قطع غيار الالماني القديم في ارخص .. انما الجديد نفس الموضوع .
اه والله بجد .
عرض للطباعة
الخلاصة فى نزول سعر إعادة بيع الميجان :
1- عدم إقتناع الشعب المصرى بالتكنولجيا الحديثة الموجودة فيها و خوفه من كل ما هو جديد و عدم رغبته فى إنه يبقى تحت إيد التوكيل .
2- إقتناع المصريين بإن الكرولا و اللانسر أفضل لعدم إحتوائهم على هذه التكنولوجيا الحديثة و سهولة تصليحها عن الميكانيكيون العاديين و الذين لهم دور مهم فى إقناع عامة الشعب بعدم إمتلاك مثل هذه السيارات حتى لا يفقدوا زبائنهم.
3-الكثير من الإشاعات إللى طلعت على الميجان لعدم إقتناع المصرين بأن هذه السيارة بكل هذه التكنولوجيا و الأوبشنز ممكن تباع بهذا السعر المعقول لذا يجب أن يكون هناك الكثير من العيوب فيها والغريب فى نفس الوقت الإقتناع بشراء سيارة كالكرولا 2007 زيرو بمبلغ يكاد يكون أغلى من الميجان الفول أوبشن الزيرو و ليس بها أى تكنولوجيا حديثة سواء2 إيرباج و فى نفس الوقت الإقتناع بشراء الكرولا الجديدة بعد ما بدأو ينزلوا بعض التكنولوجيا اللى كانت موجودة فى الميجان من 2003 بسعر يقل عن الكرولا القديمة و هى زيرو و حجتهم فى الإقتناع إنها رخيصة علشان بتتجمع فى جنوب أفريقيا فى حين إن الميجان رخيصة أيضا لتجميعها خارج فرنسا فى تركيا.
4-إيهام الكثير من الناس بأن صيانة و قطع غيار الميجان نار و طبعا إنت تحت رحمة التوكيل و بالتالى مافيش حاجة إسمها تايوانى إللى مخلى قطع غيار اليابانى رخيصه لكن لو نقارن يابانى بفرنساوى حتلاقى الأسعار متقاربة و تكاد تكون الفرنساوى أرخص فى البعض مع العلم بان أسعار صيانة الميجان مش غالية و تكاد تكون أرخص من الكرولا القديمة مثلا فى صيانة الـ20000 الف و فلتر البنزين مثلا فى اللانسر فى حدود 400 جم و يتم تغييره كل 20 الف كم فى حين سعره فى الميجان لا يتعدى 100 جم
مع الفرق إن التكنولوجيا فى الميجان أعلى كثيرا فى الكرولا القديمة و اللانسر القديمة و بالتالى حتى لو كانت أعلى فدا طبيعى لفرق التكنولوجيا فما بالكم بان اسعار الصيانة الدورية متقاربة بينهم و فى إنتظار معرفة أسعار و صيامة الكرولا و اللانسر الجديدة .
5- الإهمال إللى إتعود عليه المصريين فى صيانة سيارتهم و دا إللى خلا بعض الناس ما يعملوش الصيانة الدورية بتاعة العربية فبالتالى يفأجا صاحب السيارة بوجود مشاكل فيها كثيرة و عند سؤاله عن قيامه بالصيانة فى مواعيدها فبقول لا فبالتالى سوف يجد فاتورة محترمة من التوكيل لإصلاح البلاوى إللى الباشا مغيرهاش فى مواعيدها و أثرت على حاجات تانية و يخرج بعد كده يقول دى عربية زبالة و قطع غيارها نار لإنه الباشا فاكرها عربية زى الكرولا و لانسر أقصى اوبشنز فيها سنتر و زجاج كهرباء و مش فاهم إنها مليانه تكنولوجيا حديثة كعادة السيارات فى الخارج و ليهم مواعيد محدده فى الصيانة يجب عملها للمحافظة على كفاءة هذه السيارة .
خلاصة عيوب الميجان إللى ظهرت :
1- نتشة فى الفتيس بين نقلة الاول و التانى و دى أرحم كثيرا من التأخير فى النقلات الموجود فى الأسترا الجديدة و نفس النتشة دى انا سمعتها فى عربيات أخرى زى 307 و الاوكتافيا و الجيتا يعنى واضح إنها شائعة فى كل الأوربى و حلها كما قال الزميل أحمد تغيير الزيت كل بـ 280 جم تقريبا و لكن دا ليس عيبا فى الزيت و لكن لغنه غير مخصص للأجواء الحارة و الاتربة المليانة فى بلدنا الحبيبة أو تنزيل السوفت وير الجديد إللى بيساعد على تظبيط ميعاد نقل النقلات (ضمان الفتيس 100 الف كم يعنى لو فيه عيب فعلا كبير كانوا ماخلوش الضمان كبير قوى كده ).
2- الجنوط الالومونيوم يتتنى فى الحفر المليانة فى بلدنا و تم حلها فى موديلات 2006 و 2007 بجنوط أخرى .
3- الكويلات التى تقوم بعمل الموبينة و يبدا تغييرها بعد الـ 40الف كم تقريبا و بتكلفة 550 جم .
4- علبة الدريكسيون ظهرت فى بعض الموديلات نتيجة لشوارعنا الممهدة بعناية فائقة و تمنها فى حدود 1500 جم .
هذه هى العيوب التى ظهرت فى الميجان من ملاك السيارة و من الوكيل
الخلاصة كما قالها لى مدير معرض السبع الموزع لرينو هذه السيارة خسارة إنها تتباع فى مصر بالأوبشنز دا لإن المصريين بيقلقوا من التكنولوجيا الجديدة و الأوبشنز الكتيرة
ماشي معاك يا احمد باشا في كل كلامك
بس معلش يعني انا لما اركب ياباني و يديني الرفاهيه اللي بحتاجها كتكيف قوي او تسارع معقول و في نتفس الوقت بلاقي قطع غياره ارخص من الفرنساوي علاوه علي ان الفرنساوي الجديد زي الميجان و ال 307 عاوز صيانه دايمه في التوكيل و مراعاه و عنايه .
طب انا شاري العربيه علشان تريحني و لا شاريها علشان كل 10 و لا 20 الف كيلو اطلع علي التوكيل .
ما الواحد بيركب عربيات من زمان و الحمد لله عمرها ما عطلت الواحد علي الطريق و برضه عمر ما الواحد راح لتوكيل .
يبقي انا استفدت ايه لما ركبت فرنساوي؟؟؟
وجع قلب علشان تكنولوجيا عاليه
معلش يعني تغور و لا اني ادفع 12 الف في كمبيوتر ولا مقص و جنطين ب 22 الف ليه يعني دا كله...
انا مش بهاجم الرينو و انا من عشاق الاوربي بشده لكن كلمه حق الياباني في مصر يكسب
يا حازم باشا إللى مش فارق معاه الأوبشنز خسارة إن يروح يجيب ميجان أو أى عربية أوربى حيبقى أحسن له اليابانى و كفاية عليه تكييف قوى
لكن إللى عايز اوربى فيه تكنولوجيا حديثة لازم يروح التوكيل فى الصيانات المعتادة علشان يحافظ على العربية و حيدفع تقريبا نفس المبلغ إللى حيدفعة لو رايح يعمل صيانة كرولا أولانسر فى التوكيل لكن مش لازم يدفع المبالغ إللى بتقول عليها يا حازم لإن المبالغ دى حوادث و مش لدرجة 22 الف فى جنبين و جنوط يا باشا و 12 الف فى كمبيوتر
معاك في كل كلمه يا احمد باشا\
ما يبقاش راس مالي 200 الف مثلا و لما احب اشتري عربيه ب 100 الف اروح اجيب اوربي لاء الاحسن اجيب ياباني .
لكن لو ممعايا 500 الف لاء انا اجيب اوربي ب 100 و مش مشكله بقي الصيانه حتتكلف كام لان المبلغ مش حيبقي مؤثر اوي.
يا جماعه ما احترامي للميجان ....وللصناعه الفرنسية...
العربيات الفرنساوي الحديثة لم تلاقي نجاح حتي في اوروبا....للاسباب الآتية:
اولا اعتمادها علي تكنولوجيا اليكترونية اعتماديتها ضعيفة....بمعني ان كل العربيات حتي الياباني فيها الكترونيات بس...معدلات اعطال الفرنساوي كتير فعلا...
ثانيا ...الاشاعات في مصر مش بتطلع من فراغ....يعني اكيد في ناس اشتكت....والعربية سمعتها في السوق مش كويسة....والدليل علي كدة....
اية ايلي يخلي واحد عندة عربية ميجان....عاملة 60 الف كم ...ودهان مصنع وحالة زيرو.....وعايز يبيعها ويخسر فيها مبلغ محترم....يتجاوز الـ 40 الف جنية!!!!
الاجابة الوحيدة....ان العربية مطلعه عينة.....مش لازم تعطل.....بس كفاية انك تبقي راكب عربية وخايف لحسن تعطل بيك....ودة معني الاعتمادية.....يعني عربية لا يعتمد عليها في رحلات طويلة في طرق صحراوية .....
انا ايلي سمعتة ...من ناس معاها العربية ان تغيير البطارية يتطلب اخصائي من التوكيل...ولازم تتغير بتطريقة معينة....الوضع دة صعب جدااا جدااا خصوصا في مصر....
ثالثا..العربية تجميع تركي....ودة مش عيب ....بس الفرنساوي الهاتش باك منها سعرها اعلي بكتير....ودة برضة مقلق الناس ....اشمعني التركي ...!!!؟؟؟
ولو تفتكروا احد الاخوة الافاضل في المنتدي اشتري العربية وباعها بعد حوالي شهر..مش لعيب فيها (هو يمكن كان في شكوي من علبة الدركسيون وايلي ثمنها 9000 جنية !!!!) بس كان خوفة الاكبر من انها تعطل ويركنها علي ما يجي التوكيل يصلحها ....وتشتغل تاني.....يعني عيب اعتمادية....
الشعب المصري شعب عملي....الاغلبية العامة منة....بمعني انة عايز عربية دايرة ليل ونهار...ومن غير اعطال ولو عطلت اي ميكانيكي علي قدة يمشيها علي الاقل لحد ما يبقي يروح بيها توكيل ولا حتي تتصلح برة التوكيل.....مش عايز عربية لو عطلت تطلب الصيانة وتستني جنب عريبتك لحد الونش ما يجي ويشحن العربية يدخلها مركز ابحاث وكالة ناسا...لابحاث السيارات الرينو.....
العربية مش سيئة ومليانة اوبشن ماختلفناش.....بس سمعه الاعتمادية بتاعتها ضايعه...واكيد مش من فراغ.....
اهم سبب لبيع الناس للعربية الميجان و هى عاملة 50 و 60 الف انها خلاص بتخرج بره الضمان
انا اعرف واحد اشترى 4 عربيات ميجان, كل واحدة تفضل معاه لحد اما الضمان يخلص و بعد كده يبيعها و يجيب واحدة جديدة
fekra gamda gedan
bas 3momna el daman delwa2ti ba2a 3 seneen we 100000 km
we 3ala el adeem madooh lelfetees bardo l7ad 100000 km