أختيار المدارس المناسبة لأولادنا *** بين نارين!!!!!!!!

**mhoss** · 17-02-2010 03:47 PM

المشاركة الأصلية كتبت بواسطة lion_heart

طيب مش ممكن المرحلة الابتدائية فى ازهر لغات وبعد كده يتحول لها لمدرسة خاصة او تجريبية ؟؟
بحيث تكون عرفت شوية فقة وشريعة وكمان تكون عرفت تقرا القرآن صح
و اسوا الظروف بعد كده تدخل جامعة خاصة لو استمرت فى الازهر

+1111111111111111

أقتراح كويس جداً و لو لاقيت مستوى الولد مبشر و المدرسة كويسه ممكن تكمل...تمام الله ينور...

**mhoss** · 17-02-2010 04:13 PM

المشاركة الأصلية كتبت بواسطة ahmed_su

بغض النظر عن اختيار مدرسة عربى او لغات

فيه مصيبة كبيرة فى الاتنين الا وهى المعلم (مدرس او مدرسة)

فعلاً الكلام ده مظبوط و ده أحد أهم عوامل تراجع العملية التعليمية فى مصر للأسف....
مستوى المدرسيين تراجع بشكل كبير عن أيامنا اللى هى مش من زمن بعيد و الله....

تم حذف جميع المشاركات الخارجه عن الموضوع الاصلي
مشرف عام 3

**TheInfernal** · 17-02-2010 10:59 PM

أنا رأيي بصوا في الجرايد على أوائل الابتدائية و الاعدادية و تحاولوا تستنتجوا ايه اكتر مدارس بيطلع منها أوائل و تحطوها وسط اختياراتكم.

التربية الاسلامية و تحفيظ القرآن ما يكونش في المدرسة و انما على ايد شيخ فاهم أسس اللغة و التجويد و يعني ايه دين. و ياريت محدش يجبر الطفل انه يحفظ القرآن أو يصلي من سن صغير من غير رغبته لأنك هتكرهه في الدين و تجيب نتايج عكسية في الآخر.

بالنسبة للتعليم الأزهري, فيكفي اني أقول أول دفعة من طلبة الثانوي الأزهري دخلت كلية صيدلة مع طلبة التنسيق العام (العربي و اللغات...الخ) لم ينجح منها أحد (الأزهريين سقطوا كلهم), و على أساس كده اتفتحت لهم كليات أزهرية خاصة بيهم.
أنا شخصيا في كلية الطب و شفت مناهج طب الأزهري و امتحاناتهم. المناهج واخدة قشور القشور و الامتحانات في مستوى الطالب الضعيف. و كونهم بيدرسوا علوم دينية مش مبرر لردائة تعليمهم الأكاديمي و ما يترتب عليه من عدم تأهيلهم و عرضتهم لعمل أخطاء أكنر أثناء العمل ممكن تودي بحياة المريض.
و كمان متنسوش الموقف اللي حصل من الشيخ الطنطاوي مع البنت المنقبة.

خريجي المدارس العربي اللي دخلوا معايا طب اكتشفوا ان الانجليزي اللي اتعلموه في ابتدائي و اعدادي و ثانوي طلع زي قلته و عانوا في أول سنة عناء شديد لأن المناهج كلها بالانجليزي و مكنوش قادرين يفهموا أي حاجة. و لغاية دلوقتي لغتهم ركيكة جدا و نطقهم سيء. و دي مشكلة كبيرة كمان لو فكروا يشتغلوا بره أو في مكان يشترط اللغة.

اللغة الانجليزية هي السائدة دلوقتي. و معنى كلمة سائدة اني لو كتبت مقال بالعربي يكفيني اني أترجمه للانجليزي لو عايز أوجهه للأجانب باختلاف جنسياتهم. معنى كلمة سايدة ان لو واحد صيني عمل اكتشاف و نشره في مجلة علمية هينشره بالانجليزي عشان العالم كله يعرف يقراه. معنى كلمة سايدة انها بتسمح لأي فردين من أي جنسيتين يتكلموا مع بعض. اللغة الانجليزية مش لغة الغرب "الفرنجة". اللغة الانجليزية هي لغة العالم.
أنا مش بقول اننا نتخلى عن تعليم اللغة العربية الفصحى و لو ان ضمر استخدامها في حياتنا اليومية...أنا بقول اننا لو فعلا عايزين مستقبل محترم لأولادنا يبقى لازم يتعلموا انجليزي كويس و من سن صغير.

من الآخر. انت اما هتتعلم انجليزي من و انت صغير و هتبقى عملية سهلة و ظريفة. يا اما هتتعلم انجليزي لما تخش كلية كل شغلها بالانجليزي و هتبقى عملية صعبة و رخمة. و لو انت خريج كلية عربي هتضيع منك فرص عمل كتير في مصر و بره مصر بسبب اللغة و هيبقى الوقت اتأخر على انك تتعلمها.

و العضوة hh أنا موافقها في كل كلمة هي قالتها.

**Lion_Heart** · 19-04-2010 03:22 PM

الاختيارات صعبة و ربنا يوفقنا للصالح

**Lion_Heart** · 25-05-2010 05:21 PM

المشاركة الأصلية كتبت بواسطة ralliart

انا واخد اعدادي من الهدى والضلمه :c_laugh[1]:
قمة الفساد والانحدار الاخلاقي والعادات السيئه وقواميس الشتايم بكل اللغات موجوده في المدرسه دي
مفيهاش اي حاجه اسلاميه غير مدرس بعصايه يحفظك نص جزء في السنه!!
ووقت الصلاه بيلمونا بالعصايه عشان نصلي
والولاد مفصولين عن البنات وبعد ما اليوم يخلص كله بيبقى سلطه قدام المدرسه وممكن تاخد مواعيد في نادي جزيرة الورد بعد ما الايشاربات (الغصب) تتخلع

غير كده كان في جوينتات بتتلف في المدرسه دي عادي

طيب .... نعمل ايه ؟
هل فى مدرسة افضل من الهدى و النور بالمنصورة و لا ايه رأيكم ؟؟
ولا ايه افضل الحلول ...

**Lion_Heart** · 25-05-2010 10:06 PM

و ياريت حد من الاخوة الافاضل يعرفنا مزايا و عيوب مدارس الهدى و النور بالمنصورة

**waelsaleh** · 15-06-2010 02:39 PM

أنا في رايي الشخصي ان افضل تعليم يجمع الدين واللغة هو الازهري الخاص لغات و توكلت علي الله وقدمت لابني فيه و يمكن التحويل منه لخاص لغات في اي مرحلة بعد ما يكون تعرف بصورة أفضل علي الدين وحفظ ما قدره الله له من القران و أتمني أن يوفق الله أولادنا في دينهم و دنياهم