الموضوع: ملحوظه على رادارات الدائرى

ليا صديق كان عامل حوار فى رمضان مع مدير ادارة المرور عن قصة الرادارت دى وخد منه شوية معلومات تفصيلية عنها لأنه من هواة الجرى

الرادارات اللى اتركبت واشتغلت حتى الان 16 وقبل نهاية السنة دى هيركب كمان 30 رادار عليهم فى خطة لتغطية الدائرى كله , او المناطق المهمة فيه على الاقل

الرادارات الجديدة لا يمكن العبث بها وفيها نظام انذار متطور بحيث لو اى حد قرب منه او اى محاولة تخريب حصلت له بيعمل انذار عند كل نقط المراقبة اللى حواليه وبيتم تبليغ كل الوحدات بمكانه لمنع اتلافه علشان على حد تعبيره الرادارات الجديدة غالية جدا

ده كمان المفاجأة ان صندوق الرادار مضاد للرصاص ومختبر منعا لإصطياده من بعيد , ما شاء الله يتهيألى احنا البلد الوحيدة فى العالم اللى بتحمى رادارتها من الرصاص :)

الرادار شغال بخط كهرباء مباشر لكن فى حالة قطع الكهرباء يقدر يشتغل على البطارية المدمجة فيه لمدة ساعتين متواصل

الرادار للأسف مش مربوط بشبكة المرور الالكترونية وتفريغ البيانات منه بيكون بالواى فاى عن طريق وحدات الشرطة اللى على الطريق ولكن الدفعة الجاية هتبقى متصلة بالأدارة مباشرة لسهولة تسجيل المخالفات , والرادارات الموجودة حاليا تقدر تخزن 40 ألف صورة قبل ما تمتلئ المساحة التخزينية فيها وبيتم تفريغها بحد أقصى كل 3 ايام

الرادارات متركبة على قواعد بتلف بالتحكم عن بعد يمين وشمال علشان تقدر تصور من قدام ومن ورا ويتغير وضعها فى اى وقت والمدى بتاعها كبير ( مرضيش يقول كام تحديدا ) وبتصور فى الاتجاهين لكن مش كلها , ولما سأله هل كل القديم كدا قاله لا دى دفعة صغيرة قوى اللى بتصور فى اتجاه واحد والغالبية العظمى فى الاتجاهين والجديد كله كذلك

الرادارات شغالة 24 ساعة حاليا بدون مشاكل ونفس النوعية هتطبق بطول طريق اسكندرية الصحراوى خلال بداية العام القادم

الرادارات الجديدة هيتركب منها جزء فى نص الطريق بدلا من الجانب وده هيزود مدى الالتقاط وهيساعد على الرادار مهمه الالتقاط فى الاتجاهين

وبالمرة بالنسبة للكاميرات زميلى قالى انه اتفاجأ ان الراجل عنده شاشات لعرض عدد كبير من شوراع وميادين البلد عن طريق كاميرات بث مباشر والراجل قاله اكيد انت مخدتش بالك منها علشان احنا مخبينها فى عواميد النور ولافتات الدعايا وهيتم نشرها فى كل الطرق الحيوية فى خطوة لعمل مركز متابعة مركزى لحل اختناقات المرور ومتابعة حال الشارع

وقالى ان الكاميرات صورتها عالية الجودة وبتتحرك وفيها زووم

واضح ان الداخلية هتشد حيلها قوى فى قصة الرادارات والكاميرات دى

الكلام ده جميل اوى وحضارى ويعاصر التكنولوجيا الحديثة وكل حاجة ماشى بس المشكلة ان احنا للأسف مش متعودين على النظام وخدنا على الهرجلة وعدم الانضباط لو الحاجات الجديدة اللى بيعملوها دى لو ماتطبقتش صح وكل الساثقين اتبعوها يبقى كأنها مالهاش لازمة
انا قصدى من الكلام ده ان لازم يكون فيه توعية الاول لقوانين المرور وقواعد القيادة لان فعلا الحال دلوقتى ان الواحد مابقاش عارف الصح من الغلط ومين اللى كان المفروض يقف ومين اللى رمى عالتانى ...الخ