السلام عليكم ورحمة الله وبركاته
كتير أوى بسمع ناس متخبطين فى الأحكام الشرعية ويجي يسألني عن حاجة أقوله حرام مثلا
يقولى ده الشيخ الفلاني قال حلال والشيخ العلاني قال مكروه وندخل فى دوامة لا تنتهى من النقاش. ولاحظت الموضوع ده كبر جدا بعد ظهور القنوات الفضائية بالذات
لدرجة أحد أصدقائي قالى لى: انا مبقتش عارف أصدق مين وأكذب مين!
فأنا رأيت ان ده موضوع مهم وحبيت أكلمكم عن خبرتي فيه بأسلوب سهل وبسيط باعتباري من أحد طلاب العلم الذين أنهوا دراستهم بالأزهر الشريف، يمكن اقدر أزيل الخلاف ويكون الموضوع ده بذرة فى الفهم الصحيح لموضوع الفتاوى بلغة بسيطة يفهمها كل الناس.
وهقولك على طريقة استخراج الأحكام الشرعية بنفسك حتى مش هتحتاج تسأل حد عنها
ولكن الموضوع محتاج شوية اجتهاد منك وده تأكد ان ربنا هيجزيك عليه بخلاف انه هيبعدك عن الشك والريبة فى الفتاوى إلى الأبد.
أنا هعتمد على مصدرين فقط فى البحث عن الفتوى عشان أسهل الأمور عليك:
1- كتاب نيل الأوطار - بفتح النون وتسكين الياء - شرح منتقى الأخبار للأمام الشوكاني:
الكتاب ده هنستفيد منه فى شرح الأحاديث المتعلقة بالأحكام الشرعية وكذلك الأحكام الفقهية المترتبة على هذه الأحاديث. والكتاب ده ممتع إلى أقصى درجة وهيفتح عينك على حاجات لا يمكن كنت تعرفها. وانا اخترته مخصوص لانه لغته أسهل بكتير من كتاب فتح الباري للامام الحافظ ابن حجر وهتلاقيه شامل جميع أبواب الفقه ونقاطه الفرعية.
الكتاب كاملا هتلاقيه هنا وتقدر تقرأه أونلاين:
المكتبة الإسلامية - نيل الأوطار شرح منتقى الأخبار
طب افرض قابلتك ألفاظ صعبة أو مبهمة؟
فى الحالة دي هتروح على المصدر التاني:
2- معاجم اللغة العربية: طبعا احنا عشان ندور على حكم شرعي هنضطر نغوص فى كتب التراث
والكتب دي مكتوبة باللغة العربية الكلاسيكية اللى بعض معانيها اما مش مفهوم لينا أو يختلط علينا بمفاهيم أخرى، فهنستعين بقاموس سهل وبسيط فى فهم المعاني دي وهو قاموس لسان العرب هتلاقيه هنا:
الباحث العربي: قاموس عربي عربي
ولو ان الشوكاني رحمه الله عليه شارح الألفاظ الصعبة فى الحديث بالتفصيل- ما علينا،
تعالوا ناخد مثال:
انت مثلا عايز تعرف هل ينفع نتوضأ بماء البحر ولا مينفعش؟
تقوم رايح على نيل الأوطار هتلاقى الكلام ده مشروح هنا:
المكتبة الإسلامية - نيل الأوطار شرح منتقى الأخبار - الجزء الأول
هتلاقيه شارح الموضوع باستفاضة وسهولة
الأول بياخد الحديث ويفصله من حيث التصحيح والتضعيف والاسناد
وبعدين يشرح الأحكام الشرعية المستفادة منه
وبعدين كمان بعض اللطائف اللغوية الموجودة فيه
بصراحة كتاب جميل جدا وممتع وممكن تنطلق منه للبحث فى المصادر الأخرى اللى الامام الشوكاني اعتمد عليها فى كتابه.
بصراحة يا جماعة الواحد حزين ان كل رفوف الكتب دي اللى تركها علماؤنا محدش عمره فكر ان يفتحها بعد ما بذلوا كل شيء فى سبيل العلم ده.
في انتظار تعليقاتكم ولو عجبكم الموضوع ان شاء الله ممكن أكتبلكم أكتر في نفس السياق
لان ده مجرد أ.ب في الشريعة مش أكتر،
المفضلات