الموضوع: الحل إلى كل من عنده مشكلة بكاسيت رودستار النترا خليجى 2011

بسم الله والصلاة والسلام على رسول الله

البداية كانت لما اشتريت سيارة النترا خليجى 2011 فتحة سقف وجنوط المشكلة ان الكاسيت (مرفق صورة) مكانش بيحفظ الاعدادات اللى بعملها ولما اضبطه واقفل الكونتاك وافتحه تانى يروح كل الضبط واضطر اضبطه من جديد ، قلت اتصل بتوكيل الكاسيت وفعلاَ اتصلت بيهم قالولى لازم تجيبلنا العربية نظراً لا التوكيل بالقاهرة وانا من سكان الاقاليم (البحر الأحمر) ونظراً لبعد المسافة ... قلت يا واد اتكل على عرقك .... رحت مدور على الكتالوج بس للاسف لقيت الكتالوج اللى جاى مع الكاسيت عربى ومش واضح فيه اى حاجة ... انا شكيت فى تركيب الاسلاك ... المهم جبت الكتالوج من ع النت وواضح فيه كل حاجة زى الفل - بس الطامة الكبرى انه مكتوب باللغة السويدى ... رحت على عم جوجل بارك الله فيه وترجمت من السويدى إلى الانجليزى ... والحمد لله عرفت المشكلة فين وبفضل الله المشكلة اتحلت والكاسيت بقى زى الفل وبيحفظ اى اعدادت اعملها فيه ... واللى جعلنى اطرح الموضوع انى لقيت كل اللى معاه النترا خليجى 2011 عنده نفس المشكلة ... قلت اعرض الحل عليكم لعل يكون حد من الاعضاء عنده نفس المشكلة

نيجى للمهم الحل :
1- أولاً لازم نفك الكاسيت وده عن طريق حتتين حديد كده بنحطهم فى الجنبين مع بعض بيروح الكاسيت يطلع على طول .
2- حنلاقى 2 فيشة واحدة صغيرة خاصة بالباور (الكهربا) وواحدة كبيرة شوية خاصة بالسماعات
3- فى الفيشة الصغيرة حنلاقى سلكين احدهما أحمر غليظ شوية وآخر برتقالى حنقطع كلا السلكين .
4- حنبدل الاسلاك فى اللحام يعنى حنوصل الاحمر اللى جاى من الطبلون بالبرتقالى اللى فى الفيشة والبرتقالى اللى جاى من الطبلون بالاحمر اللى فى الفيشة .
5- نركب كل حاجة زى ما فكناها وحنلاقى كل حاجة بقت تمام والكاسيت بيحفظ كل حاجة . واستمتع وادعيلى

تحليل المشكلة :
المشكلة ان فى مدخلين للكهرباء بالكاسيت (12 فولت) احدهما اللى هو الذاكرة المفروض ياخد كهرباء باستمرار حتى والكاسيت مطفى . وفى مدخل تانى بتاع الباور المفروض ان بيتوصوله كهرباء عندما تفتح الكوتاكت .
ونظراً لان المستورد بيجيب العربية من غير كاسيت والكاسيت بيركب فى مصر هنا ونظرا لقلــــة الضميـــــر اللى بيركبه وجدت انه بيربكبه فى كل العربيات بهذه الطريقة ومافتكرش مرة يجرب باتقان ويشوف الكاسيت بيحفظ ولا لأ . .... وهى دى مصر


وكل عام وانتم بخير

المشاركة الأصلية كتبت بواسطة mmans

شكرا على المعلومات القيمة
على فكرة انا كنت اتصلت بيك و حضرتك كنت قولتلى على المشكلة دى فى عربيتك الى كنت هجيب زيها بالظبط بس زودت 3 تلاف جنيه و جبت الى بكاست تاتش و كاميرا

الف مبروك يا باشا ع عالعربية وربنا يملاهالك بركة ويديك خيرها ويكفيك شرها يا رب

انا على فكرة شفت موضوعك والكاسيت التاتش تحفة بجد ونفسى اجيب زيه بس مش عارف منين ؟