويه مياصه برضه انا جايالك النهارده
اوكي اتفضلي
برضه صويت و وجع و بطريقه مبالغ فيها ولا مستشفى ولاده وعدي اليوم و مفيش اي تجاوب مني لاي حاجه من الدلع بتاعها ده
الوش الخشب اللي مصدره لكل المرضي
هوب كلام عن حياتها و بيتها و خلافاتها مع زوجها و كل ده وانا ساكت ما بنطقش مستمع فقط ولما احب اسكتها عن الكلام احط المرايه بتاعه الكشف في بقها عشان تسكت وبرضه ما بتسكتش
تطور الموضوع معاها لميسدات على الموبايل و بقت حاجه مستفزه اوي بالليل و بالنهار لدرجه ان مراتي بقت بتكنسلها بدالي !!!!!!!!!!!
كلمتني النهارده وانا في شغلي الحكومي الصبح ورديت عليها قلت ان فيه مشكله في الحشو ولا حاجه لقيتها بتقوللي صباح الخير كنت بتطمن عليك !!!!!!!!!!!!!!!!!!!
وانا مال اهلى اساسا بالحوارات دي
انا ما عملتش معاها اي حاجه تخليها تاخد عليا كده
انا لم افتح اي حوار او نقاش جانبي خارج اطار الشغل
المدام دي طبعا ام ل 3 اولاد عندها بتاع 38 سنه (عرفت من شيت البيانات اللي المريض بيملاه ) ومدرسه
اخر ما زهقت من الحوارات السودا عندي اوبشن كده في موبايلي السامسونج بلوك الرسايل و المكالمات الوارده من الرقم ده
بس طبعا سهل جدا انها تتصل بيا من اي رقم تاني و المشكله اني معرفش اغير رقمي عشان ده رقم عيادتي لان مفيش ارضي
اغيثوني بارائكم و مقترحاتكم لاني مبحبش العك المقرف ده ومش عارف اعمل معاها ايه اكتر من كده لاني مش عارف طبعا اطردها ولا اعتذرلها كل مره تيجي فيها تعمل شغل ولا ايه مش عارف وطبعا خايف من الست دي تتبلى عليا ولا تجيبلي مصيبه لو حصلت حاجه مش على هواها
اه نسيت بجمله البخت المايل بتاعي بتقوللي هوه انا لو خلصت شغلي معدتش هجيلك تاني طبعا قولتلها اه
يعني معدتش هشوفك تاني
قلتلها ان شاء الله بلا رجعه قالتلي بس انا عاوزه اجي قلتلها لو عندك حاجه في اسنانك اتفضلي و سلام يا ستي عشان العيان اللي بعدك وصل وربنا يستر من هذا الصنف
طولت عليكم بس عاوز اسرد مشكلتي اللي انا متاكد ان الست دي بتعمل الحاجات دي بقصدها مش تصرف طبيعي

ولا يهمك خليك مستقر ع رايك والدنيا كبيره وسيبها ع الله وان شاء الله خير