الموضوع: الزبالة في شوارعنا

بس يا جماعة علشان الحق يقال احنا بقالنا حوالي 8 سنين واحنا بنعلق الزبالة في حبل نازل من البلكونة وبتعدي عربية زبالة بتشيل الزبالة ..
ده نظام سائد في شارعنا كله .. مش عارف باقي الشوارع اية نظامها ..

المشاركة الأصلية كتبت بواسطة tyler_durden

أغلبنا بنرمي الزبالة في الصندوق المخصص
بس لو سمحت قوللي بتتصرف إزاي لما ترمي الزبالة جوه الصندوق و تقعد باليومين تلاتة ماحدش يلمها مما يؤدي إلى تراكم الزبالة و خروجها بره الصندوق ..
بتتصرف إزاي ?

أولا مش اغلبنا ولا حاجة وإذا اغلبنا بيعمل كده ده معناه إن اللي مش بيعمل كده هو القلة واللي بيرموا في الزبالة هم الاكترية وده مستحيل عشان إذا ده اللي بيحصل مكنتش هتشوف زبالة كتير في الأرض.

أصلا احنا هي دي مشكلتنا إن الاغلبية مش تمام ...يعني الاغلبية بيسوقوا بطريقة غلط الاغلبية بيرموا زبالة الاغلبية بيسرقوا الاغلبية مبيحترمش بعض الاغلبية مبيفكرش إلى في نفسه...

عشان إذا كان الاغلبية تمام زي ماحضرتك بتقول كب سعتها الناس هتستغرب لما تلاقي واحد أو اثنين بيرموا زبالة ويقول له إزاي يعمل كده ده مجنون ولا جي من بلاد تانية ...أو مثلا لما واحد يكسر عليك هتقول إيه ده إزاي يعني كده ...مش هتقول كله بيعمل كده وتلاقي الشارع كله ماشي كده أصلا وإذا إنت ماشي صح يبقى شكلك غريب ومش بعد تلاقي الناس اتخنقت منك مثلا إذا كنت مستني واحد يعدي أو مثلا واقف في إشارة وتكملة طريقك واقفة من الزحمة فـإنت المفروض واقف ومش هتمشي عشان كده هتزيد تقطع الشارع التاني على الفادي ,,,وتلاقي أول واحد ييجي جمبك يشتمك ويطلع يزيد الطريق واللي وراك يعميك بالنور ويطرشك بالكلكس.

وده أكبر دليل إن مش اغلبيتنا بيرمي زبلتو صح ولا بيحترم نفسه ولا غيره ولا القانون ولا أي حاجة.

وأرد على سؤال حضرتك...

هتصرف إزاي لما ارمي الزبالة ومحدش يلمها..

دي حاجة متخصنيش عشان أنا مليش تأثير فيها ...بمعنى إن أكتر حاجة ممكن أعملها إني اقدم شكوى .
انما اللي يخصني ومطلوب مني ومن كل الشعب...إنه يرمي الزبالة في المكان بتاعها حتى إذا كان المكان ده اتملى...فـبرده مش مشكلة افضل ارمي فيه ولما يتملي على الآخر ارمي جمبه بظبط وهكذا..ده السلوك اللي نادر نعمله غير كده يبقى الغلط علينا,,,ومثلا إذا هتكلم عن نفسي فـأنا في مصر الجديدة والحمد لله عربية الزبالة بتيجي بتشيل علطول..بس من بقى اللي هيشيل الزبالة اللي على الأرض ؟! في كل حتة؟ إذا رمينا الزبالة في مكان واحد ..حتى إذا مشالهاش الزبال النهردة هيشيلها بكرة ...بس لما ييجي يشيل هيشيل كل الزبالة عشان هي في مكان واحد.مش متوزعة في كل حتى في الشارع.

أنا كان معايا واحد الماني من أسبوعين تقريبا...وسألته " إزاي عندكم مثلا الناس بتحترم الطابور أو مثلا المرور " طبعا بعد ماعرفت إن دي الحاجات اللي دياتو من مصر ...فـكان الرد " أنا مش عارف ...بس هو إذا حد عمل كده فـالكل هيقولوا إزاي تعمل كده ومينفعش تعمل كده وكلهم هيقفوله"وده معناه إن العادي عندهم احترام الطابور ..وبالتالي لما حد يعمل حاجة مش عادية ..كلهم استغربو ومنعوه.


وبالنسبة لإقتراح عمل قانون يحاسب اللي بيرمي زبالة ...فـأكيد أنا مع حضرتك 100% بس معتقدش إنه هينفع منغير توعية ..الشعب محتاج معجزة و المعجزة دي احنا اللي ممكن نعملها لما نبدأ بنفسنا ونخلي اللي بيعمل الحاجة الغلط هو اللي من الفئة اللي مش منتشرة يعني يبقى الاغلبية اللي بيعملوا الصح ...وساعتها هتلاقي المجتمع بقى حاجة تانية خالص وعالفكرة برده مشاكل الحكومة هتتحل...إزاي ؟!

الحكومة دي ناس زينا..يعني ممكن ابن حضرتك يكبر ويبقى لواء أو وزير أو ظابط أو قاضي...ولما يبقى من الاغلبية الكويسين هتلاقي الحكومة بقت كويسة أو اغلبيتها كويسة..هي خطة طويلة الامد بس كان لازم تتعمل من زمان وكل ماناخر فيها مش هنخلص ومش هنتعدل ابدا.

وده برده في جميع المهن وجميع اوجه الحياة.

أنا مع حضرتك إن الحكومة غلطانة في موضوع الزبالة ده أكيد ...هم مش بيشيلوا الزبالة من أماكن معينة مثلا ...ماشي ...هل الحل إننا نرمي الزبالة في كل حتة عشان الحكومة أو شركة الزبالة مقصرة في عملها ؟! كده احنا بنموت نفسنا بنفسنا ...يعني مثلا الحكومة مقلتش نرمي زبالة ولا قالت نكسر على بعد في الطريق ولا نتعامل بقلة أدب مع بعد ولا ننصب على بعض.إذا الحكومة بتغلط مرة فـاحنا بنكبر الغلط ده ألف مرة..احنا نعمل اللي علينا الأول وبعدين نشتكي.

وأنا مش بقول إن الحكومة صح واحنا غلط ....لأ ابدا ,,بس احنا الاتنين غلط ودي المصيبة والحكومة دي مننا وإذا احنا بقينا محترمين وحرفين حدودنا ومحترمين نفسنا والناس اللي معانا ساعتها هنبقى حاجة تانية خالص وكل الناس هتحترمنا...مش زي مابيحصل دلوقتي.


معلش عشان الكتابة غلط بس معنديش عربي وباكتب ببرنامج مرن.

المشاركة الأصلية كتبت بواسطة microz

دوله زي الامارات! حديثه! كانت من 15 سنه شوارعها مش نظيفه ليه؟ على الرغم من توفير صناديق زباله ثابته على الارصفه ( علشان ترمي فيها ورقة السندويتش او ازازه البيبسي) و صناديق زباله كبيرة الحجم على مسافه كل 200 متر ( و الله كل 200 متر بس) في المجمعات السكنيه امام الفيلات و العمارات! و على الرغم من امتلاكها جيش كامل من عمال النظافه لا يتركوا شارع الا فتشوا فيه على النفايات و ازالتها و مرور عربه تفريغ صناديق القمامه مرتين يوميا و عربة كنس و رش الشارع مره يوميا مساءا! على الرغم من ده كان بيبقى في زباله في الشوارع لان الامارات لمه من كل الملل! باكستاني على هندي على بنجلاديشي على مصري و اغلب البيئات دي فقيره و تغيب عنهم ثقافة النظافه يا اما بسبب انهم عايشين في غيطان و البهايم حواليهم فمتعودين على الوساخه من بقايا برسيم او فضلات الحيوانات يا اما من اماكن صحراويه مافيهاش ولا كهربا ولا ميه بغض النظر عن ذكر صناديق زباله! الحكومه عملت ايه؟ فرض قانون غرامة 500 درهم للي يرمي كيس شيبسي على الارض (ااه و الله لو حتى كيس شيبسي) و تاني يوم من صدور القانون مسكوا مئات من المخالفين و يا الدفع يا الحبس!! كله اترعب! تلاقي اللي ماشي بيشرب بيبسي ماسك الازازه الفاضيه لحد ما يقابله صندوق زباله يرميه فيه!!!!!
الحل
1- قوانين صارمه
2- تطبيق القوانين دي من رجال شرطه شرفاء
3- توفير صناديف قمامه بوفره
4- تنظيف هذه الصناديق و تفريغها باستمرار
5- عمل برامج توعيه بيئيه في التليفزيون و الجرائد لتوضيح اضرار القاء النفايات عشوائيا و العقوبات المقابله للفعل

لو تلاحظ ان كل النقاط دي في ايد الحكومه فقطططططططططططط

دلوقتي قوللي الحكومه نفذت كام نقطه من النقاط المذكوره؟ :)

حضرتك ليه مجبتش سيرة الشعب؟! أنا كنت عايش في الكويت ومفيش قانون زي ده .والشوارع نضيفة الحمد لله.الفكرة في الناس...يعني مثلا هو هلاقي كام ظابط في الشارع عشان يديني مخالفة؟!ماأنا ممكن ارمي زبالة من البلكونة أو من العربية أو وأنا ماشي ومحدش يشوفني .هيحصل إيه ساعتها ؟ هي هي ...أنا مع حضرتك إن ده حل جميل بس قبل الحل ده لازم نبدأ بنفسنا...مافي قانون ضد السرقة والنصب والقتل والمرور والركن والسرعة وكل حاجة ..هل كل الحاجات دي مش بتحصل؟وجود قانون مش الحل الوحيد

عشان إذا كان هو الحل كان زمانك شفت شوارع القاهرة حاجة تانية بعد قانون المرور الجديد مثلا.بس اللي حصل انهم مقدروش يسيطروا على الناس برده ولسة تقريبا 90% من الشعب بيمشي على مزاجه ومش في باله أي قانون ولا أي حاجة ...وده عشان مش في كل شارع ولا كل وقت ولا كل مكان في ظابط..وده طبيعي في كل حتة.

الحاجة اللي هتحل المشكلة دي إننا نغير نفسنا وبعد كده نقول بقى عايزين قانون عشان في قلة من الشعب ماشية غلط مش كلنا ماشيين غلط.