هل النقل الثقيل مسؤول عن الحوادث بشكل رئيسي ؟ .. حادث حصل امامي

**mahmoud_afifi** · 03-10-2010 08:52 PM

السلام عليكم ورحمة الله

معظم حوادث الدائري والطرق السريعه بيكون فيها كذا طرف من اهمها النقل الثقيل. و اول لما نسمع ان في نقل نتهمه بإن هو السبب ونقول لازم مايمنعوها من الطريق. ومع ذلك معظم الحوادث بتحصل بسبب ملاكي او نصف نقل.
اكتشفت مؤخرا ان سواقين نصف النقل (خاصة الحديث منها) هم اخطر من سواقين الميكروباصات والنقل التقيل.

النهارده وانا في طريق السويس في طريقي للكليه ماشي بسرعه حبتين عشان كنت هتأخر و لقيت قدامي زحمه كده ولخبطه بس الطريق ماشي يعني. نقل تقيل قدامي وعلى يمينه نص نقل وقدام النصل نقل ده عربية نقل تقيل تانيه. كان عاوز يخطف غرزه من قدام النقل الي على شماله (الي هي قدامي) بس ماعرفش يقدّر المسافه وخبط في النقل مع ان النقل مالهوش اي ذنب وحدف شمال لدرجة انه كان هيدخل في الحاجز الاسمنت. وطبعا العربيه النصل نقل انحرفت شمال و النقل دخل فيه بسرعته وطلعه من فوق الاسمنت وقلبه في الرمل. طبعا غبااااار كتير حصل في الطريق لدرجة ان رغم اني كنت ورا النقل مباشرة على بعد مترين او 3 الا اني ماشفتش حاجه و النقل وقف وكنت هخبط فيه لولا ستر ربنا.

دلوقتي النقل التقيل اصبح طرف ويعتبر هو الي قلب النص نقل بس مش ذنبه. الذنب كله على النص نقل بتهوره.

السؤال بقى. هل النقل الثقيل مسؤول عن الحوادث بشكل رئيسي ؟

**mahmoud_afifi** · 03-10-2010 09:38 PM

المشاركة الأصلية كتبت بواسطة onz

اولا الف سلامة عليك
ثانيا
اكيييييييييييييييييييييد النقل الثقيل عليه عامل كبير علي ارتفاع نسبة الحوادث في الطرق السريعة
انا كنت ماشي مره في طريق مصر اسماعلية الصحراوي ( بعد مدينة الشروق)
فجاه لقيت مقطورة بتاخد غرزه من الشمال لليمين ( و انا كنت يمينه )
و مش عارف ليقته بيزنق عليا جامد ( علي ما اعتقد اول مره ياخد غرزه في حياته علشان معرفش يحكم نفسه )
طبعا هو اجبرني اني اطلع من الطريق المسفلت و امشي في التراب علشان افديه ( ستر ربنا مكنش في حاجة علي يميني )

الله يسلمك.
طبعا اكيد عليهم عامل كبير بسبب الخطوره الي بيسببوها مع اقل حركه او خطوه. انا مش ببرر اخطائهم وهم بشر و زي ما في ملاكي متهورين في نقل تقيل متهورين. و لاحظت ان في عربيات نقل بتكسر على الملاكي بسبب عيوب في الطريق او حفر تؤدي لااختلال العربيه بس عيبهم انهم مابينتبهوش بدري وبيكسروا علينا.

وطبعا الف سلامه على حضرتك و الحمدلله انها جت سليمه.

**horas3000** · 03-10-2010 09:41 PM

اولا الحمد لله علي سلامتك
ثانيا النقل التقيل المفروض ميمشيش الا في الحارة اليمين فقط
و الكلام ده معروف و مطبق في كل العالم
فكون ان النقل اللي كان قدامك مش ماشي في اليمين من وصفك للحادثة فيبقي غلطان و غلطة ده سبب من اسباب الحادثة

**mahmoud_afifi** · 03-10-2010 10:10 PM

المشاركة الأصلية كتبت بواسطة horas3000

اولا الحمد لله علي سلامتك
ثانيا النقل التقيل المفروض ميمشيش الا في الحارة اليمين فقط
و الكلام ده معروف و مطبق في كل العالم
فكون ان النقل اللي كان قدامك مش ماشي في اليمين من وصفك للحادثة فيبقي غلطان و غلطة ده سبب من اسباب الحادثة

الله يسلمك.
انا عارف ان المفروض النقل يمشي على اليمين وطريق السويس تقريبا من اكتر الطرق في مصر النقل التقيل بيلتزم بالقاعده دي. بس المشكله ان الطريق عباره عن حارتين فقط ولما يكون في عربيه نقل ماشيه بسرعه اسرع نسبيا من الي امامها بالتالي بيضطر انه يتجاوزها من الحاره اليسار. وده الي كان حاصل النهارده بس النص نقل المسكين كان متسرع. وشكرا على مشاركتك واهتمامك

**mahmoud_afifi** · 03-10-2010 10:13 PM

المشاركة الأصلية كتبت بواسطة x512

طبعا لأ...لان في سواقين ملاكي بيمشو بسرعات جنونيه و في سواقين ميكروباص برضو بتجري و تاكل الطريق غرز و مطبات و في ناس بتمشي بسرعات اقل من المقرره و تلاقيها ماشيه علي الشمال...بالتالي الطريق يتقلب لسرك...كل واحد عاوز يعدي التاني ...لا البطيء عارف يمشي ولا السريع عارف يمشي...و اولا و اخيرا عدم طبيق النظام هو السبب الرئيسي ...و الف حمد لله علي سلامه حضرتك

اشكرك على اتفاقك معايا في الرأي لأن التهور اصبح المسبب الرئيسي للحوادث وليست الأداه (حجم السياره). وعجبني تشبيه حضرتك في كلمة (سرك) لأن ده بقى واقع الشارع المصري من طرق داخل البلد و في الطرق السريعه. ولما الاجانب بيشوفونا طبعا حاجه تكسف.

والله يسلمك وشكرا لذوق حضرتك