الميكروباص عمل حادثة النهاردة الصبح

**kar!m** · 26-09-2010 09:18 PM

السلام عليكم

النهاردة نزلت صليت الفجر و رايح أركب ميكروباص عشان رايح شغلى .. ملقتش الا الكنبة اللى فى اخر الميكروباص فاضيه و الناس واقفه مستنية حد يركب ورا .. أنا مبحبش أركب فى المكان ده بس عشان كنت مستعجل قلت اركب بدل ما استنى عربية تانية تحمل.

و احنا فى الطريق .. و انا قاعد أقول أذكار الصباح .. السواق بياخد غرزة من على اليمين لقى كارو قدامه .. أنا كنت متابع قدام و لقيته بيهدى و بيحاول يلم شمال .. و طرررررااااااااخ

ميكروباص 26 راكب خبط فينا من ورا . أنا للحظه محستش ان كنا خبطنا من قدام ولا من ورا .. بس لقيت نفسى كلى ازاز و راسى توجعنى .. مش عارف لحد دلوقتى أنا راسى خبطت فى ايه.

طبعا السواق ركن و نزلنا و العربيات كلها و قفت ..السواقين قعدوا يتخانقوا .. نعمل محضر ..لا انت اللى غلطان .. لأ انت .. المهم كل واحد خد عربيتة و مشى .

طبعا أنا و الاتنين اللى جنبى كنا واخدين نصيب الأسد من الخبطه .. هما كان هدومهم عليها دم .. و انا الحمد لله كان عليه ازاز مكسر بس.. طلعت القميص بره البنطلون و قلعت الجزمه و نفضت نفسى .. و كملنا الطريق من غير زجاج خلفى.

الحمد لله .. قدر الله و ما شاء فعل.

**mahmoud_afifi** · 26-09-2010 09:28 PM

لا حول ولا قوة الا بالله , حمدلله على سلامتك والحمدلله انك سليم بس لازم تكشف لو حاسس بأي وجع لا قدر الله.

اكتر حاجه بتخوفني في طرق مصر فعلا هي الغرز الي من على اليمين, ممكن يكون حد واقف ويتخبط بسبب الغرز دي. ربنا يحفظ الجميع وألف سلامه على حضرتك.

**m7nsh** · 26-09-2010 09:29 PM

الف مليون حمدلله على سلامتك .. قدر الله و ماشاء فعل

والله معظم سواقين الميكروباصات دول عاوزين ضرب النار .. بجد بيسوقو بعته و بغبااااااااء شديد و كأنه نفسه يعمل حادثه !!

قدر الله و ماشاء فعل و الحمد لله انها جت على اد كده

**Mahmoud Mosaad** · 26-09-2010 10:03 PM

الف حمد الله على سلامتك يا باشا

**sayed911** · 26-09-2010 10:22 PM

هوة بيعتقد او خيالو بيهيألو انو مادام شغال على الطريق 12 ساعة في اليوم يبقى هوة اللي سواق واحنا كلناااااااااااا مش بنعرف نسوق وانو هوة اللي فتك وبياخد غرز وبيجري واحنا كلنا بطئ بنسبالوا ولكن لما بيعلموا حاجة او بيخبطوا حاجة بيبان معندهم الحقيقي ولكن طبعا مش كل الفئات كده وربنا يستر علينا وعلى الكل يا رب العالمين والف سلامة عليك يا اخي وانا شايف تاخد اجازة يوم عشان ترتاح من الصدمة وتريح دماغك من الخبطة وترتاح شوية برضوا والله الموفق يا اخي وتحياتي ..

**mhmdalsaadany** · 26-09-2010 10:31 PM

الف حمد لله علي سلامتك
وربنا يرحمنا من السواقين دول انا ساعات لما بكون مش مستعجل ولاقيت السواق شاب كدا والعربيه كلها استيكرات وكاسيت صيني على اخره مش بركب احسنلي واستنى راجل كبير شويه عشان يطلع على قده وكمان يكون نازل ياكل عيش مش يموت الناس
بس الكلام دا لما بكون مش مستعجل
لكن النصيب ساعات بيحكم والحمد لله جت سليمه واهو كله في ميزان حسناتك ان شاء الله