محتاج استشارة ضرورى وربنا يجازيكم خير
السلام عليكم
معلش انا اسف جدا على الاطالة اللى هاتحصل بس بجد انا طالع عينى والحيرة مخليانى مابانمش والله
قصتى مع العربية اولا ماكانش معايا فلوس وبادور على عربية ستيشن استعمال وقسط علشان الشغل احمل فيها بضاعتى
المهم بعد محاولات طويلة ربنا وفقنى ولاقيت حاجة عند تاجر تبع واحد صاحبى لما قعدنا كنت صفر فى العربيات لا جبت سمكرى ولا ميكانيكى دا حتا والله العظيم ماكنتش اعرف نوع العربية فيات ولا لادا
اللى مكتوب بالبرتقالى مش اساسى بس علشان غيرى يتعظ منى
مسلسل القفيان
اول قفا
ساعة الكلام فى السعر قال 15 المهم صاحبى وواحد صاحبى تانى قعدوا يقولو هزها وم الاخر طب اعمل واجب ودا شغال 100 جنيه فى 100 جنيه المهم قاللى طب تمشى معاك بكام انا اتشمللت وقلت له مشيها 13 (طبعا انا فرحان هانزل 2000 جنيه ) لقين صحابى وشهم لون واللى كان جايبه سحبى وقاللى انت ايه اللى خلاك تتكلم المهم خد منى 1000 جنيه واداهاله عربون وقاله تاخد اتنين كمان بعدين والباقى 1000 كل شهر والعربية دى تخلص ب12 وانا حكمت كده طبعا التانى يقوله انت جيت عليا وبتاع (وطبعا لو البيعة مش حلوة ماكانش وافق ) المهم بعد ما مشى صاحبى قاللى العربية كانت ممكن تخلص 11 او 10 كمان لو نشفنا ريقه وانت لسه هاتصرف بس احسن علشان تتعلم ماتتسحبش من لسانك
----
المهم كل صحابى لما شافوها قالولى كبيرها 6 ولا حاجة وانت ورطت نفسك وانا من خيبتى فرحااان بقى عندى عربية ابدا ما راضى ارجع فى البيعة
تانى قفا
روحت بالعربية وطبعا واحد صاحبى سايق علشان لسه مابعرفش اسوق علشان اكشف عليها المهم الناس قالولى اهم حاجة الكرونة علشان دى ب 2000 جنيه زى الشاهين مش 500 زى اللادا والمتور طبعا المهم واحد ميكانيكى بص عليها وقاللى تمام الموتور والتانى كان صاحبها وبدا شغل فيها يلم شوية حاجات قلتله شوف الكرونة قاللى تمام (سبحان الله هوا هوا بعد مده قاللى الكرونة وحشة بعد كام شهر ) بعد ما لبستها
ثالث قفا
لما جيت اعمل العفشة الميكانيكى قاللى اعملهالك وانا عبيط مش عارف ان الصح عفشجى وكمان غيرلى البيض كله والمساعدين والمقصات استعمال وبعد كده وانا بظبط زوايا بانت الخيبة
رابع قفا والمفاجاه
طرمبة الزيت باظت غيرتها كام يوم ولمبة الزيت نورت المهم بعد حيرة الميكانيكى الجديد (توبت وشوفت ميكانيكى محترم "على ما يقال من السواقين") فك الموتور حتة حتة وتبان الخوازيق !!
السبايك مسلخة معمود الكرنك مبوش والاويل سيلات كلها وحاجات يامة والاهم البلوك متدمر لحامات ومسقى نحاس الغريبة ان اداء الموتور كان ممتاز فى المشى بشهادة صحابى السواقين كمان لكن لما اتفك بانت الخيبة مع انه حسبى الله ونعم الوكيل كان بيحلف لما لعربية معمولها عمرة موتور قريب
القفيان الصغيرة
حاجات ياما صرفت عليها تصليح زى مثلا المارش عملته حوالى 6 مرات 5 ب 20 او 30 جنيه للمرة ومرة ب 90 وفى الاخر شغال بس مش فل الفل مع انى اتكلفت ييجى 300 جنيه وهوا جديد ب 150 جنيه وعد على كده حاجات كتير رادتير وكاربراتير يعنى صرفت 3 او 4 الاف منهم 1000 بس شغل حسيت بيه
نييجى للمهم واهم نقطة فى الموضوع ان انا كنت باظبط فيها واحده واحده وناوى ساعة السمكرة انى اعمل فيها شغل فظيع ولون ميتاليك وفوانيس كريستال وتابلوه دايو لانوس وفرش جلد جديد بس بعد لما اظبط الاساسيات جيت فى يوم حلمت انى بابيعها وسبحان الله لبست ونزلت عطلت كانها اشارة من ربنا ويوميها نويت انى اديها رشة نضافة والم الحاجات اللى بتفرق فى المنظر واحاول ابيعها بيعة مرتاحة طلع العطل المرة دى جابت الموتور وعايزة موتور جديد (قفا 4) وبدل ما محتاجة 500 جنيه بقت عايزة 4000 علشان تبقى عربية وماشية بس
نيجى لمربط الفرس
انا نفسيتى قفلت من العربية دى جدا وحاسس ان قرفتها سودة من ساعة ماجبتها والشغل بايظ معايا وبعدين على قد مانا حبيتها جدا كاول عربية ليا وانها ممتعة فى سواقتها عن عربيات كتير ومتينة بس بجد قليلة الاصل معايا عمرها ماتعطل غير فى يوم ماكونش فاضى لا ومحتاجها فيه وتكون فى حتة مقطوعة وحتى ماعيش رصيد او فلوس كانها بتادبنى فخلاص عايز اخلص منها و العربية مع انها مش محتاجة هدة سمكرة كاملة بس فيها حكات وترييحات (لزوم مااتعلمت السواقة ) بالاضافة لان البوية شكلها بقالها 90 سنة وبااااااهتة فشكلها يبين انها رايحة فى داهية اد اللى فيها 4 اضعاف وطبعا لو جيت ابيعها من غير موتور ع المنظر ده كله هايفطسلى فيها كانها ما تسواش 5000 جنيه
ولو جبتلها موتور يبقى دخلنا فى 4 زيادة امال هاتجيب كام بعد وجع القلب
ناس قالتلى شدها شده صح من كله كلفت5 ولا 6 ولا 7 اهى بقت عربية مافيهاش الهوا وتخليها معاك وساعتها احساسى بان قرفتها وحشة هايروح غير انى ماضمنش اللى هاجيبها فيها ايه بس انا خايف من الحوار ده لسببين اولا انها ممكن تفتح معايا غعير مانا متخيل والاقى نفسى كلفت فوق ال 16000 عشرة كمان على عربية مش بياعة قوى وستيشن كمان والسبب التانى انى لو جبت 2105 تمانينات فى حدود عشرة تبقى متوسطة بسبب ان سعرها نزل ولو فتحت بقها حاجتها ارخص واسهل والصنايعية بيحبوا يشتغلوا فيها
المشكلة التانية ان انا اساسا ماعيش فلوس اليومين دول فكل ده غالبا هاستلف علشان اعمله
من الااااااااااااااااخر انا عايز اطلع من الموضوع ده باقل الخسائر والمصاريف وابقى فى الاخر راكب عربية مش مغلبانى شورو عليا
وحالة العربية بمنتهى الدقة هى
دواخل فابريقة على الرغم من ان الحوض شكله وحش بس مش راشة
الصاج : بارومة حوالين الاربع عجلات (الكارتيرات) وكام حتة عايزين يتردوا - الببان زبالة فى الفتح والقفل بص صاجهم كويس وعايزين يتروا ع البارد - العتب والسقف و القوايم كويسين والارضية فيها صدا خفيف قوى والباب الخامس مش مطبع بارز حوالى 2-3 سم
الموتور : 0
الفتيس : جميل 6 غيار وماشى معاها وسليم
الكرونة : اكتر حاجة شككتنى فيها انه صاحبها الاولانى كان حاططلها زيت تقيل (بيتحط علشان يقلل الصوت ) وعموما لما ركزت لقيت صوت خفيف قوى ماعرفش بقى ده منها فى بداية انحرافها ولا من حاجة تانية
عمود الكردان جديد
رادتير نحاس 3 ماسورة المانى
جايب 4 جنوط حديد كويسين
4 فرد كاوتش تيوبلس تيل اندونيسى دانلوب
الاستبن فاشل بس يقضى الغرض
التابلوه مقشر وطالع عينه هوا والكنسولة
عدادات جديدة وشغالة
بطارية جديدة نسر سايلة
اللمبات والكلام ده تمام وطبلة كنتاك جديدة وطقم دراعات نور جديد
ضفيرة الكهرباء طالع عينها احسن تتغير لكن شغالة عادى
علبة دركسيون وحشة
عفشة ورا محتاجة ورقة سوستة وجلب
عفشة قدام شغالة بس مش باشا
محتاجة بربيز قدام
حاجة تانية ماكنتش شاغل دماغى بيها العجلة اليمين كانت بتحك فى ياى (سوستة ) المساعد فركبنالها فلانشة حوالى 1 سم انما مش عارف دى عيب فى شغل العفشة ولا الشاسيه فيه حاجة انما افتكرتها دلوقتى وانا بفكر فى مساوئ العربية
الرخصة فحص 2012 باسم المالك القديم ومعايا توكيل بس التجديد ودفع الضريبة فات عليه من شهر 6 اللى فات لانى اتخانقت مع غيلان الرشاوى وبعد كده ساعات اكسل و ساعات معيش فلوس انما معايا التوكيل والكلام ده
اسف جدا على الاطالة بس فعلا لا انام بسبب العربية ارجوا النصيحة ممن جربوا وارجوا من الباقى ان يتعظ ويلازم اهل الخبرة عند الشراء
