ركبت اكصدام خلفى جديد للماروتى
السلام عليكم
تم بحمد الله تركيب اكصدام خلفى جديد للعربية الماروتى بتاعتى
اصلا الاكصدام القديم كان جاب اخره من كتر الخبطات و التكسير و اللحام اللى انا كنت بعمله
و انتهى خالص فى العيد اللى فات كنت راكن فى وسط البلد و تقريبا واحد سند عليه برجليه و هوا بيشرب سيجارة فجاب شرخ جديد فقررت انى اشترى واحد جديد و اتصلت بالمحلات و الاسعار كان كالتالى للأكصدام الهندى الأصلى:
- سوزوكى سنتر (التوفيقية) 160 جنيه
- حسن حسنى سوزوكى اوريجينال (روض الفرج عند مستشفى الرمد) 150 جنيه
- محمد عباس (التوفيقية) 135 جنيه
فجبته من عند محمد عباس و ركبته بنفسى و التركيب سهل اوى هوا عبارة عن 3 مسامير
مسمارين من الاكصدام من فوق يمين و شمال قلاووظ فى جسم العربية و فيه مسمار تالت بيبقى ورا لوحة النمر بتاعة العربية و الاكصدام بقى زى الحديد و بعد كدا ركبت النمر و هيا طبعا بيبقى معمول حساب المسامير بتاعتها فى الاكصدام لكن بتبقى للنمر الاصغر حجما (نظرا لأنها كدا فى الهند) لكن طبعا احنا ربنا مباركلنا فى حجم النمر بتاعنا فأنا اتضطريت اكبر دماغى و اخرم مكانين جداد للنمر فى جسم الاكصدام عن طريق مسمار برمه و النتيجة النهائية ميه ميه و الحمد لله