يومياتي في تعلم السواقة

**OlaOsman** · 21-03-2008 09:20 PM

النهاردة كان أول يوم.. مش قادرة أوصف لكوا.. احساس قمئ بالغباء و التخلف و العته المغولي

مش قادرة أحدد اوي الفرامل من الدبرياج.. شايفة البنزين واخد الموضوع بحساسية زيادة اوي و لازم أظبط رجلي عليه.. في مشكلة جامدة في المنطقة اللي تحت رجلي دي و مضطرة اتعامل مع التلات أشياء دول بحكمة و توازن بس عشان ما أخبطش في حد و ما أخبطش حد

حاسة ان الموضوع too complicated for me و اني عمري ما هاقدر اسوق زي البني آدمين ابدا :(

آه.. نسيت اقول لكوا اني لسه ما اتعلمتش النقل :o

ادعووووووووووووا لي :o

**معاذ الشرباصى** · 21-03-2008 09:23 PM

اهم حاجة فى السواقة الجرأة و عدم الخوف

لو الخوف تسلل اليكى, هيبقى صعب اوى تتعلمى صح, لازم تجمدى قلبك

اما بالنسبة للدواسات و خلافه هى مسالة تعود على استخدام اكثر من حاسة و عضو فى الجسم فى وقت واحد

**mohamed_88sk** · 21-03-2008 09:24 PM

لا متعقديش نفسك ...كل بيجي بس بالهداوه إن شاء الله .. ومين عالم يا ستي ربنا يرزوقك بأوتوماتيك دواستين بس ..

**Dr_Mido** · 21-03-2008 09:28 PM

كلنا كنا كدة محدش مولود وم رخصته فى ايدة :D

و الله والنقل سهل وهى تعود حتى لو تلاحظى ان السكران بيسوق لانه متعود على النقلات بقت روتين عندة انتى متخافيش من حد ولو ماشيه وحد رخم عليكى خليكى ارخم منه مرتين تلاته
متخليش حد يخوفك ولو عمل انه بيزنق عليكى كبرى دماغك مش هيخبط عربيته ولو ماشيه بالراحه وواحد رخم بيزمر وراكى طنشى خالص ومتتربكيش علشان لو اتربكتى مش كويس خالص
وبرضه تجنبى الشارع من الساعه 7 الصبح لحد 10
ومعاكى من 10 او 11 لحد 1 حد اقصى قبل مالشارع بيبقى مدبحه
وبالليل من بعد 11 خدى معاكى حد وانزلى مشى العربيه فى الشارع
وطبعا تجنى الهرم وفيصل و ووسط البلد ال 24/7
وتجنبى الكبارى والمفارق
:dولو حد رخم هاتى رقمه هنا واحنا نجيبهلوك مخطوف

**Nader** · 21-03-2008 09:30 PM

اول نصيحة بقولها لاي حد لسة في اول

ايامة في السواقة بقولة انسى ان في

تحت رجلك الدواسة اليمين بتاعة البنزين

حاولى متستخدميهاش خالص دلوقتي

وامشي على السلنسية يعني ارفعي رجلك

شوية من على الدبرياج وهتلاقي العربية

بتتحرك لوحدها، انا لما كنت بعلم اختي

كنت بقولها اهم حاجة تعرفي توقفي العربية

ومتخافيش من الفرامل!! مش عارف لية

بنات حواء بيخافوا يفرملوا .... او بيفرملوا

ويخافوا يدوسوا بنزين!!! انا عندي النوعين والحمد لله!!!

المهم كمان متخليش العربية هي اللي تسوقك

وتمشيكي، يعني مش هي تحدف يمين تقومي انتي

جايبة شمال وبعدين تجيب يمين تاني علشان

تعدلي،، لا تبتي في طارة الدركسيون كويس

ومتحركيش ايدك وخليكي في طرق مستقيم

بقدر الامكان لحد ما تتمكني من العربية و

تتعودي على ابعادها كويس بعد كدة تقدري

تنزلي في في شوارع رايقة الى حد ما

فشوارع متوسطة، فكباري اخيراً.

ملحوظة اخيرة اتعلمي على الاقل تجيبي التاني

لان لو مشيتي كتير على الاول بالـ127 في

الايام الحر دي العربية هتعملها معاكي وتسخن.

وبالتوفيق.

**aif** · 21-03-2008 09:40 PM

شدي حيلك يا علا
لو عاوزه مشجعين ممكن نيجي نشجعك
ما قلتيليش بتتعلمي فين ومع مين

**OlaOsman** · 21-03-2008 09:54 PM

المشاركة الأصلية كتبت بواسطة معاذ الشرباصى

اهم حاجة فى السواقة الجرأة و عدم الخوف

لو الخوف تسلل اليكى, هيبقى صعب اوى تتعلمى صح, لازم تجمدى قلبك

اما بالنسبة للدواسات و خلافه هى مسالة تعود على استخدام اكثر من حاسة و عضو فى الجسم فى وقت واحد

هاكدب عليكوا يعني؟ خايفة و مرعوبة و مذعورة

الدواسات.. ايوه.. هي اسمها الدواسات.. أول مرة أستعمل المصطلح ده :)

**OlaOsman** · 21-03-2008 09:55 PM

المشاركة الأصلية كتبت بواسطة mohamed_88sk

لا متعقديش نفسك ...كل بيجي بس بالهداوه إن شاء الله .. ومين عالم يا ستي ربنا يرزوقك بأوتوماتيك دواستين بس ..

ناوية عليها ان شاء الله بعد اما ال 127 يبان لها أصحاب :p

دعواتك :)

-

الموضوع: يومياتي في تعلم السواقة

LinkBack

أدوات الموضوع

عرض

-

-

-

-

-

المواضيع المتشابهه

اثناء تعلم السواقة لاول مرة

يومياتي في اول زيارة للتوكيل

تعلم مراتك السواقة و تجبلها عربية ولا لأ؟؟

السواقة في مصر

الكلمات الدلالية لهذا الموضوع

المفضلات

المفضلات

ضوابط المشاركة