-
عين الحسود فيها عود
السلام عليكم ورحمه الله وبركاته
انا زمان كنت بضحك علي المثل ده رغم اني عارف ان الحسد حقيقه بس بصراحه عمري ما اهتميت بيه او عملتله اي حساب او ممكن كنت بقول دايما " كتني خيبه هتحسد علي ايه "
المهم
انا لسه كنت شاري النترا من شهرين وكنت تصورت انها خدت عينها زي ما الكل كان بيقولي قبل ما اجيبها انها هتاخد عينها - يا دوبك اول يوم ليها معايا اتخبطت مني وانا بركنها في الجراج قلت يالا الحمد لله
ومن يومين كنت ماشي في بلدنا لاقيت واحد من دفعتي بتاع الثانوي هوه مش صاحبي قوي بس معرفه بيوقفني بعشم قوي وقفت وسلمت عليه وسألته رايح فين قالي اي حته المهم اركب العربيه دي قلتله اتفضل انت تشرف
وركب ووصلته مطرح ما هو عايز وطول الطريق يكلمني عن العربيه " ايوه يا عم " عربيه وخطوبه بصراحه اسلوب كلامه معجبنيش بس مقدرتش احرجه بس من جوايا كنت مضايق جدا وبقرأ سوره الفلق
المهم روحت وركنت العربيه علي ما ادخل اكلي لقمه واروح عند خطيبتي يا دوبك نص ساعه وخرجت لاقيتها حد خبطها في الباب وجرحه وخلي منظر امها معفن قلت الله يسامحه اللي عمل كده ومشيت روحت لخطيبتي
وانا مروح من عند الجماعه :) ماشي في الشارع ناس الله يسامحهم حاطين حجر كبير في الشارع وكمان في الضلمه مخدتش بالي منه - لبست فيه - الاكصدام اتكسر والكرتيره وقعت والجنط انتني :( قلت يا عم امشي مالهاش لازمه لمت الناس وبقيت ماشي كاني راكب عربيه خرده :(
المفروض اني كنت مسافر ليلتها ورايح شغلي في شرم - غيرنا العجله بالاستبن ومشينا - وانا علي الدائري تقوم زلطه طايره زي الطلقه وضاربه الازاز اللي قدام ويتشرخ :(
بصراحه انا بقيت خايف - مش مهم العربيه في داهيه انا خايف علي نفسي واللي معايا لدرجه اني فكرت اركن ومسافرشي بس لازم اسافر
ايه رأيكم في العين دي !!! :) انا مش زعلان للي حصل للعربيه ده نصيب والحمد لله - انا اللي مزعلني ليه الناس بقت وحشه كده انا عمري ما تصورت ان حد يعمل معايا كده والغريب انه مستريح جدا ولو عايز يشتري بي ام هيشتري بس سبحان الله
في حاجه تانيه - انا في واحد اعرفه صاحب شركه ليموزين وعنده 3 عربيات النترا وواضح انه بيفهم فيهم قوي
كان راجع معايا لشرم ووراني حاجه عايز اخد رأيكم فيها
انا اعرف ان فيه زرار في بعض العربيات في الفتيس " اوفر دريف " تستخدمه لما تكون عايز تعدي من عربيه بسرعه - الالنترا مش فيها الزار ده بس هوه عمل حاجه في الفتيس عملت اوفر دريف وفعلا صوت العربيه علي وسحبت جامد جدا
هوه ركن الفتيس علي اليمين من عند ال d3 ركنه بس لليمين لا نزله تحت ولا طلعه فوق
ايه رأيكم في الحركه دي وهل دي فيها خطر علي الفتيس او المحرك ؟ هوه معاه النترا من زمان وعربيات كلها ما شاء الله شغاله فله
وابن الايه جاب سرعه 210 واحنا في الطريق وما شاء الله العربيه كانت ثابته جدا وده شيء كنت مستغربه مع كل اللي بيقول ان الالنتر مش ثابته بعد ال 120
-
هو ده الأوفر درايف بتاع الألنترا
-
الحمد لله على كل شئ طبعا
انت بتفكرنى باللى حصل ليا و لعربيات اللى فالبيت كلها
زلطه فالزجاج و خبطه باب ورا يمين و اكصدام امامى يمين بس انا عربيتى زاد عليها خبطه من قدام شمال :colsmil:
كل واحد كان يخرج نبقى مستنين يتصل يقول ان حاجه حصلت
بس الحمد لله انها بتيجى فالعربيه
-
ههههههههههههههههههههههههه
صحبك دا صعب اوي اوي
-
ربنا يبعدك عنك العين حاول تخرج لله او اطعام مساكين
اما بالنسبه للاوفر درايف فإنت لو دست الدواسه كامله هتعمل تسقيط النقله و ترجع من نفسها تجيب الغيار اللى بعد كده
اما الرجوع لل 3 يمين زى ما قلت تسقط النقله بس ممكن انت تنساها على كده و يفضل الموتور محبوس فى الغيار ده عقبال ما تفتكره. فأحسن انك لما تعوز دوس الدواسه نصها لو مش مزنوق و لو مزنوق دوسها للاخر و هتشوع العربيه ان شاء تعمل الواجب
بالنسبه للطريق ده بعد مفارق سانت كاترين و انت رايح شرم ممكن تحقق السرعه و ممكن 220 كمان بس ما انصحكش لا ن الكاوتش اللى نازل فيها اخره 210
قلبى معاك انا حاسس بيك و ربنا يعوضك خير.
-
مينفعش تحكم على ثبات العربيه و انت ماشى فطريق مستقيم
تقيس الثبات فالمنواره ملف و هكذا
انا اللى بتضايق من الألنترا فمطبات الهوا, كان معايا صنى و كانت افضل من الألنترا فالنقطه دى علشان اوطى و كمان المساعدين الخلفيه للألنترا بيزودوا الأحساس بمطبات الهوا
-
العين حق
والادعيه الشرعيه تقي باذن الله من العين
طبعا من اول دعاء شراء الجديد الى دعاء الخروج من المنزل الى اذكار الصباح والمساء
كل هذه الاشياء تقي من العين والحسد
وللمعلوميه
لو انتا بتقرا الادعيه دي فتأكد ان ربنا بعد عنك شر اعظم واكبر....
انا شفت الكثير من الحسد في اشياء كثيره
منها مثلا
كنت زمان بركب بسكلته في السعوديه
وكنت لسا جاب واحده جديده لنج وخارج مع واحد صاحبي
فقالي عايز اجرب العجله بتاعتك
قلتله مش هينفع لان عجلتك صغيره عليا
قالي عجلتك جامده ونفسي اركبها
قلتله مش هقد
ووالله بعد اقل من 5 دقايق واحد سعودي كان ماشي بالليل وطافي نوره وخبطني والعجله كاوتشها الخلفي اتطبق عالامامي وسبحان من طلعني من الموقف ده
وموقف تاني في موبايل كنت لسا شاريه واحد الزملا لقيته بيقولي الموبايل ده صوته عالي جدا
وهوا واقف معايا لقيت الموبايل قطع صوت
قلت تلاقيه مهنج
ارستر
مفيش
اتقطع الصوت تماما
ههههههههههههههههههه
طبعا ده عينه كالسهر الصائب والموبايل ده بعدها بيوم اتكسرت شاشته
وهكذا المواقف كثيره لكن الاهم ان في كل المواقف الاذكار كانت موجوده وياعالم كان ممكن يحصل للواحد ايه اكتر لو مكنتش قاريها...
تحياتي
-
معلش اقرأ قراءن كتير وطلع حاجات للغلابة وان شاء الله ربنا هايبعد عنك الحسد انا حاسس بيك وغير كدة مش كل شوية تلمع العربية وتغسلها ولو عليها الشمع الابيض شيلو ولو الفرش عليه الكيس شيلو وحاول تعمل مش شايفه لما تشوف حد مش تمام زى صاحبك ده وداري على شمعتك
-
في شهرين ويحصل فيها كل ده ؟
والله حرام بقى وانا لو مكانك ادعي على السبب والي اداك العين دي, والعين دي مش جهل ولا تخاريف , ده في حديث عن الرسول عليه الصلاة والسلام على ان العين حق.
ربنا يكفيك شر العين وشر الطريق ان شاء الله
-
وركب ووصلته مطرح ما هو عايز وطول الطريق يكلمني عن العربيه " ايوه يا عم " عربيه وخطوبه بصراحه اسلوب كلامه معجبنيش بس مقدرتش احرجه بس من جوايا كنت مضايق جدا وبقرأ سوره الفلق
ههههههههه
انا لو منك كنت فرملت ونزلته
Content Relevant URLs by
vBSEO 3.6.0 PL2