حل مشكلة السخونة فى الفيليشا

**scaniax** · 02-10-2010 01:40 PM

السلام عليكم ورحمة الله و بركاته
سخونة الفيلشيا دى اسهل حاجة فى الدنيا ممكن تتحل بصابع رجلك الشمال طول ما دورة التبريد اللى راكبة هى الاصلى يعنى من غير ما نركب ردياتير ماركة ام حسن او مروحة ام اربعة و اربعين
باختصار
1 العربيه لما تغير وش السلندر لازم الميكانيكى يركب جوانين و يتأكد انه حط سيليكون كفايه و يربط مسامير الوش قوى علشان يضمن ان مفيش هوا هيدخل الماكينة و بعد اسبوعين ترجع تانى للميكانيكى يربط عليهم تانى جامد و تبقى دى اخر مرة و خلصنا من وش السلندر .

2 الوصلة اللى خارجة من الموتور فى دورة التبريد فيها ثيرموستات داخليه خلى الميكانيكى يفكها و يتأكد انها سليمة ( الثيرموستات دى غير بتاعة الردياتير ) غالبا الثيرموثتات دى شغلها انها بتقفل دورة التبريد لما بتكون العربيه بارده فى الشتا مثلا علشان العربيه تسخن معاك بسرعة و مع الزمن بيتكون عليها املاح و بتحتاج تتحط فى ميه نار او تتنضف شوية او تتغير علشان بتقفل دورة و التبريد و تفضل معلقة و اللى احسن من كده انك تشيلها خالص و تقفل الوصلة من غير ثيرموستات داخلية بس خد بالك ابقى سخن 5 دقايق زياده فى الشتا .

3 لو انت يا حلو اخدت خبطة فى فارغة الفيتيس و العربيه بتجيب زيت من تحت يبقى الماكينة بتاعتك بتاخد هوا و ده كمان يسخن العربيه مووووت و يعملها حالة هبل فى الجبل اه و الفارغة دى اغلى حاجة فى العربيه ب 750 جنيه و انت و شطارتك فى الحرفيين .

4 لو انت فاكر انك راكب بى ام و محمل العربيه كهربا كبيرا قوى و حاطط جى ام و زيرو باور و زينون الاسكودا ما تستحملش ضغط الكهربا العالى الا اذا عليت كهربة الموتور و ظبطت ضغط هوا الماكنة غير كده تسخن .

5 لو اخدت خبطة قدام فى الوصلة المعدن اللى خارجة من الردياتير و داخلة الماكينة و دى غالبا لما بتتخرم بتتخرم خرم رفييييع خالص و تعرفها بسفنجة فيها شوية بيريل تنزل الرغاوى على الماسورة و العربيه دايرة لو عملت فقاقيع يبقى الماسورة مخرومة و دى تمنها 50 جنيه .

6 بالنسبة لمروحة الردياتير لو مالقيتش بتاعة الفيليشيا اجرى على او واحد بتاع قطع غيار 128 و هات مروحة 128 على فكرة هى هى و مفيش اختلاف خالص و على ضمانتى انا كنت ماسكهم الاتنين و هما جنب بعض و مش لاقى اى فرق وعلى فكرة هى اوفر و امتن من الاصلى و زى ما قولت نفس الاداء .

7 خد بالك الزيت التقيل زى كالتك..... و الانواع دى تكبس على نفس العربيه و بتوصل ساعات للانفجار انا انصحك بزيت جميل جدا اسمة تعاون اس جى و على فكرة هو بيساعد فى لقط الماكينة فى البروده علشان كده هيبقى مناسب لما تشيل الثيرموستات و ب 50 جنيه 3000 كم
خد بالك لازم تروح لميكانيكى كويس فى تظبيط الكهربا علشان عليها عامل كبير
يالا تصبحوا على خير يا اجمل منتدى هاااااااااه خخخخخخخ
اخوكم فى الله
احمد سمير

**mr_sameh** · 02-10-2010 02:05 PM

بارك الله فيك وده مفروض يتبع في كل العربيات

**scaniax** · 02-10-2010 02:09 PM

اغلب العربيات الفيليشيا لازم تراعى فيها الحاجات علشان تتجنب مشكلة السخونة و كمان خد بالك لو العربيه الفيليشيا مكيفة و حبيت تغيرلها جوان و ش السلندر لأى سبب فى نوع للعربيات المكيفة و نوع للعربيات الفاضية لو ركبت جوان الفاضى و عربيتك مكيفة تأكد مش هتعرف تمشى ربع ساعة على بعض
اتمنى انى اكون قدرت اعمل حاجة كويسة علشان انا عضو جديد هنا

**zico2009** · 02-10-2010 03:44 PM

المشاركة الأصلية كتبت بواسطة scaniax

اغلب العربيات الفيليشيا لازم تراعى فيها الحاجات علشان تتجنب مشكلة السخونة و كمان خد بالك لو العربيه الفيليشيا مكيفة و حبيت تغيرلها جوان و ش السلندر لأى سبب فى نوع للعربيات المكيفة و نوع للعربيات الفاضية لو ركبت جوان الفاضى و عربيتك مكيفة تأكد مش هتعرف تمشى ربع ساعة على بعض
اتمنى انى اكون قدرت اعمل حاجة كويسة علشان انا عضو جديد هنا

بصراحة او مره اسمع موضوع جوان للتكييف الا اذا كنت تقصد اصلي او صيني
بس عموما هو نفس المتور ونفس وش السليندر وخامة الوش تفرق بس في العمر وتحمل العربية لو سخنت

**FBIAhmed** · 02-10-2010 09:26 PM

السيد احمد
معلش سؤالين
1- انا مغير وش السلندر بس جايب و احد اوريجنال من ارتوك نفسها التوكيل و مركب جوان اصلي من التوكيل هل لو وش السلندر جديد زيرو يعني اركب جوانين ليه
2 - فارغة الفتيس فعلا بترشح زيت بس خفيف جدا و بزوده كل سنه مره ايه علاقه فارغة الفتيس بالموتور مع ما هو الاتنين منفصلين من جوا مع العلم ان الفتيس كله مستعمل ب 700 جنيه

**د.محمود صلاح** · 02-10-2010 11:03 PM

شكراً لحضرتك للنقاط الهامة . ومبروك انضمامك للمنتدى نورت وشرفت

**scaniax** · 03-10-2010 05:55 AM

جوان وش السلندر بيحتوى على فتحات و مجارى للمياه و الزيت علشان كده لما بيتقطع من السخونة العربيه بتجيب مية على زيت و دى طبعا مشكلة كبير
الفكرة كلها ان فى جوانات فيها فتحات اقل فدورة التبريد بتبقى اقصر علما بأن العربيه الفاضية بتبقى نازلة بجوان ابو فتحات قليله تقريبا 8 فتحات او خروم فى الجوان اما العربيه المكيفة بيبقى جوانها حوالى 12 فتحة يعنى المية بتلف فى اغلب الماكينة علشان تعمل دورة تبريد كاملة

**scaniax** · 03-10-2010 06:03 AM

المشاركة الأصلية كتبت بواسطة fbiahmed

السيد احمد
معلش سؤالين
1- انا مغير وش السلندر بس جايب و احد اوريجنال من ارتوك نفسها التوكيل و مركب جوان اصلي من التوكيل هل لو وش السلندر جديد زيرو يعني اركب جوانين ليه
2 - فارغة الفتيس فعلا بترشح زيت بس خفيف جدا و بزوده كل سنه مره ايه علاقه فارغة الفتيس بالموتور مع ما هو الاتنين منفصلين من جوا مع العلم ان الفتيس كله مستعمل ب 700 جنيه

استاذى العزيز
1 الجوان الاصلى بتاع ارتوك اوتو يغنى عن الجوانين طبعا انا قصدى تجيب جوانين صينى او مصرى او تركى او حتى اللى بيقولوا عليه تشيكى اصلى بس من برة التوكيل علشان هما اضعف فأنت بتدعمهم ببعض و تتفادى انهم يطرقعوا تانى انما طبعا الاصلى بتاع ارتوك اوتو ده نمرة واحد و مافيهوش اى مشكلة لو واحد

2 فارغة الفيتيس بترد هوا فى الماكينة و لو عاوز تتأكد فك الكربيراتير و اكتمة بأيدك لو العربيه خلتها دايرة يبقى فى منفذ هوا للماكينة (علشان كتم الكربيراتير يبطل العربيه طول ماهو تمام ) الفكرة فى الفارغة مش دخول الهوا الماكنه لا الفكرة فى ضغط الهوا اللى ناقص داخل جزء من العربيه
و تحياتى