الموضوع: .. تقرير صيانة الـ 5000 كم للأوبترا الأوتوماتيك .. منصور التجمع الخامس ..

قبل بدء الحديث عن صيانة العربيه .... أحب أشكر الأستاذ / أيمن علي ( aymanmaly ) شكر خاص على نصيحته ليا إنى أروح أعمل الصيانه فى فرع التجمع الخامس .

و الحمد لله تم عمل صيانة الـ 5000 كم فى فرع التجمع الخامس .... وكان برنامج الصيانة كالتالى :

- حجزت بالتليفون من كام يوم ، وتم إستلام رساله من التوكيل ( منصور ) لتأكيد الحجز ، ورساله أخرى قبل ميعاد الصيانه بيومين لتذكيرى بميعاد الصيانه ، وكان ميعادى يوم 4/10/2010 الساعه 10:30 ص ورقم الحجز ( 2 )

- إشتريت زيت موبيل 1 ( 10000 كم ) ، علشان أنا عارف إن فرع التجمع الخامس بيستخدموا زيوت شل مش موبيل .

- روحت المركز الساعه 10:15 ص وقابلت المهندس / محمود فراج وطبعاً قولتله إنى من طرف الأستاذ / أيمن على وقولتله ( كلمة السر ) وتم إستلام العربيه وبدء العمل الساعه 10:30 ص بالظبط .


- كانت ملاحظاتى على العربيه كالتالى :

1 . إحساس برعشه بسيطه فى الموتور ودواسة البنزين عندما يرتفع الـ RPM على الـ 2.50 .... قالى : بعد تنظيف فلتر الهواء وفلتر البنزين إن شاء الله مش ح تحس بالرعشه دى ... وفعلاً وأنا ماشى لاقيتها بتحصل بسيط جداً ومش على طول .

2 . صوت الموتور ....... عالى شويه وإحساس بصوت تكتكه ( تكيهات !! ) .… بعد تغيير الزيت والفلتر لم أسمع صوت عالى ، ويمكن صوت التكتكه ده كنت بسمعه أول لما إستلمت العربيه بس .

3 . صوت تكتكه من بطن السياره عند إبطال المحرك بعد مشوار طويل ....... ( سوستة بخار البنزين !! ) .... قالى : لأ ده عادى الموتور بيبقى سخن وبيريح بعدها .... مع العلم بأن عضو هنا فى المنتدى ( Hossam_Hassan ) كان عنده نفس الصوت وتم تغيير " سوسته بخار البنزين " ...!!!

4 . ضبط رجلاش فرامل اليد .... تم ظبطها وبقت 100 100 .

5 . صوت خشونه بماكينة الزجاج ....... ( لجميع الأبواب ) .... تم تنظيفها بـ WD40 وللإسف مفيش تغيير .. بس قالى : سيبها يومين علشان المنظف يعمل مفعوله ، ولو الصوت حصل تانى مضطر تروح المركز الرئيسى ( الهرم ) لإن هنا مافيش صيانه لبودى العربيه .... طيب إيه العلاقه ...؟!!!

6 . رعشه بسيطه جداً فى الموتور ، وخصوصا ً فى الصباح .... قالى : ده العادى فى الصبح بس .

7 . تزييت دواسة الفرامل .... علشان كانت بتعمل صوت تزييق خفيف .. وتم تزيتها أيضا بـ WD40 وبقت تمام .

8 . دبدبه العفشه .... تم تربيطها كلها وبصراحه حسيت بفرق شاسع بعد التربيط ( ده أنا كنت راكب منخُل ) .


- وكانت عندى شوية إستفسارات وهى :

1 . بدء تشغيل المحرك ، وكيفية التسخين ... قالى : سيب المفتاح لغاية ما لمبة الـ HOLD تطفى وبعدها سخن العربيه دقيقتين بس وأمشى براحتك بعدها .

2 . إنتظار السياره ( الـ P ، N ) .... قالى مفيش مشاكل بس يفضل على الـ P علشان الـ N تعتبر نقله من النقلات ....!!


- أشياء أخرى تم عملها :

1 . تنظيف فلتر الهواء .

2 . تنظيف فلتر البنزين .

3 . تنظيف الموتور بالهواء .

4 . فحص جميع السوائل بالعربيه ( زيوت ومياه ) وتم تزويد مياه المساحات بمياه عاديه .

5 . تنظيف مكان فلتر الزيت قبل تركيب الفلتر الجديد .

6 . تنظيف الطنابير وتيل الفرامل بالهواء .


- وكانت تكلفة الصيانه كالتالى :

جنيــه
250 قيمة زيت موبيل 1 ( من بره التوكيل وتحديداً من موبيل العروبه )
19 قيمة فلتر زيت ( بالضريبه )
----
269الإجمالى
===

وتم الإنتهاء من الصيانه الساعه 11:00 ص بالظبط ( نصف ساعه بس ) .


إيجابيات فى الصيانه والمركز ( أعجبتنى ) :

1 . المكان مش زحمه خالص ، أو يمكن علشان أنا حاجز يوم الإثنين .

2 . الإحترام والذوق فى التعامل ، ووقوفك جنب العربيه بيخليك تستفسر عن كل حاجه بتحصل .

3 . كل شويه الفنى بيقولك " لو ليك أى ملاحظات تانى يا باشا قولها علشان أعملهالك " .


سلبيات فى الصيانه والمركز ( لم تعجبنى ) : هى لا تعتبر سلبيات بالمعنى المفهوم لكن نقدر نسميها نقاط ضعف :

1 . المكان صغير شويه .... 3 أماكن بس لـ 3 سيارات .

2 . عدم وجود جميع التخصصات ، زى السمكره والدوكو .... يعنى يعتبر مركز للصيانه ( مواتير وعفشه وكهرباء وأعتقد تكييف فقط ) .

3 . عدم وضع أى أكياس بلاستيك للكراسى والدريكسيون أثناء عملية الصيانه ... ويمكن ده راجع لإن العميل نفسه واقف جنب العربيه وهو اللى بيحركها .


وشكر خاص برضه لأيمن ( الفنى ) إللى مكانش مخلينى محتاج حاجه ، بصراحه ده ولد ممتاز .

وبوجه عام أنا الحمد لله راضى بما تم فى صيانة الـ 5000 كم .


على فكره يا جماعة أنا عندى العربيه عامله 2800 كم بس ....!! ح تسألونى ليه يا واد يا باسم يا عبيط إنت عملت الصيانه دلوقتى ، ح أقولكم علشان :

1 . ضمان العربيه بيقول : 5000 كم أو 4 شهور ..... وأنا مستلم العربيه يوم 4/6/2010 ، يعنى 4 شهور بالظبط ، ومش طالبه إن لو حصل حاجه فى العربيه لا قدر الله بعد كده وإحتجت ليهم ، ميتلككوليش على الصيانات .

2 . ضمان العربيه بيقول : يفضل عمل صيانه قبل الـ 5000 كم أو الـ 4 شهور فى حالات معينه ... منها السير فى الزحام الشديد داخل البلد ..... وأنا أغلب مشيي بالعربيه جوه البلد فى الزحمه اللى حضراتكم عارفينها طبعاً وفى الجو الحر إللى فات إللى إنتوا برضوا أكيد عارفينوا .

3 . وعلشان برضه كان نفسى أستوفى الملاحظات إللى أنا سبقت وذكرتها وأخلص منها .


دوشتكم بكلامى الكتير .... بس كان نفسى أوصل المعلومه بالتفصيل الممل علشان الكل يستفاد ، وشكراً لوقتكم .


ملاحظه : لقيت ورقه متعلقه فى المركز مكتوب عليها " لا يتم إستقبال أى سياره بدون حجز مسبق عن طريق الرقم 16424 إعتباراً من 3/10/2010 " .... فيا ريت كل اللى نفسه يروح المركز ده يحجز قبلها بالتليفون .

الله ينور تقرير ممتاز جدا جدا جدا..........وان شاء الله ربنا يبركلك فيها ومش تتعبك ابدا وتبقى وش السعد والخير عليك