ارشيف الطرق _ من فضلك شارك يمكن تحتاجه في يوم ما
اجمل سلام لكل اعضاء النايل موتورز
من فترة و انا ملاحظ ان هناك كثير من الاعضاء جايبين العربية جديد وغير متمرسين في الشوارع يعني ازاي يروح من مكان لمكان لما يبقي في فيصل مثلا وعاوز يروح مدينة نصر ؟؟؟؟ او من المعادي وعاوز يروح ش بورسعيد او من حلوان وعاوز ينزل الزمالك او من مدينة نصر وعاوز يجي الهرم وغيره وغيره
وتلاقي كل واحد عمال يسأل سواقين التاكسي في الاشارات وحالته حاله وكمان انا لا حظت الموضوع ده وانا كنت في مقابلة حبايبي بتوع كيا في مقابلة قرية العزبة علي ترعة المريوطية وازاي الموضوع كان شديد جدا علي بعض الاصدقاء والموضوع وصل لاستخدام ال ((gps)
طبعا فيه ناس عارفه كويس اوي تروح وتيجي ازاي وممكن يحس ان الموضوع ده مش صعب اوي بس انا بقول بجد الموضوع بالنسبة لناس كتير صعب اوي
وعلشان كده انا بقترح اننا نعمل زي ارشيف او خريطة مصغرة كل واحد منا بمشاركة بسيطة ان شاء الله سننافس هيئة المساحة في خرائطهم طب ازاي هنعمل الموضوع ده
اتوقع لو كل واحد بدء بالطريق اليومي له اللي حافظه كويس و عارف البدائل له
وده اقتراحي البسيط للفكرة ولو حد اضاف او اقترح رأي اخر يبقي له الف تحيه
يعني انا مثلا لما احب اروح 6 اكتوبر من المعادي
هكتب (( من المعادي لاكتوبر والطرق البديله))
المسار ده بيخدم كل من هم بعد المعادي في اتجاه حلوان
1- المعادي ( كورنيش او اتوستراد ) حتي مطلع الدائري
2- اما نطلع الكوبري الجديد حتي نزلة طريق الاسكندرية الصحراوي وده للي رايح الشيخ زايد او نكمل حتي نستقر علي طريق الواحات ومنه دخلات ل اكتوبر سواء المتميز او الجهاز او الاحياء حتي المنطقة الصناعية
ونرجع تاني نقول ساعات الكوبري الجديد بيبقي في وقت الذروة زحمة يبقي الحل التاني ان نكمل سطحي علي الدائري حتي نزلة المنصوريه ثم نترك شارع الهرم مرورا بفيصل ثم ندخل علي ميدان الرماية ومنه لطريق الفيوم ثم ندخل علي طريق الواحات بعد حدائق الاهرام مباشرة
وهكذا كل منا سيكون له مداخلة فبأذن الله اتوقع بعد كام شهر سيصبح معنا ارشيف كامل للطرق او معنا شيخ السواقين
ربنا يوفقنا بأذن الله تعالي
ها مين بقي يقولي اروح العتبة ازاي ههههههههههههه
م.حاتم السباعي
