انا ناوي اجيب عربية
ودي قصتي من شهر خمسة

الاول قبل شهر خمسة (قبل ما اقرب اخد قرار اني افكر بجد في شراء عربية)
كنت بفكر في كذا عربيه زي السيراتو الجديده والكروز وكده .......

بس بعد مافتحت عنية بجد وركزت علشان ابتدي اخد القرار (من نص خمسه كده)
لاقيت انهم مش هما الي اسوقهم

المهم نبتدي القصة

شفت عربية اسمها جراند بونتو قلبي زقطط وقولت الله دي حلوة اوي
ووريتها لمراتي قالتلي تمام العربيه حلوة فعلا
قعدت ادور ايه مميزاتها وعيوبها وكده لحد ماعرفت ان فيه اجدد والي هية بونتو ايفو ودي هتنزل في اوتوماك
قولت اكيد هتنزل اغلى
ولأني ماكنتش جاهز ساعتها بكل المقدم فاستنيت بترقب ان الايفو تغلى شويه صغيره
ولاقيتها نزلت بنفس السعر
فرحت طبعا وقولت هشتريها مع اول دفعه شهر سبعه
الدفعه اتأخرت لنص تمانيه
وفي الوقت ده شوفت التقييمات والفتي الكتييير على الجراند لاقيت ان ناس بتقول انها 77 حصان وده مش كتير
فبدأ اقتناعي يقل شويه بشويه وخصوصا ان شغلي بلبس فيه بدل وكده ففي ناس قالتلي هاتلك عربيه اكبر وشكلها يدي برستيج
قولتلهوم ما انا شاب برضه وعندي 25 سنه مش لازم كبير
قالولي ماتنساش انك متجوز وكده قولتلهم انا لسه مخلفتش يعني عقبال م اخلف والعيال تبتدي تكبر يكون فات 5 سنين ولا حاجه وربنا يكون حلها
قالولي انت طويل وعريض ومش هتقعد مستريح قولتلهم يووووووووووووووووه وجالي اكتئاب

فراح الفار لعب في عبي وقالي ماتزنق نفسك وهات برافو
فكرت في الحكايه فعلا وحبيت البرافو اوي مع ان في ناس طلعتلي فيها حوارات ومشاكل بس كبرت ورأيي ماتغيرش

بس المشكله لاقيت نفسي هتزنق موووووت

فقولت اشوف حاجه وسط وبباقي الفلوس ازبط نفسي
اجيب موبايل جديد اروح جيم نظيف اروحلي اسبوع اجازه في اي حته حلوه ......

المهم عجبتني التيدا هاتش باك
روحت شوفتها لاقيتها من جوه يععععععععععععععععععععععع

فصرفت نظر
فروحت اشوف الهوندا سيتي
عربيه تدي برستيج وشبابي وياباني و و و و و
كلمت السبع قالي مافيش سيتي دلوقتي الستوك خلص في السوق كله حتى عند الوكيل
قولتله هتيجي امتى قالي ممكن اول السنه علشان حوار الضرائب الجديد ده
قولتلو معنى كلام حضرتك انها هتغلى قالي اه من 3 الى 6 الاف جنيه

رجعت تاني لنقطه الصفر
يا ايفو واوفر واخلي فلوس للزمن واشبرق نفسي في حاجات تانيه ماهي الحياة مش عربية بس
(مع ملاحظه اني ممكن استنى شهر او اكتر لو اللون مش موجود وهوه اكيد مش موجود لان العربية عليها طلب كبير وكله حاجز)

اجيب البرافو عربية احلامي واحط فيها 90% من الي معايا وازنق نفسي جامد لمده سنه تقريبا (علما اني كده كده هقسط لمده 4 سنين للايفو 5 للبرافو)


مش عارف هتجنن
شكلي مش هجيب حاجه
مع اني بصلي تقريبا كل يوم استخاره

حسبي الله ونعم الوكيل