الموضوع: نقلت الملكية ورخصت من غير رشوة والحمد لله

السلام عيكم ورحمة الله وبركاته

النهردة والحمد لله إنتهيت من نقل الملكية + ترخيص العربية 3 سنيين من مرور السلام ، والحمد لله من غير ولا مليم رشوة (إكراميات زى ما البعض بيحب يسميها)

كنت قبل كده عملت رخصة السواقة وبرضوا بدون وسايط ولا محسوبية ولا رشوة ، والحمد لله الذى بنعمته تتم الصالحات

طبعا ناس كتير قالتلى لازم تدفع والكل بيدفع ، ومهندس الفحص هيغلس عليك ، والموظفين هيرخموا والكلام اللى أنتم عارفينه ده

وأنا فكرت فى الموضوع وقولت لو الكل بيدفع فأنا والحمد لله مش زيهم (ومش أى حاجه يعملوها الناس هعمل زيهم ولا هو انا معنديش شخصية ) ولو مهندس الفحص غلس عليا يبقى أنا عندي حاجه غلط ولو تستاهل فعلا يبقى هصلحها (مش علشانة ، علشاني أنا لأنى مش همشى مُخالف ، وانا كده كده كنت مظبطها قبلها ) ولو موظف رخم عليا هتمسك بموقفى وهخلية هو اللى يحترم نفسة بدل ما أنا اللى أبقى زية

المهم فعلا ذهبت لمرر مصر الجديدة علشان أطلع شهاة المُخالفات بعدها على الدراسة عشان حوار كمبيوتر (مش فاهم لية ) وبعدها مدينة نصر (علشان مُخالفات النمر القديمة ) ثم مصر الجديدة طلعت المخالفت الجديدة (والحمد لله مكنشي فية مُخالفات)

بعد كده طلعت عى مرور السلام وجريت جبت ورق فحص وفحصت الطفاية والعربية ، ومدفعتش (اللى بيرفع البصمة طلب منى فلس وانا قولتلة لأ )

بعد كده تانى يوم روحت على شباك التجديد وانا بسلم الملف الموظفة وبعد ما خلصتلى ورقي (بعد عناء طبعا) قالتلى روح أدفع الفلوس دي فى الخازنة وأنت راجع هاتلى كارت بعشرة رديت وقولتلها لأ برضوا )

والحمد لله طلعت الرخصة وإستلمت النمر الجديدة (ص ب ي )

مكدبش عليكم كان فية مُعاناة وتعب بس مش مشكلة ، المهم أنى مشيت صح ، ومحدش عرف يمشينى غلط ، ووصلت لهدفي فى الآخر بفضل الله ، بدون أغلط ولا أشتم ولا أرشي ولا أى حاجه بفضل الله

انا حبيت بس أنقل لكم الصورة ، وأن الموضوع بيمشي ، وإن الرشوة عمرها ما كانت أمر واقع ، الفرق الوحيد هل أنت هتسمح أنهم يمشوك غلط ولا أنت اللى تمشيهم صح

(بنفضل طول عمرنا نشتكي ونقول الرشوة الرشوة ، وبرة مفيش رشوة ، وأحنا أساسا بنساعدهم فى كده ، ومش عايزين نضحى من أجل القضاء على الظاهرة دي ، وقيس على كده كتيير )

من غير تضحية مفيش إصلاح

والحمد لله الذى بنعمتة تتم الصالحات