هل الاحسن قواعد الموتور يتغيروا كلهم ام المقطوعه بس ؟

اخوانى الاعزاء :

لا حظت منذ سنه اهتزاز بدن السياره كلما ادرتها مع ارتفاع صوتها .

عملت الاتى حتى الان للتغلب على المشكله :

1- تنظيف حساس البنزين و حساس الكرنك 2- بلية جديده لطلمبة المياه

3- فك و تنظيف الرشاشات 4- مراجعة الشكمان و عمل اللازم

5- فلتر بنزين و هواء جداد اصلى 6-مراجعة بلية سير الكاتينه الثابته و المتحركه

7- بوجيهات ان جى كى 2 شمعه يابانى

8- تنظيف طلمبة الباور...

ما زال الاهتزاز كما هو ، وان هبط الصوت المزعج الى النصف .

لا حظت قطع فى قاعدة الموتور الاماميه و الباقى فى حالة سليمة ، و اجمع من استشرتهم

من الميكانيكيون العرب ان الاهتزاز سببه قاعدة الموتور المقطوعه .. وانا بصد د

الشراء فى غضون اليومين القادمين و الرجاء النصيحة اللى عن تجربة
هل شراء قاعدة واحدة جديدة و الباقى قدام صح ام غلط

من الناحيه الميكانيكية البحته وعاوز انهى اهتزاز السياره للابد لانه بيجيب لى العصبى

اشكر اهل المروءة و الشهامة مقدما و دمتم بخير

استاذ مدحت اهلا بيك
منور والله
طبعا لازم تقول نوع العربية وموديل السنة وكدة يعني
شوف انت لما تغير قاعدة تقدر تكشف على بقية القواعد بكل سهولة
الميكانيكي بيشوف هل في تشققات في كاوتش القواعد ولا لاء
هل محجر ولا طري
لو فيه يونة ومفيهوش تحجير ولا تشقق مالوش لازمة تغيرة
لو فيه اي حاجة من السابقي غيرهم عشان الاهتزاز هايتنقل للناحية الاصلب فورا

استاذ كريم مساء الخير و الف شكر لاهتمامك و رأيك الصائب

هى دايو ليجانزا ( تقيله يعنى ) مو 99 و ما غيرتش قواعد من سنة 99 انا اول يد..اوتوماتك

ان حا سس ان دى غلطتى .. بسبب طول مقدمة السيارة كنت لسنوات اطلع بمؤخرتها على الرصيف فتكون مايله الامام و طبعا الموتور بيبقى رامى على القاعدة المقطوعه حاليا

و ايه رأى حضرتك طالما انا بصدد تظبيط شامل للعربيه و متيسرة بفضل الكريم علينا

مش الاحسن اغيرهم كلهم جداد و يبقوا ميه واحدة ..و هل من افكار اخرى تسبب الاهتزاز

لان كده انا جبت اخر خبرتى ..معلش خلليك معايا شويه كمان الله يكرمك

و الف الف شكر يا باشا الباشوات

استاذ مدحت انا انهاردة كنت في التوكيل بعمل شوية صيانة في العربية عندي بس انا عربيتي اوبل 97 وسألت على موضوع القواعد لأن انا عند نفس المشكلة بتاعت حضرتك وهي اهتزاز بسيط في العربية ورجة بسيطة لما اجي ابطلها. القواعد بتتباع كلها مجموعة واحدة عبارة عن 3 قطع بس غالية موت انا لاقيتها ب 1600 جنيه للأوبل فقررت تأجيل الموضوع ده 4 او 5 سنين كدة لغاية ما ادبر المبلغ :D:D. بس انا سمعت والله اعلم انه مش كويس على الاوتوماتك ان القواعد تبقي مش كويسة ده سمعته من المهندس في التوكيل لما قالي ان عربيتي مانيوال فالقواعد مش هايكون لها ضرر كبير لو كانت مبوشة شوية بعكس الاوتوماتيك والله اعلم وممكن استاذ سبعاوي يفيد حضرتك في الموضوع ده.

الف شكر استاذ عبد العزيز .. كلامك فى محله تماما .. و اشاطرك الاحزان فى غلاء اكسسوار الاوبل

القواعد عندى كلها تلت هذا المبلغ و عادل و عزيز سليمان 12 ش البورصه بالتوفيقيه عندهم جديد كل

اكسسوار الدايو باسعار اشتراكيه و ممكن يبيعوا ققواعد الموتور بالواحده و على حسب مكانها كل حته لها سعر

فيه حته ب 90 و فيه ب 75 و فيه ب 175 و فيه حته ب 190 جنيه

فلتر تكييف 85 و فيه فاك مصرى 36 جنيه

فلتر بنزين و هواء ب 65 جنيه و فيه بس مش عندهم عند ابراهيم البنا الاتنين صينى ب 35 جنيه

و السير ( سير واحد للعربيه كلها ) 75 جنيه و رمان بلى طلمبة الميه جبته ب 110 جنيه

حاول تسأل على القواعد فى التوفيقيه اكيد ارخص كتير .. انا الميكانيكى بتاعى كان شغال فى

توكيل أوبل لو عاوز ا ى شغل مضمون و صح و ما يشتغلكش موبايله 0127149945 اسمه امام

كنتاكى اللى قدام كلية طب الاسنان فى اول المنيل : هو وراه على ناصية حارة فرن العيش البلدى

رأى عملى
غير القواعد البايظة فقط
يعنى لو قاعدة واحدة مشرخه غيرها و لو فى غيرها مشرخ أو محجر برضه غيرها
لكن القواعد الأصلية لو سليمة يبقى تسيبها عشان اكيد هتكون احسن من الجديد خصوصا لو مش أصلى
و الله أعلم

ان شاء الله دا اللى ها عمله لان الكاوتش الجديد مش معروف ملته ايه و شكرا

استاذ مدحت...احب انبه حضرتك ان قاعدة الموتور المسؤلة عن الاهتزاز هى غالبا بتبقى راكبة فى اعلى مستور لحوض الموتور يعنى خلق كارتيرة العجلة سواء اليمنى او اليسرى ايهم..باقى القواعد للتعليق خصوصا القاعدة السفلية الواصلة ببطن السيارة ..هذا و الله اعلم

و غالبا بتبقى القاعدة دى من الالومنيوم و الباقى من الحديد الصلب

شوف
بما ان فى قاعده انهارت
معنى كده ان كل القواعد على وشك الانهيار بما انك ما غيرتهمش من عمر العربية
المفضل ميكانيكيا انك تغير القواعد كلها مرة واحده لان ليون القاعدة الجديدة هتكون مختلفة عن ليون بقية القواعد الاخرى
وزى ما انت عارف ان الشديد بيبوظ الضعيف فهتلاقى القواعد عندك بتنهار واحده ورا واحده فادفع مصنعية مرة واحد واخلص وغيرهم كلهم هتحس بفرق شاسع حتى فى صوت المحرك

استاذ مدحت: متشكر جداً على مساعدتك الغالية. انا فعلاً نزلت انهاردة التوفيقية وشارع شامبليون وجبت عروض اسعار من كل المحلات اللي بتبيع قطع غيار الأوبل. انا غالباً مابشتريش اي قطعة من التوكيل الا لما بلاقي ان سعرها قريب جداً او اغلى حاجات بسيطة عن بره على الاقل استفاد بالضمان على القطعة. انا لاقيت القواعد بره بالقطعة وارخص مت التوكيل بكتر لاقيتهم ب 650 جنيه والمني ال 3 قطع.
وبالنسبة للميكانيكي بتاع المنيل انا شاكر لحضرتك جداً وانا هاتصل بيه واروحلو اتعرف عليه.
ربنا يوفقك في عربيتك يا استاذ مدحت ويحفظهالك

استاذ عبد العزيز مساء الخير النهارده الظهر امام رفع الموتور و كشفنا على القواعد .. لقيت الاتنين اللى يمين و شمال زى الاستاذ كريم ما نصحنى فبهم ليونه و مش مشققين و حالتهم حلوة ن اللى قدام لقيتها الكاوتشه مقطوعه

و الفلانشه كانت بتخبط فى القاعدة اللى راكبه ع القنطره لدرجه انها واكله الحديد

نزلت فى الزحمه و رحت ممتطى تاكسى و انا واخد الكاوتشه المقطوعه معايا الى محل عزيز سلبمان

اتناشر شارع البورصه بالتوفيقيه ..جبت نفس القاعدة جديدة اصلى ب 95 جنيه بدل 100

و امام ركبها و رجلشها و بالمره غسل مروحة الموتور و مروحة التكييف و ركبنا الفيش بتوعهم تمام ز

و دورت الموتور ال2000 سى سى الدوبل كامه ابو 133 حصان و قام مضبط الموتور عشان كان عالى شويه

لحد الrpm ما عمل 800 لفه ع السلا نسيه ..و خدت لفه فى الزحمه .. الاوضاع اتحسنت 80 %

بس لسه فيه بسيط اهتزاز.. لا ارضى باقل من 100 % و لذا هحاول اروح بكره الاستاذ محمد السيد اللى الاستاذ ممدوح قال لنا عليه عشان يظبط كهرباء العربيه بالكمبيوتر ( الكونترول يونيت )

ثم اطلع من عنده اذا لم اصل لل 100% الى طومان باى افك الشاشات و انظفهم بالالتراسونيك

و اضبط الموتور بالكمبيوتر عند الناس اللى الاستاذ كريم قال عليهم محترمين .

اذا العربيه ما كانتش 100 % بعد كده ها غير كل الشاكمان بواحد استيراد اصلى ..

اذا العربيه بعد الشاكمان ما اتحسنتش و رجعت زى ما اشتريتها ..ها اهجرها تلات شهور .

ها ها ها
احلى كلمة قولتها اخر كلمه
هاهجرها 3 شهور:D:D:D
انا زيك برضه لا ارضي غير بال 100%
مش برضي العربية يكون فيها اي صوت ولا اي حوار
على فكرة الليجانزا انا بحبها جدا جدا
عربية محترمة لاقصى درجة
بحس انها ارخص من قيمتها كتير
2000 سي سي وكبيرة ومريحة وموتور كويس جدا
ربنا يباركلك فيها
واي حاجة انت معاك تليفوني ما تتاخرش انك تتصل وان شاء الله نظبطهالك

ما تحرمش منك ابدا يا استاذى و ملاذى يا اكرم الناس..ببركة نصائحك

الحياة حلوه و فله ، بس لو وصلت لمرحلة الهجر ال3 شهور ..

ها ضطر اجيلك تصالحنا و تشوف حل يرضيها .. انا كلمتها عنك النهارده

و هى قالت : راجل فاهمنا ، مش زيك ، هاجرنا

استاذ مدحت ليك وحشه و الله:)
بالنسبه للقواعد طالما واحده باظت يبقي الباقي عمره الافتراضي قرب ينتهي
الاحسن غير كله مره واحده و ريح دماغك

ما شاء الله..
والله واضح اني انا حظي كويس اني اقرا الموضوع ده واعرف شخصية جامدة جدا زي شحصية الاستاذ مدحت..
بصراجة اسلوب سعاتك في منتهي الجمال والذوق..
ربنا يكرمك و يوفقك في تصليح العربية..

أستاذ مدحت
حياك الله

اقتباس:

---

المشاركة الأصلية كتبت بواسطة hazem_khidr

استاذ مدحت ليك وحشه و الله:)
بالنسبه للقواعد طالما واحده باظت يبقي الباقي عمره الافتراضي قرب ينتهي
الاحسن غير كله مره واحده و ريح دماغك

---

---------------------------------------------استاذ حازم ..حدائق ورد لشخصك الحبيب

بعد التجربه اللى لسه كنت هاسردها بالتفصيل اول و تانى ..لقيتك جبت الخلاصه .. فقفلت علىّ باب الهجاصه

لكن برضو لسه بحبك زى زمان .. و اكتر

------------------------------------------------------------

اقتباس:

---

المشاركة الأصلية كتبت بواسطة Ahmad Allawy

ما شاء الله..
والله واضح اني انا حظي كويس اني اقرا الموضوع ده واعرف شخصية جامدة جدا زي شحصية الاستاذ مدحت..
بصراجة اسلوب سعاتك في منتهي الجمال والذوق..
ربنا يكرمك و يوفقك في تصليح العربية..

---

--------------------------------------------------------

استاذ احمد مش عارف اشكر ذوق و اخلاق حضرتك ازاى ، و انا ابسط من التراب اللى تحت جزم الخلايق

و لا شخصيه و لا حاجه ، دا جمالك انت بتشوفه عيونك انت .. و بتلبسه لكل حاجه .. ما دام جميل

ربنا يزيدك و يقابلك دايما بوجه الحميد .. امين

------------------------------------------

نرجع مرجوعنا مع الاستاذ الغالى عبد العزيز ، و الكلام لكل اللى ما يعجبوش الرقص و الهزهزه

و الحس العالى و الذبذبه .. و هاحكى على حصل النهاردة من غير لؤم ولا اختصار و لا مواربه :

---------------------------------------------------------------------------

رحت للاستاذ محمد السيد اللى مشكورا مهندس محمد ممدوح عرّفنا بيه .. وورشته تقع فى 8 شارع الدقى العمومى
على الناصيه ، و حكيت له على كل اللى كتبته هنا : بص ع التومبيل و قال لى عشق خفيف مع فرامل

.. للامام و الخلف .. ثم فرجنى ان بقية القواعد مقطوعه ايضا ..فاتغظت من امام الميكانيكى اللى

قال لى انهم تمام و على ضمانته .. و قال لى ان عندة ميكانيكى بروفسور دايو فى شارع بين السرايات اللى فيه

وقوف الجيزه ( اللى كان زمان مرور الجيزه ) .. اسمه محمد هاشم بجوار محل ابو الحسن لقطع سيارات الدايو برضو

المهم .. القواعد اللى عند ابو الحسن ما عجبونيش .. رحت طالع على عزيز سليمان فى ش البورصه

بالتوفيقيه شارى القاعدتين اللى عنده و كعيت اشى 300 الا خمسه و القاعده التالته مش موجوده ، قلت اجيب المضروبه
اللى عند ابو حسن و قد كان ..ثم محمد هاشم ركبهم .. كلهم و طلب 70 جنيه فى التلاته تركيب

( و حيث انى بالامس اعطيت امام 100 جنيه فى تركيب واحدة بس .. ، صُعًب عليه هاشم و عطيته 100

راخر .. عشان الهز و الصوت اختفى قطعيا بنسبة 100% .. فأخد الراجل الميه )

محمد هاشم شاطر قوى .. بس عنطوز قوى و بيحب يحس انه مدرس بيلقى محاضرات على ناس يارب يفهموا .. و بما انى عجوز قوى .. دخلته جحره باقل مجهود ، و التزم كل منا بالحدود ..

ثم اقفلت راجعا للمهندس محمد السيد ( على فكره ساب محله مرتين و جه يطمن علّيه عند هاشم )

و كشف بالكمبيوتر على الحسناء و هى منه على اشد استحياء .. و لولا وقوفى بجنبها ..

ما فتحت له بقها .. و اشاد بصحة كل اجزائها ، و اُعجب بجمال اعضاءها

و طلب منها موعد و لقاء .. بحجة تضبيط الاضواء ، فابدت الرفض و الاستعلاء ،..و من الرفض تولد الاشياء .. عند ما يحلّ المساء....

هذه قصة توبة فنانة مغموره .. لا تعلم ان صوت السياره عوره .. و ان الرقص من غير سبب .. ، فى عرفى ..قلة ادب

فاصبحت الان كصاحبها تمشى و بوزها فى الارض دوغرى ، و لا تسمع لها اعتراض على شىء ، مهما تجرى ..

باى

نيييييييييييييييييييييههه هههههههههههه
ما شاء الله على اسلوبك اللغوي
انا قولتلك انت كاتب قديم مصدقتنيش
شوف انا هاقولك حاجة ومحرج منك
انت لما قولتلي على قواع\د الموتور انا قولتلك اكشف عليهم عشان معرفش انهم كدة من الزيرو واما كنت هاقولك انهم خلاص دخلو في طور الانتهاء طالما واحدة جابت ااخرها
ولقيتك بتقول ان الهزة اختفت ب 80 %
والراجل قال كويسين
قولت يبقي الميكانيي شاف
لكن عامة يفضل تغيير التلاتة مع بعض عشان يبقي توزيع الحمل يبقي متساوي
وامتصاص الارتجاج يكون موزع على التلات اماكي بالتساوي

ربنا يباركلك في ركوبتك لان اللي ربنا بيحبة يباركلة في دابته وما تتعبوش
والحصان ينصاع لما يحس ان فارسه شديد علية
مساك ورد

حبيب الكل الغالى استاذ كريم صاحب المقام العالى:
اشكر اعجابك باسلوبى اللغوى .. و ده سببه ان لما رجعت البيت متأخر ..
لقيت فى انتظارى طبق من اللحم المحمر..

فاجتمع انبساطى من تهذيب العربيه ..

بطاعتى فى الاوامر المنزليه ..

فعمّ الدنيا السلام و طاب اسلوب الكلام ..

دعواتك ليه بالبركه تممت كل افراحى

و زادت من بسطى و انشراحى

و كل سنه وانت حبيبنا و مجمعنا و منورنا و كل حبايبى اعضاء

منتدى الخير و البركه و السلامه

انا مش عارف اسفق لحضرتك في الرد يا استاذ مدحت .
اسلوب حضرتك في الحوار مالوش حل ما شاء الله.
انا كنت هاتصل بامام وكنت ممكن اروحلو في الحاجات اللي مش مستاهلة توكيل بس كدة حضرتك خوفتني منه وعرفت ليه هو مشي من توكيل اوبل :D:D

اخى العزيز استاذ عبد العزيز : ( متهيأ لى سمعتها كتير جدا دى قبل كده :( )

ان زى ما قلت ما له قلت ما عليه .. دا بالنسبه لامام الميكانيكى .. و ما لا يؤخذ كله ، لا يترك كله ..

و انا بالتمس للناس الاعذار ، هوة لسه طالع من تركيب دعامتين ف قلبه .. و نصحوه ما يبذلش مجهود 9 شهور .. فا يمكن يمكن دا السبب انه كان عاوز يقسط الشغل على كذا يوم عشان تعب .. الله اعلم

و لا انكر له عديد مواقف رجوله يطول شرحها دلوقتى ..و اذا كان غاظنى فى موقف ، ف يا ما بسطنى فى مولقف .. و طبعا الرأى الاخير لسيادتك

اجمل التهانى عشان الربيع عاد من .. تانى

و انا مبسوط ان كلامى اللى كنت حاسسه تلامه .. سبب لك فرحه و ابتسامه ..

و ان ان كتر السجع ف كلامى .. فيه امل يبقى اسمى سجعاوى ..؟

تيمنا باخونا الكبير .. سبعاوى ..

و الا انت على ايه ... ناوى ؟؟؟