الموضوع: عندي بكره interview ...اي نصائح ؟

المشاركة الأصلية كتبت بواسطة kazzaz

يا جماعه عندي انترفيو بكره و خايف و حاسس مش عارف ارد اققول ايه او هاعمل ايه و الشركه دي اتمني يقبلوني فلو حد من الhr هنا يقولنا نصايح او اخطاء الواحد يتجنبها ابقي شاكر جدا

تكون واثق من نفسك و تحاول انك توصل امكانياتك للممتحن كويس
مش مشكلة لو ظهر انك متوتر شوية هو الممتحن بيكون مقدر ده.
علي العموم التوتر كله في انتظار الانترفيو و قبلها و انت ااعد مستني دورك لكن اول ما هتدخل خلاص هتحس ان عادي مفيش حاجة.
عادة الممتحن بيكون انطباعه عن المتقدم في اول دقيقة او دقيقتين يعني الدخلة الاولي و تقديم نفسك دول اهم حاجة انك تسلم عليه بكل ثقة و تتكلم بطلاقة (طبعا الكفائة مطلوبة و كل حاجة بس يعني اول كام دقيقة دول هما اهم حاجة و بعد كده الدنيا بتمشي) لان خلي بالك انت بتخش علي واحد اول مرة في حياته يشوفك و المفروض انك هتعد معاه ربع ساعة ولا نص ساعة عشان يكون انطباعه عنك و يقرر انت ايه موقفك بالظبط من التعيين.

خلي بالك كمان من النقط دي:
1. طبعا مش محتاج اقولك تخلي بالك من المظهر و البدلة و حلاقة الدقن و كده ده امر بديهي
2. لازم تظهر ايجابي و شخصيتك قوية و في نفس الوقت بشوش و مبتسم مش طول الوقت بس علي الاقل لما تدخل الانترفيو في الاول.
3. ماتفتحش معاهم اي سيرة في الفلوس او المرتب لان ده مش وقته و بيكون غالبا في الانترفيو التانية اذا حصل نصيب و اذا هو كمان فتح سيرة في المرتب برضه تحاول تبان ان اهم حاجة عندك ان يحصل نصيب و انك تكون اد المسئولية في الشغل و انهم يكونوا راضيين عن ادائك و الفلوس ممكن تتكلم فيها معاهم بعد كده (يعني خليك تقيل في النقطة دي شوية).
4. لو كنت بتشتغل في مكان قبل كده و سألك سبته ليه ما تعدش تعيب في المكان و تقول ده كان كذا و كذا و انا زهقت منهم لا تقوله انا بدور علي خبرة جديدة و مكان جديد استفيد منه و افيده. (اي حاجة تقولها غير انك تعد تبهدل في المكان القديم حتي لو فعلا كان المكان زي الزفت). ده هيبين انك عندك دايما ولاء للمكان اللي بتشتغل فيه و ممكن لو كمان تبرز صفة كويسه موجودة في المكان اللي بتشتغل فيه يعني مثلا ده انا استفدت منه كتير اوي دي طبيعة الشغل كويسة اي حاجة كده
5. لازم طول ما انت ااعد مع الممتحن عينك في عينه دايما دايما تبصله و مادورش عينك من عينه ابدا و حتي لو هو بص في حتة تانيه انت تخليك برضه مركز معاه عشان دي بتدي انطباع عن انك مهتم بيه و بكلامه و مركز معاه.
6. لازم كمان زي ما هو بيسأل انت برضه لما تيجي مناسبة تسأله عن طبيعة الشغل في المكان و فكرة عامة عن المكان و ايه اللي بيحصل لازم تبين انك مهتم بالتفاصيل بتاعة المكان. يعني ماتفضلش ااعد هو بيسأل و انت بتجاوب لا انت تاخد و تدي معاه في الكلام و تسأله عن الشغل عادي خالص.
7. في بعض النقط بلاش اجاباتك فيها تكون قاطعة يعني فرضا مثلا انه سألك انت عندك استعداد تسافر برة المحافظة اللي انت فيها او بره مصر متقولوش لا مش عندي استعداد قوله اه طبعا مستعد اني اسافر لاني هاخد خبرة من السفر و الشركة هتستفيد مني.
8. لازم لما يسألك سؤال معين اي سؤال لازم تديله اجابة مفيدة وافيه يعني مش تغير الموضوع او تدي اجابة عايمه او تحاول انك تهرب من سؤال مش عاجبك.
9. خليك صريح معاه يعني لو سألك بتعرف تعمل كذا مثلا و انت متعرفش قوله انا بصراحة معملتش الشغلانة دي قبل كده بس انا عندي فكرة عنها و اقدر اني اعملها (يعني مثلا سألك انت بتعرف اوفيس اكسيس تقولة عندي عنه فكرة بس ماشتغلتش بيه قبل كده و ممكن اني اتطور فيه اوي لما تسخدمه في الشغل بشكل عملي)
10. دايما تحاول تخلي الممتحن يبءي مشدود لكلامك يعني ماتتكلمش معاه كانك بتقرا جرايد (انا طبعا معرفش اسلوبك في الكلام بس في ناس كلامها دايما علي وتيرة و نغمة و تون واحد) لازم تحاول انك تشده في حوارك و تخليه عايز يسمعك يعني لازم تغير تون صوتك زي دكاترة الجامعة و هما بيشرحوا لازم تعمل كده عشان الراجل مايزهقش من كلامك.
11. ممكن يسألك انت ايه هدفك او طموحك او خطتك لمجال عملك (لازم تحضر اجابة كويسه تبين انك شخص طموح و تقوله انا عايز امشي مثلا في السكة الفلانية و عايز اطور نفسي و اعمل دبلومة و اخد كورس في الجزء الفلاني و عايز ازود خبرتي في الجزئية دي و انا بحب اوي طبيعة الشغل دي و تقوله انك مثلا طموحك انك تعمل مشروع كذا او انك تبءي رئيس ادارة كذا يعني الكلام ده حسب انت رايح تشتغل ايه مهندس ولا دكتور ولا محاسب) بس خلي بالك لازم تكون واقعي في كلامك يعني متعملش من البحر طحينة و تقوله انا بأذن الله كده ناوي ابءي رئيس مجلس ادارة الشركة كمان سنة. لا لازم توصله انك بتتعلم و تاخد خبرات عشان تقدر توصل للي انت عايزه.
12. لو سألك علي حاجة و انت عمرك ما عملتها ولا سمعت عنها قبل كده تقوله معرفش حاجة عن الموضوع ده خالص و ماتحوالش انك تتوه الموضوع عشان متردش او تعد تقدم تبريرات انك متعرفش الموضوع ده لانك كذا و عشان اصل لان لا هو يسألك عن الموضوع الفلاني قوله لا والله مسمعتش عنه قبل كده و تنتهزها فرصه و تسأله انت ده عباره عن ايه و بيستخدم في ايه و تبينله انك مهتم انك تعرف حاجة جديدة مكنتش تعرفها.
13. لازم طبعا تكون لبق و عندك ذوق و لما تيجي ماشي تقوله فرصه سعيدة جدا يا فندم و تبين انك مهتم و متطلع انك تقابله تاني.
14. لو حد ادالك فورمة تملاها حاول يكون خطك كويس و منظم.
15. لازم برضه تبين انك سمعت عن الشركة دي قبل كده و تعرف عنها كذا و كذا.
16. طبعا امر بديهي برضه انك تروح في المعاد المحدد بالظبط دي نقطة مهمة و تنزل بدري شويه عشان لو الشوارع زحمة او اي ظرف حصل.

بص من الاخر انت لازم الممتحن يتشد ليك و متعدش تبص علي الزملاء اللي رايحين يمتحنو ملكش دعوة بأي حاجة انت خليك في نفسك و بس.
انا مش hr بس انا عملت انترفيوهات كتير.

و لو عايز تسأل علي اي حاجة انهارده قبل الانترفيو اسأل بس ابءي قولنا عملت ايه.

ربنا يوفقك ان شاء الله

ياريت أسم الشركة اللي هتعمل فيها الأنترفيو عشان نقولك أيه الأسئلة اللي هتتسألها وأجابتها وبالتوفيق بأذن الله .