الموضوع: استفسارات في اللانوس

السلام عليكم ,,,

انا جبت عربية لانوس 1 مو2000 من شهر و العربية حالتها كويسة والحمد لله و هي عاملة 120 ألف كيلو ,

بس انا حاسس ببعض الحاجات عايز استفسر عنها لأني لما سألت الميكانيكي مرتحتش لكلامه ,
1- الفتيس بييجي بصعوبة احياناً خاصة في الغيار الأول و في المارشدير.
** و الميكانيكي جرب العربية و للأسف معملتش حاجة معاه و قالي لما يحصل كده ابقي شيل رجلك من على الدبرياش و حطها تاني .
2- فيه صوت نعرة في الموتور خاصة لما بزود و انا على الـ 40 أو الـ 50 ك.
** و الميكانيكي قالي دا علشان الشكمان جديد و لسه هيعمل طبقة كربون و بعدها مش هتسمع الصوت ده .
3- لما بشيل رجلي من على البنزين بيكون صوت الموتور عالي و مبيوطاش بنفس السرعة اللي بشيل بيها رجلي , بمعنى ان في العربية القديمة (فيات) كنت لما بشيل رجلي من علي البنزين كان صوت الموتور بيوطى على طول.
** و الميكانيكي قالي ان كل الإنجشكشن كده.
4- فردتين الكاوتش اللي قدام جداد بس اللي ورا لما حبيت أرصصهم قالولي ان فيهم عالي وواطي و مش هينفع يترصصوا و لازم أغيرهم , و الحقيقة انا مش عايز أغيرهم دلوقتي و عايز أعرف ايه المشكلة لو مشيت بيهم لفترة , و هل ممكن أسافر بيهم , خاصة اني لما بمشي بالعربية على الـ 130 مبكونش حاسس بحاجة ورا من الكاوتش .
آسف للإطالة .