عمل صيانة لعفشة كورسا سيدان وشكر واااااجب لطنانى باشا
السلام عليكم ورحمة الله وبركاته
العربية معايا كانت فيها شوية مشاكل فى عفشة العربية وكالعادة كلمت طنانى باشا اللي عمره ما بيتأخر على حد وفضل معايا خطوة بخطوة طول فترة الاصلاح وهو اللى دلنى على العفشجى بتاعه.
ندخل بقى على التفاصيل:
الاول احب اعرفكم ان العربية كورسا سيدان 2007 ماشية 52 الف ومركب فيها جنوط 15 وكاوتش مقاس 205X50 15R وطبعا العفشة عذااااااااب مع الطرق الغير ممهدة وبالذات عيون القط، تحس ان عفشة العربية بتتملخ لكن فى المقابل ثبات ممتاااز (لسه مجربه على ملفات طريق شرم الشيخ)
الاعراض بقى انا كان عندى صوت فى العفشة (صوت تكتكة كده) لما اجى اعدى على طرق مكسرة وكنت متضايق منها وعايز اصلحها، كلمت طنانى بيك وقولتله على الاعراض وكده وهو كان معترض انى اغير حاجة فى العربية وهى لسه ماشية 50 الف بس.
المهم وصفلى مكان العفشجى بتاعه ورحتله ومصطفى ابن صاحب الورشة هو اللي بيقف فى رمضان وكشف على العربية وقالى المطلوب الاتى:
1- طقم جلب مقصات (الكبيرة والصغيرة)
2- تيش ميزان (واحد)
3- بطاحة
رحت جبت الحاجة من عند امريكان ستار فى شارع شامبليون والاسعار كانت كالتالى:
1- طقم جلب مقصات (الكبيرة 500 والصغيرة 170) مش فاكر الصراحة ماركة ايه
2- تيش ميزان (جيبت اتنين ب 170) ماركة MOOG اتحاد اوربى
3- بطاحة (جيبت اتنين ب170) ماركة فيبى المانى
رحت للراجل وركبلى الحاجة وقالى مش محتاجين جلب المقصات الكبيرة وانها مش بتتغير، طب قولتلى اجيبها ليه!!!!! المهم جيه وقت الحساب قمت مكلم طنانى وطلب انى ادى التليفون لمصطفى وبعديها طلب مصنعية 80 جنيه، وطلب انى اعدى عليه كمان اربع ايام عشان يربط على الحاجة اللى ركبها وطبعا ماشى من عنده العشفة بقت حاجة تانية خاااااالص ومش حاسس بحاجة تحت العربية لكن كنت بحس بخبط بسيط اوى فى الدركسيون.
و للاسف بعد ما مشيت من عنده بيوم ابتديت احس بمشكلة لما اجى اركن العربية واكون برجع مارشدير وكاسر الدركسيون الاقى الكاوتش قفش والعجلة مش راضية تلف بسهولة لكن فى الطريق الطوالى مفيش ادنى مشكلة
رحت اظبط زوايا عند بريدجستون وفنى الزوايا قالى ان بارات الدركسيون بايظة وعايزة تتغير. :H_angry[1]:
كلمت مصطفى وقالى الراجل بيفتى وغير بتاع الزوايا وانا كاشف على العربية والبارات كويسة وقولتله على مشكلة قفش العجل قالى تعالى ابوصلك عليها، رحتله وطلعت مع واحد من عنده وشخص الموضوع انها محتاجة اكواز بطاحات وقولتله على البارات قالى انها فعلا محتاجة تتغير.
طبعا اتضايقت ولما انت بصيت على العربية وكشفت عليها وطلبت حاجات معينة وجاى دلوقتى بتطلب حاجات تانية وعايز ترجع حاجات انت بنفسك طلبتها!!!! المهم كالعادة كلمت طنانى وقالى ان ليا حق ازعل وطلب انى اجيب الحاجة واصلح العربية واسيب الراجل وامشى ولو طلب مصنعيته اقوله حسابك مع طنانى.
فرحت جبت التالى:
1- رجعت الجلب الكبيرة وجبت طقم اكواز بطاحات ب 170 جنيه GM
2- جبت بارات الدركسيون من عند سرور ب180 جنيه ماركة driveway برازيلى
ورجعت لمصطفى ركبلى الحاجة ومردتيش امشى غير لما سألته عايز كام وطلب 20 جنيه.
ورحت ظبطت الزوايا والعربية الحمد لله بقت ممتازة.
وجبت تيل فرامل امامى مايلى من سرور ب170
شكرا طنانى باشا على الواجب الجامد ده.
الصور
