الموضوع: لغز فقر ورفاهيه المصريين فى مصر

شكرا لاستاذ علاء على نقل المقال و طرحه للمناقشة :)

الرجل بقى اللى كاتب المقال راح شاف شارع و لا اتنين فى مصر شاف فيهم كام سيراتو و كلم 2 صحابه فى التليفون اكتشف على طول الحكمة العظيمة و السر الرهيب. و بيوصف المصريين اللى عايشين هنا بألفاظ مش عايز أكررها
كان ناقص يحكى و يقول: و بعدين رحت بلد كده اسمها مارينا و لقيت المصريين عايشين كويس و بيدعوا الفقر.

لأ و انا كنت فاكر انى من الطبقة المتوسطة خلانى أكتشف المعجزة انى من الطبقة الفقيرة...مانا مش بصيف فى اسبانيا و لا فلوسى كانت تكمل السيراتو. يبقى انا كده فقير!
هو الظاهر نسي هو سافر ليه ؟.. و طالما شايف ان الموضوع عادي أوي كده ميرجع يعيش وسط أهله بدل الغربة
أولى له فى الوقت اللى كتب فى المقال انه يصلى لربنا ركعتين شكر انه مبقاش مصيره زي ناس كتير هنا.
مبيحطش فى باله نسبة السكان...لو واحد قال 20 مليون أغنياء يقول يااه البلد مفيهاش فقير و ناسي باقى السكان.
أرتفاع الأسعار لأن نسبة السكان اللى معاها القدرة الشرائية بتتنافس فى الشرا و اللى بيتأثر هى الطبقات اللى تحتهم.
أرتفاع أسعار الأراضى لأن التوسع العمرانى شبه منعدم من ناحية و من ناحية تانية عدد السكان اللى معاها قدرة شرائية كتير بالنسبة للمعروض.
المقال ده تشبيه فى دماغى لواحد عمال ينضرب جامد بقاله كام ساعة و بيقول أي و واحد تانى من بعيد "فى الطراوة" بيستنكر و مش عاجبه و بيقول: هو بيتأوه ليه؟ ايه الدلع ده؟

فعلا
الراجل ده مش عايش فى مصر

هو الشيء المؤكد من وجهة نظري ان اغني 30 مليون مصري اغنى بكتير من ال 30 مليون اللي عايشين في الجزيرة العربية
و الدليل
اننا بنشتري كل حاجة اغلى من هناك
عربيات اكل لبس
و دول برضو طبقات

و في 20 مليون بيتعلفو في ديلهم
و دول اللي عايشين الفقر مكان و مكانة بس بيصرفو كويس
و دول اللي بيخدمو على ال 30 اللي فوقيهم
من نوعية سمكري سباك و هكذا
و يمكن الناس دي بتضيع جزء كبير من دخلها المعقول جدا على العبط
موبايلات- حشيش- نسوان- اي هجص و السلام


اما ال 30 مليون اللي بعدهم فهم دول الفقر نفسه
لا عندهم امكانيات بشرية و لا مادية ينذو نفسهم من الوضع اللي هما فيه
و لا حد بيبص لهم
و تقريبا ال 50 مليون اللي فوقيهم نفسهم انهم يموتو و يفضو البلد شوية

السؤال
هي فين الدولة اللي بتنظم العلاقة بين كل دول
الاجابة
بتصيف في الساحل

واضح ان الي كاتب المقال بيعاني من عقده بيعاني منها اغلب الى سفروا برا
وهي انه بيسافر وكل تفكيره انه هيرجع والفلوس الى حواشها دي هتخليه أحسن واغني واحد فى المكان الى عايش فيه
يجي يلاقى الى موجودين هنا بقو احسن منه وعملو فلوس أكتر منه فبيبقى هيتجنن يعني انا سافرت واتبهدلت واتغربت وفى الاخر ارجع الاقي نفسي اقل من الناس الى لا سافروا ولا تبهدلو ولا شقيو فى الغربه زيي ؟
دي بتكون طريقة تفكير معظم الى بيسافر ويرجع يلاقى نفسه متساوي او أقل من الي مسافرش

المشاركة الأصلية كتبت بواسطة makka

والله يا استاذ migo123 الحاجه الوحيده اللى فى كلامك اللى متفق فيها مع حضرتك ان مصر بلد التناقضات اما باقى الكلام لا طبعا والامثلة اللى حضرتك ضربتها مش مقياس ابدا ومردود عليها زى سعر فدان الارض وصل لـ200 الف بيحصل بس مش معنى كده ان الناس معاها 200 الف بيحصل بيع وشراء اه بيحصل بس ازاى؟ عيل خلص تعليمه وجيشه ركب مركب وطلع ايطاليا اشتغل باليورو عامل فى مزرعة مواشى حرم نفسه من كل حاجه وبعت لابوه الفلوس اشترى فدان ارض لان الناس دى بتقول كله زايل مبيفضلش غير الارض مع انه لو اشترى ميكروباص الميكروباص هيجيبله فى شهر اللى الفدان بيجيبه فى سنه. وواحد تانى اشتغل عمره كله فى الخليج راجع بـ200 الف اشترى فدان ارض ولا جوز بناته. واحد تالت اشترى فدان الارض عشان هو عنده محل بقاله جملة ومشغل عنده 20 واحد بيدى الواحد فيهم 10 جنيه فى اليوم ويلم الوفات على قلبه.

للأسف يا باشا 3 اصناف الي حضرتك زكرتهم نسبتهم بالنسبه للبيشترو الاراضي صغيره بالنسبه للصنف الرابع
الصنف الرابع : اللى بيكون حيازته تعدت ال 40 فدان وفي الحاله دي بيكون دخل ال40 فدان دول يجبله فدانين جداد سنويا
يعني بعد أقل من 15 سنه بيكون بقى عنده 80 فدان تقريبا ودول يجيبولو فى السنه 4 فدادين وهكذا .....
لانها بتتحسب بطريقه مركبه لأنه بيشتري كل سنه فدانين والفدانين دول هيجبوله دخل السنه اللى بعدها وبعد فتره دخل الاجمالى هبيجيب ليه 3 فدادين فى السنه مش فدانين وهكذا
ملاحظه : المثال دا من الواقع لحد أعرفه

وجهة نظري ان في الواقع الى احنا عايشينه ده الغني بس هوا الى بيغتنى ويزيد غنى والفقير بيزيد فقر عكس كده ان فقير يغتني نادر جدا ولو حصل فده الاستثناء اللى يأكد القاعده
بمعني تاني الي بيحصل دلؤتى هو عودت الاقطاع من تاني بشكل اكثر شراسه

وعلى فكره فى مناطق وقري فى الدلتا وصل سعر الفدان ل 400 الف جنيه (الزراعي مش المبانى)

المشاركة الأصلية كتبت بواسطة Migo123

بصراحه انا شايف أن المقال بيرصد تناقضات كتيير كلنا عايشنها.... والاخوه اللي بينعتو المقال بالسطحيه وكاتبه بالعماله للحكومه نظرتهم هي الاخرى في منتهى السطحيه

طب يا سيدى شكرا.....بس إزاى المقال مش سطحى لكن نظرتنا هى الاخرى سطحيه؟

رغم ما يدعونه من عمق وتعاطف مع الفقراء ......... كل واحد بحكي تجربته عن معايشته لفقراء ويرصد ملاحظاته التي تدلل على رقة قلبه وعمق مشاعره.....

حضرتك أعتقد ملكش الحق تقول ( ما يدعونه ) لانك لا سبق قابلتنى ولا تعرفنى معرفه شخصيه...ولو حصرتك شايف ان الامثله اللى انا طرحتها الغرض منها ( التدليل على رقه قلبى وعمق مشاعرى)...حسب قولك..فبرضو ملكش الحق تفترض وتقرر ان الغرض من مشاركتى ايه لان نيتى يعلم بيها اللى خلقنى فقط..ومحدش هيدينى جايزه على رقه قلبى مثلا!!! ومع ذلك امثلتى مفيش حد فينا متعرضش لموقف مشابه الا لو عايش فى بلد تانيه غير مصر...

طب حد يقولي ليه الشقه في المناطق الشعبيه توصل 200 - 300 الف جنيه وازاي يبقى في طلب بالمبالغ دي في الاماكن ؟؟؟

اقوللك انا....

المناطق الشعبيه ذات كثافات سكانيه مرتفعه جدا.....وبالتالى ندره السكن فيها بعزز الطلب والقوه الشرائيه عن العرض وحسب ما اعتقد لما الطلب يزيد عن العرض بيرتفع سعر السلعه ويرتفع لسعر مبالغ فيه غير متفق مع القيمه الحقيقيه للسلعه فى حاله الندره النسبيه للسلعه....

والمناطق الشعبيه اللى بتوصل فيها الشقه للمبلغ المذكور فهى مناطق تجاريه قديمه نادرا ما يوجد بها مساكن شاغره وعلى سبيل المثال لا الحصر شارع شبرا ومنطقه خلوصى....اما منطقه زى ابو رجيله مثلا فالشقه تباع فى حدود 120 الف وبالقسط.....

ازيدك من الشعر بيت...

إزاى واحد مرتبه 500 جنيه وعايش فى شقه ب 200 الف....؟

معظم الشقق اللى فى المناطق الشعبيه موروثه عن الاباء والاجداد.....أو ايجار قديم وجديد....

لكن الشباب مثلا لما بيدور بيطلع على العبور والشروق واكتوبر لشقق ال 68 متر بالقسط ومدعومه...

مثال صغير...

بيت العيله عندى المتر اشتراه جدى ب 6 جنيه قسط...دلوقتى متر الارض ب 6000 كاش...والشقه ب 80000 يعنى البيت يعمل نص مليون جنيه ...يعنى نبقى مليونيرات لو بعناه بس لو بعناه هنشترى بتمنه شقه فى النزهه مثلا...ونكمل تمنها قسط..

ازاي فدان الارض الزراعيه اللي كان سعره 50 الف وصل لغايه 200 الف جنيه و نزل حاليا بعد الازمه الاقتصاديه ل 170 الف جنيه
يعني محافظات مصر الفقيره التي تعاني من نقص الخدمات زي مافيها فقر مدقع .... برضه فيه طلب على العقارات والاراضي ادى لتضاعف اسعارها

أفتكر فى رد سابق على النقطه دى..


والفقر بكل مظاهره موجود دائما وسيظل موجودا الى آخر الزمان ومش هو ده اللي بيناقشه صاحب المقال ....... الفكره ان المصريين بيشتكوا كتيييييييييييييير ولكن الشكوى كلها كلام في كلام .... وكتير منهم بيشتكو عشان يدارو على شمعتهم و عشان خايفين من الحسد ومنهم اللي اتعود على الشكوى وخلاص ... لكن لو كانو فعلا .بيعانو كانو اتحركو لرفع الظلم

الله يرحمك يا خالد سعيد...ويمسيك بالخير يا ايمن نور ....وياخدك يللى فى بالى....