استلمت ورخصت البيرسونا وبقيت بروتونى رسمى وليا الفخر
سلامى لكل شباب بروتون الجدعان اوى
الحمدلله استلمت بيرسونتى حبيبتى امبارح ورخصتها انهاردة وبجد مبسوط وفرحان بيها اوى ... وفعلا اللى قال ان اللى بيجيب العربية دى بيبقى عن حب مكدبش :B4_007:
حابب طبعا انقل ليكم انطباعاتى الاولى:
طبعا ساعة الاستلام انا كنت طابع ورقتين جيبتهم من المنتدى الجميل ده فيهم الحاجات اللى ابص عليها .. عملت كل المطلوب والحمدلله مكنش فى اى مشاكل وكله تمام.
1- العربية ما شاء الله من اول دوسة بنزين وهى عايزة تجرى بس مكنتش بجاريها وواخد بالى انى مقرصش عليها فى الاول... بس الاداء جميل وصوت الموتور حلو والعزل جوة العربية ممتاز.
2- الفتيس : طبعا هو تقيل شوية بس انا شايف ان ده طبيعى عشان لسة فى الاول بس مفيش العضة اللى سمعت عنها من بعض الناس الحمد لله.
3- الباور لاحظت انه تقيل طبعا غير الهيونداى اللى كانت معايا فرق كبير بس اكيد كده افضل تحسه مديك ثبات اكتر للعربية.
4- الفرااااااامل :) : طول المشوار اشتغلنى فى اول دوسة حسيت ان العربية مفيهاش فرامل لحد مفتكرت الموضوع ده ... انا حاولت بعد كدة اجرب اكبس فرامل حاسسها بتاخد وقت شوية لحد ماتقف يعنى مش عارف لسة مش مرتاحلها اوى... ممكن لسة متعودتش عليها.
5-الخامات الداخلية فى العربية الصراحة يا دوب تاخد مقبول واعتقد محتاجة معاملة خاصة عشان مايحصلهاش حاجة.
6- الرؤية فى المرايات الجانبية مش وحشة وانا سايق زى ما بعض الناس قالت .. مش بطالة كاشف الطريق بشكل كويس برضه.
7- ابعاد العربية محتاجة تعود .. انا جربت اركنها بين عربيتين وفشلت :11: المساحة كانت على قدها بس العربية عالية من ورا والرؤية شوية صعبة.
يعنى دى ممكن الحاجات اللى فى بالى دلوقتى واكيد حكتبلكو تقارير عن العربية والصيانات فى التوكيل اول باول..
طبعا مش عايز اقلكو انى كل شوية اطلع البلكونة ابص عليها واكلمها وابعتلها السلام وبحسها ملكة وسط العربيات التانية ... (ده جنان ده ولا ايه :fun_36_3_4[1]:)
اخيرا عايز اوجه الشكر لكل اعضاء المنتدى ده اللى كان ليهم الفضل فعلا فى اختيارى ده اللى ان شاء الله عمرى ما حندم عليه.
تحياتى