الموضوع: رسميا على موقع كيا كوريا وحصريا للكياويه , سيراتو بموتور جديد 140 حصان وفتيس 6 نقلات

المشاركة الأصلية كتبت بواسطة CosmicOne

مكتوب فى كاتالوج للix35 ان الموتور 1.6GDI 11:1 compression ration

بس منتديات ماليزيا بيقولوا مش هاتنزل عندهم كمان غالباً علشان البنزين و ان هيونداى هتعمل موتور Dual CVVT اقوى شويه من الموتور الحالى الى فى السيراتو و بيستعمل بنزين عادى

بردوا قرأت أن نفس التكنولوجيا فى المرسيدس ال C و ال E الى اسموهم CGI , حد يعرف دول عاوزين بنزين كام ؟

انا دورت شويه فى موضوع ال IX35 وال Sportage ووصلت لحاجه هاقولهالكم دلوقتى

المشاركة الأصلية كتبت بواسطة ghazy12

موضوع ممتاز و متميز كالعاده يا حسام.. شكرااا و تسلم ايدك

بالنسبه للموتور, في رأي صعب نشوفه في مصر, و في رأي بردو ان
الموتور الحالي مش ضعيف, بالعكس ده قوي و ممتاز جداا على السيراتو,
لكن انا كنت اتمنى ان التعديل بدل ما يكون في الموتور (اللي هو مافيش منه مشكله)
يكون في نظام التعليق الخلفي, و يرجعوه زي السيراتو الشكل القديم
تاني و الكارينز حالياً (Multi-Link)... ساعتها والله كان الموضوع
اختلف تماماااااا بجد... و يا ريت يعملوا كده فعلاً...

لكن تعديل الجيربوكس الـ6 سرعات هو اللي في الجووووووووووووون...

تقبل تحياتي يا باشا...

بشمهندس غازى صديقى العزيز نورت الموضوع وشرفته بمرورك

اسمح لى أختلف معاك فى نقطة نزول الموتور , انا شخصيا شايف انه ممكن ينزل ليه لأ , زى ما الاستاذ New قال لما الموتور ال 121 حصان حطوه بدل ال 105 وعملوا تعديل بسيط فى شكل الفوانيس

والالنترا الجديده هاتنزل على طول بيه

معقول ممكن ماينزلش ويحطولنا موتور غيره ؟

وبالنسبه لموضوع ال Multi Link

النهارده كنت قاعد بافكر كدا وقولت الحلو مايكملش

بس فى نفس الوقت الواحد هايبقى طماع اوى لو طلب اكتر من كدا فى الفئه دى وبالسعر دا

يعنى موتور 140 حصان وفتيس 6 سرعات وكماليات فل أوبشنز وعوامل امان وشكل داخلى وخارجى تحفه

تخيل بقى لو كمان Multi Link مع ال ESP و TCS وايرباجز زياده مع مثبت سرعه وبارك اسيست والذى منه :)

طب بذمتك سيبنا ايه لاى عربيه تانيه المانى او يابانى لحد 300 الف غير انها تتميز ببلد الصنع ؟

الشركات بتحط كل عربيه تنافس فى شريحه معينه , وبيبقى عندها موديلات تانيه اعلى تنافس الفئات الاعلى

زى الاوبتيما الجديده والكادينزا فيها كل ماتتمنى بس للاسف مبنوشفهاش فى مصر بسبب الجمارك

لكن لو السيراتو اتعمل فيها كل التعديلات والاضافات اللى احنا عايزينها , مفيش شركات تانيه هاتبيع , واولهم كيا نفسها مش هاتعرف تبيع ولا اوبيتيما ولا كادينزا ولا غيره :)

تقبل تحياتى ياكبير

المشاركة الأصلية كتبت بواسطة abouleila

طبعا مش غريب عليك الاخبار دى وانت اللى عودنا على كده .....عاوز كيا روح لحسام

من وجه نظرى صعب جدا وعلى الاقل لمدة 3 سنين يكون فى تعديل فى مصر بالتحديد

على الاقل سعر العربية مش هيقل عن 140 الف ج وصعب كورى 1600 يتباع بالسعر ده والكروز خير دليل على كلامى فى الفرق بين نسبة المبيعات بينها وبين السيراتو

سبب تانى لاازم نعرف ان دى تكنولوجى جديده جدا وبتحتاج وقت علشان تتجرب وال 1600 بيعها مش كتير فى اوربا الاغلب بيكون 1800 او 2000cc .

فكر الشركة هو المنافسة العالمية وتقتحم الاسواق الاوربية بمواصفات واسعار تقترب كتير من مثيلتها الاوربية والفكر العام دلوقتى هو توفير البنزين باى شكل من الاشكال فى اى عربية بتكنولوجى جديد

الخلاصة .

النمر الكورى يقترب وبشدة من المنافسة فى الاسواق الاوربية

الاتجاه العام توفير البنزين بأى شكل

الخطر قادم على السيارات اليابانية .

ابو ليلى الاهلاوى الجامد ( هانكسب النهارده ولا ايه )

واحشنى ياكبير ويارب تكون بخير وكيداهم مش قارفاك ويكون حالها اتصلح

بس رقم 3 سنين دا كتير اوى

هما صحيح لسه يادوب من كام يوم اعلنوا عنها فى كوريا وتقريبا لسه ماباعتش وبيحجزوا للناس تيست درايف

بس اكيد فى خلال شهور هاتنزل فى كل الدول بالتعديلات دى

وبالنسبه لنقطة السعر مش هايكون مشكله خالص مادام تستاهل

وان كان على الكروز دى تعتبر منتشره على فكره متقارنهاش بانتشار السيراتو عشان ماتظلمهاش , لكن تعتبر منتشره وب 140 الف ومفيهاش نص اللى فى السيراتو

وان كان على التجربه الموتور دا حاليا بقى بينزل فى الكيا سبورتاج الجديده والهيونداى IX35 بس مانيوال بس مفيش اوتوماتيك , لكن نفس الموتور 1600 GDI

والخطر قادم على الكل ياكبير :)