مشاكل فى الأسترا 2005 وكمان الحلول ( الجزء الأول ) ...
السلام عليكم ورحمة الله وبركاته يا شباب .
أنا جاي ليكم النهاردة بتجربة جديدة وبمشاكل كثيرة وحلها كمان إن شاء الله .
الأول أنا كنت بحس بتنتيشة بسيطة فى عربيتى لما بوصل لسرعة 70 كلم ولكن الموضوع بدأ يزيد بشكل ملاحظ فيه والتنتيشة كمان بتزيد ... ده بالإضافة إلا أنها وقت لما آجى أدورها تبطل على طول ..... وتحتاج بس دوسة بنزين علشان تقوم ..... وكمان فى رجة فى العربية لما تيجى تتحرك من وضع الثبات سواءاً لقدام ولا ورا .
طبعا طرحت موضوع فى المنتدى العظيم ده .... وكالعادة كان طنانى باشا متابع المشكلة لحد ما أقترح إنى أروح مقار علشان أكشف على العربية كشف عام .... وأشوف العيب فين .
وفعلا اتصلت وحجزت بس لقيتهم بيقولوا تاعلى من غير حجز فى أى يوم بس يكون على الساعة 8 ونص صباحاً .
وفعلا يوم السبت ( امبارح ) صحيت بدرى وسافرت من بنى سويف ( بلدى ) لحد ما وصلت مقار على الساعة 9 إلا ربع ودخلت ولقيت الراجل اللى واقف على البوابة بيسألنى إنتى أول مرة وجاى لحد معين ولا لأ .... بأمانة حسيت إنى هتقرطس ... فرحت غامزة بعشرين جنيه وقلت ليه ... أنا عاوز أحسن واحد في المهندسين هنا ..... وبالفعل راح باعتنى على المهندس / وجيه الخولى ... وسلمت العربيه لللمهندس .... وجربها وقالى هنحتاج 3 أيام علشان نصلح العيب وإن العربية ملهاش ملف عندنا وكلام كتييييييييييييير .
قلت ليه ابدأ بس واتكل على الله ....و أخدت نمرته .... وقلت ليه أنتظر قالى براحتك بس أنا هطول جدا .... قلت ماشى وسيبت العربية وكان كل شوية أكلمه وصلتوا لأيه يقولى لسه بنشوف ..... لحد الساعة 3 وربع قالى العربية فيها البوبينه بايظة ومبوظة البوجيهات وهى سبب التنتيشة وكمان قواعد الموتور واحدة مكسورة وأتنين انضغطوا ..... أغيرهم ولا لأ ..... طبعا رحت بدون تفكير واتصلت بطنانى باشا وقلت ليه على الأسعار اللى كانت مبالغ فيها جدا ....قالى مادام عرفت العيب يبقى خد العربية واشترى قطع غيارك واعملها برة ... وقد كان .... استلمت العربية والتقرير .... وطلعت من مقار وركنت العربية برة وأخدت المترو ونزلت العتبة وطلعت على سرور فى شامبليون ..... وانتهى الجزء الأول .... وفى الجزء التانى هقولكم فيه على قطع الغيار والأسعار والميكانيكى والأداء بعد التغيير ..... أوعى تمشوا .... فاصل ونواصل .
