قلبي وقع في رجليا وقعدت اصرخ في الشارع
كنا رايحين مشوار في شارع الهرم وفجأة سمعت صوت صراخ لطفل الحقني يابابا الحقني يابابا
لقيته ولد حوالي 10 سنين في عربية نص نقل من ورا وماشيين في اول حارة واحنا تالت حارة
الولد وقع عليه لوح خشب كبير زي ميكون قعدة دولاب او سقف دولاب
الولد كان واقف اخر العربية وساند ببطنه على سور العربية ووشه للشارع
قعدت اصرخ وانادي على السواق واصرخ واقول لجوزي شد وحصله وقرب منه في الحارة التانية
شدينا بس معرفناش ندخل الحارة التانية لان عربية جات
العربية التانية قعد يدي كلكسات وانا اصرخ والولد بيصرخ من الالم ويستغيث بابوه
واخيرا الحمد لله الرجل حس وهدى على جنب واحنا كملنا وعملنا يو تيرن ولقيت الرجل بيربط الخشبة والولد غالبا الحمد لله كويس
فضلت طول السكة جسمي مقشعر ومتضايقة على الولد واستغاثاته بابوه ومتضايقة عشان اهمال الاب وعدم تأمين العربية على الاطفال على فكرة كان في طفل تاني ويمكن اكتر بس اللي متأكدة منه انهم 2
ليه حياة البني ادم رخيصة والاستهتار وصل للشكل ده
يعني كان ممكن الولد يقع وكان ممكن يتكسر ضهره وبلاش ده كله كفاية حالة الرعب والالم اللي حس بيه