الموضوع: حادثه بسيطه لكن ...

الأخوه الأفاضل ،،، السلام عليكم ورحمة الله

عملت حادثه بسيط كالتالي واحد رمى عليا من الشمال حدفت نفسي يمين جامد شويه المهم خبطت العجل اليمين قدام وورا في الرصيف ، العجله اللي ورا الجنط أتعوج فقط
أما العجله اللي قدام الجنط أتكسر والمقص إتعوج .
المهم :
روحت أصلح الجنطين في مخرطه في الحرفيين متخصصين في الجنوط (الحقيقه أكتر من مخرطه)قالوا موش هيرجع زي الأول المهم جبت أربع جنوط 14 جديده وأربع كاوتشات جديده .
جبت مقص جديد (طلع صيني ) بيخلي العربيه تعوم ولما كشف الميكانيكي قال (لما نحل المقص من ناحية العجل وتيجي تدوس عليه لتحت من ناحية المسمار الكبير اللي مربوط في الشاسيه ما بيردش لفوق زي السوسته كده ) المهم جبت واحد إستيراد بـ 90 جنيه ركبته زي الفل والعربيه بقت تمام .
طبعا ركبت بليه كوري في العجله اليمين وعملت زرجينه في نفس العجله وظبط زوايا والدنيا تمام وبعد 3 أسابيع سمعت صوت ونه في العجله اليمين تاني يوم الونه زادت روحت للميكانيكي رفع الجنب اليمين وجبت رابع وزودت بنزين لغاية سرعة 90 ومورت والصوت كان عالي والنتيجه بليه تاني جبت بليه إيطالي بـ55 جنيه وركبتها والصوت راح وكل حاجه زي الفل بدأت أسمع بعد يومين صوت زي رجرجه في الجنب اليمين كله روحت للميكانيكي قالي هانعمل رجلاش لعلبة الدركسيون واتعمل من غير ما يحل السيرفو والدنيا دي والدركسيون تقل شويه والصوت زي ما هوه المهم ريجع شيك على بيض البارات والبارات والتيش والمقص والطنبوه والمساعد وكله تمام لكن الصاموله بتاعت طبة المساعد كانت مهويه شويه (4 لفات كاملين بالمفتاح)وبعد التجربه الصوت راح وتمام أسبوعبن بالظبط وصوت الونه في نفس العجله رجع تاني طبعا البليه روحت للميكانيكي أكد أنها البيه بعد ما رفع الجنب اليمين زي المره السابقه المهم أنا موش عارف ده عيب البليه ولا عيب الميكانيكي ولا حظي العاثر بعض الزملاء والجيران قالوا غير الصوره والبليه والبعض الأخر قالوا غير الركبه كاملةً من البطاحة وحتى الطنبوره .

فرجاءاً زملاء المنتدى حد عنده فكره أيه اللي ممكن أعملوا لأني بقالي أكتر من شهر في القصه دي
العربيه لانوس 2007 هاف عامله 68000 كم وأنا ساكن في النزهه الجديده .

غالبا

الصره تأثرت من أثر الصدمه الجانبيه وبها لوحه

والمفروض تغيرها

لعدم تكرار تلف البلى]

والله يا باشمهندس سمير ده فعلاً اللي أنا ناوي أعمله إني أجيب صره + بليه وتركب على مكبس موش دق زي الأستاذ ممدوح ما قال .

وشكراً ياهندسه على ردك وإهتمامك .