عيب غريب جدا

**amoor77** · 30-09-2010 04:20 PM

لو سمحتوا حد يشور عليه اعمل ايه

انا عندي عربية فليشيا 2001 انجكشن , ظهر عيب غريب جدا فيها اني لما باجي ادورها في اي وقت تدور عادي جدا لكن لو بطلتها مثلا بعد عشر دقايق وجيت ادورها تاني ماتدورش بسهولة او ماتدورش خالص لازم احاول معاها جامد وادوسلها بنزين في حين اني لو سيبتها لمدة عشر دقائق على ما تهدا شوية وجيت ادورها تاني تدور عادي جدا بالاضافة الى انها احيانا وانا ماشي احس ان دواسة البنزين تحت رجلي رخت شوية وتقوم العربية نتشة مرة او مرتين زي ما تكون مابتحرقش

مع العلم :

- العربية مابتطفيش لوحدها سواء ماشي بيها او في السلانسيه

- مغيرلها فلتر البنزين والبوجيهات وفيها بطارية جديدة ومنظف الرشاشات والبوابة بالمنظف ولسه نفس العيب فيها

اخر كلام انه الحساس الموجود تحت الغطاء بتاع فتحة الهوا بتاغ غرفة الحرق ( هو جوه حاجة حديد كدة وراكب فيه فيشة ومش عارف اسمه ) بايظ ولازم يتغير وال rpm بحس انه بيرعش ومش مظبوط

ومش عايز اروح بيها التوكيل علشان اكيد هيشمطوني انا نفسي الاقي حل للعيوب ده وياريت لو حد يعرف ميكانيكي يفهم في الفليشيا الانجكشن ويكون عنده جهاز الظبط بتاعها يقولي عليه علشان فعلا انا تعبت من افتكاسات الميكانيكية

وجزاكم الله خيرااا

**SAMEH_FOUAD** · 30-09-2010 05:17 PM

اولا العيب اللى حضرتك بتقولة دة , هتشوف كتاوت البنزين , طلمبة البنزين

ثانيا : البوبينة

بالنسبة بقى للحساس دة الخاص بالهواء اسمة حساس mas / map ودة هيبان عيبة اكتر والعربية باردة لكن لما تسخن وتبقى تمام مش هيظهر اوى

**aymanay32** · 30-09-2010 08:20 PM

فيه سلك كهرباء رايح للمارش دة ممكن يكون خلال الفترة من 2001 و حتى 2010 تعب و بقى موصل على شعرة
و لما بتسخن العربية بيقطع و دة تتاكد منه لو انته ماشى بالعربية و دورت المارش و العربية دايرة و ما اشتغلش معاك يعنى مسمعتش صوته يبقى كلامى صح
هتشترى حتة سلك مكانها و تغيرها و خلاص يا بطل

**Adham** · 30-09-2010 08:56 PM

المشاركة الأصلية كتبت بواسطة aymanay32

فيه سلك كهرباء رايح للمارش دة ممكن يكون خلال الفترة من 2001 و حتى 2010 تعب و بقى موصل على شعرة
و لما بتسخن العربية بيقطع و دة تتاكد منه لو انته ماشى بالعربية و دورت المارش و العربية دايرة و ما اشتغلش معاك يعنى مسمعتش صوته يبقى كلامى صح
هتشترى حتة سلك مكانها و تغيرها و خلاص يا بطل

ياباشا السلك لو بيقطع على شعرة مش حايتوصل تاني لما العربية تبرد و دة بيبقى كابل تخين مش "حتة سلك" و لو قطع مش حايلقط و لو سبت العربية تبرد من هنا للسنة الجاية

المارش بيبقى واصللة سلك 12-16 مللي من البطارية و لو حطيت حتة سلك 3-4 مللي حاتسخن و تسيح و تولع خلال ثانية مجرد ماتدور مارش

و بعدين هو المشكلة ان العربية مابتدورش يعني المارش بيلف بس الموتور مش بيلقط

دي ممكن تكون العربية بتشرق بنزين و بتحتاج تتركن شوية لغاية ما شرقة البنزين دي تروح

و اكبر غلط ان تدي مارش و العربية دايرة لان كدة تحرق المارش لانة ما يستحملش يدور بنفس سرعه الموتور

**mido_soliman** · 01-10-2010 12:52 AM

بوبينة يا باشا اقلك عايز تعرفها كنت بعملها فى عربيتى 132 هات فوطة وغرقها مية ووحطها على الموبينة وامشى شوية وبطل ودور لو دارت يبقى الموبينة عايزة تتغير لانها بتسخن تروح فاصلة كهربة للموتور
تحياتى

**Adham** · 01-10-2010 01:20 AM

لو عيب البوبينة كانت تقطع و العربية ماشية لما تسخن

مش لما تبطل ماتدورش

انا رأيي يشوف سبب يكون بيشرقها بنزين و دة بيخليها محتاجة تتركن شوية لغاية ما البنزين اللي مسبب الشرقة دي يتبخر

**atamim** · 01-10-2010 12:16 PM

المشاركة الأصلية كتبت بواسطة adham

لو عيب البوبينة كانت تقطع و العربية ماشية لما تسخن

مش لما تبطل ماتدورش

انا رأيي يشوف سبب يكون بيشرقها بنزين و دة بيخليها محتاجة تتركن شوية لغاية ما البنزين اللي مسبب الشرقة دي يتبخر

مش شرط

ممكن جدا البوبينه تكون سخنت زيادة عن اللزوم

جرب موضوع الفوطة المبلولة دى علشان تبرد بيها البوبينه و جرب الموضوع دا

او روح لاى كهربائى قول له غير لى البوبينه بواحدة استعمال من عندك على سبيل التجربه و شوف الاداء اتغير ولا لقى

حصلت معايا زمان و كانت البوبينه هية السبب