الموضوع: لهواه الدراجات(العجل) فقط ذكريات نسيتها ومش هتلاقيها الا معايا

اللى خلانى اكتب هو الموضوع ده http://www.nilemotors.net/Nile/184653-a.html
فكرنى بالعجله اللى عندى ولقيت نفسى بكتب الكلام التالى مع شويه بحث حلوين
=============================
فاكرين ياجماعه العجل ايوه العجل الحديد اللى كنت مبتنمش فى وقفه العيد وتفضل تزين فى العجل بتاعه والجادون والمواسير بتعتها بشويه ورق ملون وشراشيب او شراشير -حسب التنوع الجغرافى- على تزيين الدلايات البلاستيك اللى فيها عواكس حمرا وبرتقالى لزوم الشغل

طيب فاكرين المنفاخ بتاع العجله اللى اول ماتشتريها لازم تشيله علشان هيتسرق وخرطوم الهوا بتاعه اللى بيضرب لوحده

فاكرين تاجير العجل من العجلاتى وتكسر وقتك وتقعد تلف بيها لحد مايجيبك بالمكنه بتاعته ومع الوقت العيال بقوا بيعرفوا صوت الموتسيكل بتاعه من اول الشارع وبيلفوا من اى ناحيه وكان بيدوخ لما يلاقيهم .ساعتها كان اللى معاه عجله خاصه بيه كان فى نعمه ورحمه من قرف العجلاتى بس كان صحابه بيقرفوه(هات لفه هات لفه) انا فاكر ان العجلاتى عندنا كان بياخد الشبشب رهن والعيال كانت بتروحله باعفن شبشب عندهم ولما يتاخروا يربطوا العجل كله بحبل ويرموه قدامه فى اول الشارع ويجروا ومبروك عليك الشبشب ياعم صبرى

فاكرين حركات العجل الشهيره بانك تسوق وانت سايب ايدك وتمشى على الفرده اللى ورا بس والحصان والطلعه الامريكانى خصوصا فى الرمله والطين بتبقى اجمد والفرامل اللفه

كان قمه المزاج وانت بتغسل العجله وتتسلى بالجنزير والترسين-كانوا يدوبك 2 ترس قدام والتانى ورا غير العجل السرعات كان حاجه من الفضا- بالسولار علشان تزيتهم على نضافه بعد كده

الفرامل كانت قصه لوحدها كانوا4 انواع
- حديد وكانت معفنه ومعقده (زى اللى راكبه فى صوره العجله اللى فوق)
-بالبدال وكانت قويه جدا كل اللى تعمله ترجع البدال مره واحده
-بالواير وكانت جامده برضه ودى اللى استمرت
-الفرامل اليابانى وكان طمبوره بتركب على الاكس ورا



اللى كان عنده دينامو بقى كان باشا فاكرين الدينامو ابو فيل اللى باشاره حمرا صغيره ورا وكشاف كبير قدام وكان بييجى بلندتين احتياطى كمان وفيه selector اسود فوق للتحكم بالعالى والواطى كان اختراع وقتها






كانت الاجراس زمان جميله وبسيطه كان معظمها اللى بفص واحد لحد ماجه العملاق ابو فصين وكل السوق اكل
وزى اى حاجه جميله اختفى وبدا يحصل الانهيار عن طريق الجرس اللى ببطاريه وبزرار وبينور

كان يوم المطر بالنسبه للى معاه عجله متعه بس العذاب لما ييجى ينضفها او تصدى منه لو سابها

احلى حاجه ان بسبب الشقاوه زمان كان كل واحد لو عجلته حصل لها حاجه كان يعرف المشكله فين بالظبط ومكنش فيه اشتغالات عجلاتيه:
-الفورش -اللى ماسك العجله الاماميه- اتكسر يادى النيله هدفع 15 جنيه او 20 بالكتير
-الاكس اللى قدام اتقطم والبلى فرط يبقى 3 جنيه لو مصرى او 4 جنيه لو الاسود الصينى كان الصينى فى نظرنا زمان قمه الاتقان
-الجنزير عايز يتشد اعملها انا بمفتاح 15 احل الاكس اللى ورا وارجع الفرده لورا واربط تانى
-سلك الفرامل اتقطع يبقى اجيب واحد بنص جنيه نضيف واشحمه واركبه او ادق ورده وافلطحها فى السلك القديم ومصرفش حاجه
-صباع الفرامل طار واحد مكانه من ابو 75 قرش الصينى النضيف
-العجله عايزه تتوزن اوديها للعجلاتى يوزن سلوكها كلها بالدبله اللى معاه
-العجله اتخرمت اشترى علبه سلسيون ب75 قرش بتكفى 10 خروم على الاقل واى كولاحه واى داخلى قديم اقص منه وافك الخارجى بمفكين واكشف عليها بجردل الميه وبعد ماخلص اتاكد بصابعى ان الخارجى مفهوش مسامير لازم ابقى ناصح
-عايز شحم ومفيش اتسحب على المطبخ وخد من علبه السمنه بس اختراع فاشل وماثبتش جدارته

كان زمان الخير كتير و الماركات كتير ومتنوعه بين هندى وصينى ويابانى بس اليابانى ده كان قديم شويه زى الفوجى والناشيونال والماجنت


حد ينسى العجل الهندى السوبر باور والسندر والنوفا والانرون الممتازه وملوك العجل الهندى الافون والاطلس (كان عملى قوى الاطلس ده وكان طياره والافون كانت سريعه برضه)



حد يقدر ينسى العجل الصينى اللى كان واكل السوق زى الاسد الذهبى والفونيكس طبعا كانت العجله الرسميه للمصريين كانت صناعه العجل وقتها لعبه الصينيين ومكنوش بيستسهلوا ويقلدوا حد فيها حتى شعار الماركات كان جميل ورايق مش تقليد زى كل حاجه دلوقتى




مين فينا مشفش العجل الايطالى والانجليزى والاوروبى النضيف زى الفيلبس


اول ماجت ايام الجامعه اللى عنده عجله ركنها مش عارف ليه علشان خلاص الواد كبر ودخل الجامعه وانت فى مصر وانا كنت من اللى ركنوها ومن ساعتها العجل بقى متدارى فى التراب زى اى حاجه مالهاش لازمه
بقى هى دى العجله اللى كنت ممكن انام جنبها فى وقفه العيد يكون مصيرها بير السلم
او اقرب بياع روبابيكيا للاسف كانت الاجابه اه
صوره العجله بتاعتى اللى كل يوم كانت بتجرى 10 كم على الاقل

كل الحاجات الجميله دى راحت فين؟
راحت مطرح ما اى حاجه جميله
راحت فى طى النسيان وتاهت وسط زحمه العربيات والموتسيكلات الصينى
ياخساره العجل وياخساره الايام الحلوه واهلا بالكسل وبالكرش اللى طلع