الموضوع: هل النقل الثقيل مسؤول عن الحوادث بشكل رئيسي ؟ .. حادث حصل امامي

المشاركة الأصلية كتبت بواسطة msafa

فعلا
زي الزملا ما قالو النقل بيمشو بسرعة جدا
والله ببقى ماشي 100 الاقي مقطورة بترعشلي نور و لما بحب اجيبها عشان اقيس سرعتها الاقيها 120 او اكتر سنة

يبقى المحصلة النقل برضه غلطان
و ساعات بيبقو مستفزيييييييييييين على الدائري، ياخد الشمال و نقل تاني ياخد اللي جنب الشمال 2 او 3 كيلو بتخلي الواحد غصب عنه يعمل غرزة عشان يعدي

انا مع حضرتك ان في نقل كتير بيمشوا بسرعه وبتهور وده بيحصل قدامي لكن انا شايف ان التعميم خاطئ وإن مانقولش كل النقل التقيل, انا كنت باخد الدائري يوميا وشوفت كمية حوادث كتيره (ولا واحده منها كان ليها دخل بالنقل) و ده الي خلاني اقول ان مش كل النقل سبب الحوادث وانما السواق هو السبب. وفعلا مع حضرتك حق الواحد كان اوقات بيضطر انه ياخد غرز عشان يعدي وده الي الراجل الي اتخبط عمله بس ماعرفش يقدّر المسافه بتاعة الغرزه.
وشكرا على ردك

المشاركة الأصلية كتبت بواسطة theangel

اولا حمدلله علي السلامه
ثانيا انا من وجهة نظري ان المفروض العقوبات تبقي الضعف علي سواقيين النقل لإن في الغالب لو حصل حادث لاقدر الله بياخد نص اللي معاه في الطريق في الرجليين وكمان مفيش اي إلتزام بقوانين إستهتار مفيش بعد كده
والله انا لما بكون ماشي جمب نقل ولا حاجه بتشاهد مش مبالغه في التعبير ولا حاجه بس بجد الناس دي مفيش عندها اي إلتزام بالقوانين خصوصا في الطريق الدائري تلاقي كافة انواع الألات اللي بتمشي علي عجل موجوده وهما بيبقوا من اكتر اسباب انتشار الزحام وتعطل السير علشان كده المفروض يبقي في قانون مضاعف علي سواققين النقل يمكن الناس دي عندها خبرة كبيرة في السواقه والطرق ولكن من المؤكد ان مفيش اي خبرة في الإلتزام بالقوانين والدليل علي كده ان حضرتك بتقول ان كان في نقل في اليمين ونقل في الشمال وهما محدد ليهم حاره واحده يعني من الأخر هم واخدين الطريق بالحجم يعني لو في حد غلطان هيبقي النقل في البدايه ودي وجهة نظري الشخصيه وكفانا الله وكفاكم شر الحوادث ..........

الله يسلمك يارب, هو فعلا النقل لازم يبقى العين عليهم ويبقى في اهتمام شوية بس حضرتك لو تلاحظ ان في مشكلة في فهم قوانين القياده في مصر, يعني الي ماشي على الملاكي ماشي على النقل. اذا كان لغاية دلوقتي لسه في ملاكي بيمشوا بطئ جدا في الحاره الشمال ومش بس كده لأ وبيوقفوا يغيروا فردة كاوتش او غيره !!! بالذمه ده كلام ؟
انما غير كده انا متفق مع حضرتك في كل كلمة وربنا يكفينا شر الحوادث ان شاء الله

المشاركة الأصلية كتبت بواسطة memed220

اولا الحمد لله انك طلعت منها سليم
ثانيا من كلام حضرتك فهمت ان النقل التقيل كان ماشي فى الشمال وده في حد ذاته ممنوع
لو هو كان من الاول ماشي في اليمين زي باقي الدول مالنقل فيها بيمشي ماكانش سواق النص نقل اتجنن
وعمل اللى عمله لان لما النقل التقيل يمشي شمال بيخنق الطريق كله
عموما النص نقل غلطان والنقل التقيل برده غلطان

الله يسلم حضرتك والحمدلله اني طلعت سليم بدون اضرار .
انا يمكن ماوصفتش الاحداث صح بس النقل كان ماشي اقل من السرعه المقرره بس كان عاوز يتجاوز النقل الي على اليمين.
الاتنين غلطانين بس النسبه الاكبر على المتهور النص نقل عشان اخد الغرزه بغشامه او بالدراع زي مابيقولوا.

المشاركة الأصلية كتبت بواسطة almohake

أنا شايف ان المشكلة مش فى نوع العربية المشكلة فى نوع السواق .

خير الكلام ما قل ودل , ودي النقطه الي انا عاوز اوصلها.
شكرا على رد حضرتك

المشاركة الأصلية كتبت بواسطة ahmed_mido1889

مقدرش اقولك مش هم السبب الرئيسي
هو السبب دلوقتي ان كل واحد مش لاقي شغلانه شغال سواق لا هو بيفهم في فن السواقه ولا اصولها
يعني ببقي رجع من طنطا تلاقي بتوع الميكروباص بيخش غشوميه فاكرك هتكش منه
وبتلاقي النص نقل ماشي بيغرز وتلاقي نقل بمقطوره ماشي في اقصي الشمال علي120 وبيغرز ولو لقي حد قدامه مبيعجبوش ممكن يخبطله العربي في الشنطه علي سبيل الهزار
المشكله دلقتي مبقاش حاجه اسمها القياده فن -ذووق -اخلاق

فعلا حضرتك معاك حق, وكل الي سابق ذكرهم دول بيعملوا حوادث وناس بتموت (حصل قدامي برضه حادثة ميكروباص اتقلب وراح الناحيه التانيه ولا كان في لا نقل ولا غيره) يعني فعلا هو موضوع غشوميه ولازم كل الناس دي تروح مدرسة تعليم سواقه وتاخد الرخصه من اول وجديد.

المشاركة الأصلية كتبت بواسطة mr_sameh

هما سبب من اسباب الحوادث لكن مش الرئيسي

اكيد سبب, انا مش بدافع عنهم احسن تقولوا اني واحد منهم :)
انا بس ضد مبدأ التعميم عشان الموقف الي حصل قدامي امبارح (رغم اني ماعرفتش اوصف وقائع الحادث) كان يظهر للي يشوف الحادثه ان النقل كان مالهوش ذنب. وده سبب اني عملت الموضوع ده. وشكرا لحضرتك